Job 23

Chinese TTVR (現代台語譯本羅馬字版)

← Chapter 22 Jump to: Chapter 24 →

1Iok-pek ìn Í-lī-hoat kóng:

2Góa kàu kin-á-ji̍t iáu tōa-siaⁿ bâi-oàn; góa haiⁿ-haiⁿ-chhan, Siōng-tè ê chhiú iáu koh kā góa chhi̍h-tiâu-tiâu.

3Góa jōa-á-ni̍h ài chai tio̍h án-chóaⁿ chiah ōe-tàng chhē-tio̍h Siōng-tè, thang kàu I ê chō-ūi!

4Góa beh tùi I pâi-lia̍t góa ê àn-kiāⁿ, ūi-tio̍h góa ka-kī sin-sò͘.

5Góa ài chai I ōe án-chóaⁿ ìn góa, ài bêng-pe̍k I beh tùi góa kóng sím-mi̍h.

6I kiám ōe ēng tōa koân-lêng tùi-hù góa? Bōe! I ōe thiaⁿ góa sin-sò͘.

7Tī hia chèng-ti̍t ê lâng ōe-tàng kap I piān-lūn; án-ni, góa chiū éng-oán bián siū sím-phòaⁿ-chiá tēng-chōe.

8M̄-kú, góa ǹg tang khì chhē, I bô tī hia, ǹg sai, mā bô khòaⁿ-tio̍h I;

9chiūⁿ pak, khì I teh chòe tāi-chì hia, bô khòaⁿ-tio̍h I; lo̍h lâm, mā bô khòaⁿ-kìⁿ I ê iáⁿ.

10Chóng-sī I chai góa só͘ kiâⁿ ê lō͘; I khó-giām góa liáu-āu, góa ōe chhin-chhiūⁿ thoàn-liān--kè ê kim.

11Góa it-ti̍t tè I ê kha-pō͘, chip-siú I ê lō͘, m̄-bat phian-lī.

12Góa m̄-bat ûi-pōe I hoat-chhut ê bēng-lēng; góa tin-sioh I ê ōe, put-sî kì tī sim-lāi.

13I chi̍t-ē koat-tēng, siáⁿ-lâng ōe-tàng kā I kái-piàn? I chiàu I só͘ ài--ê khì chòe.

14I ōe chiàu I ūi-tio̍h góa an-pâi--ê khì chòe; I iáu ū chin chōe chit-khoán ê kè-ōe.

15Só͘-í góa tī I ê bīn-chêng phi̍h-phi̍h-chhoah; Góa siūⁿ--tio̍h chiū kiaⁿ.

16In-ūi Siōng-tè hō͘ góa sit-táⁿ, Choân-lêng-chiá hō͘ góa phi̍h-phi̍h-chhoah;

17sui-jiân tōa o͘-àm jia-khàm góa ê bīn, góa iáu-kú m̄ tiām-tiām bô kóng-ōe.

← Chapter 22 Jump to: Chapter 24 →