Job 40

Chinese TTVR (現代台語譯本羅馬字版)

← Chapter 39 Jump to: Chapter 41 →

1Siōng Chú koh tùi Iok-pek kóng:

2Hò͘ⁿ-piān ê lâng kiám thang kap Choân-lêng-chiá cheng-lūn? Ài chí-chek Siōng-tè ê, taⁿ lí tio̍h ìn.

3Iok-pek chiū ìn Siōng Chú kóng:

4Góa chin bî-sòe, góa ōe-tàng ìn-tap lí sím-mi̍h? Góa ēng chhiú ng góa ê chhùi.

5Góa í-keng kóng chi̍t piàn, bô ōe thang ìn; góa í-keng kóng chhiau-kè, m̄-thang koh kóng.

6Siōng Chú chiū tùi kńg-lê-á-hong tiong-kan ìn Iok-pek:

7Tio̍h chún-pī hó-sè, chòe chi̍t ê tāi-tiōng-hu; góa mn̄g lí, lí tio̍h ìn góa.

8Lí sī beh hó͘-tēng góa ê chhâi-koat, chí-chek góa m̄-tio̍h, lâi chèng-bêng lí ka-kī sī tio̍h o͘h?

9Lí kiám ū chhin-chhiūⁿ Siōng-tè hiah ū-la̍t ê chhiú-kut? Lí kiám ōe chhin-chhiūⁿ góa hoat-chhut lûi lōng-lōng-háu ê siaⁿ?

10Án-ni, tio̍h ēng chun-êng ui-giâm lâi chng-thāⁿ, ēng êng-kng chun-kùi chòe saⁿ chhēng.

11Tio̍h piàⁿ-chhut lí móa-pak ê siū-khì, khòaⁿ-tio̍h it-chhè kiau-ngō͘ ê lâng, tio̍h hō͘ in khut-kē.

12Khòaⁿ-tio̍h it-chhè kiau-ngō͘ ê lâng, tio̍h kā in khiú--lo̍h-lâi, tī pháiⁿ-lâng ê tōe-pôaⁿ kā in thún-ta̍h.

13Tio̍h kā in chòe-chi̍t-ē tâi tī thô͘-tóe, kā in lóng koaiⁿ tī Im-kan.

14Án-ni, liân góa mā ōe sêng-jīn, lí ū khùi-la̍t kiù lí ka-kī.

15Lí khòaⁿ hô-bé, góa chō lí, mā chō i; i chhin-chhiūⁿ gû chia̍h-chháu.

16I ê khùi-la̍t chāi-tī io; i ê la̍t chāi-tī pak-tó͘-kun.

17I ê bé-liu khiàu--khí-lâi chhin-chhiūⁿ pek-hiuⁿ-chhiū; i ê tōa-thúi-kun chho͘-ióng;

18i ê kut-thâu chhin-chhiūⁿ tâng ê kóng; i ê sù-chi chhin-chhiūⁿ thih ê thiāu.

19I sī Siōng-tè ê kia̍t-chok; chí-ū i ê Chhòng-chō-chiá ōe-tàng kā i chè-ho̍k.

20Tōa-soaⁿ sió-soaⁿ kiong-kip i chia̍h-mi̍h; chhân-iá ê pah-siù tī hia thit-thô.

21I tó tī liân-hoe-hio̍h kha, khùn tī kui-phō lô͘-tek ê chúi-khut lāi.

22Liân-hoe-hio̍h kā i jia--teh; khoe-piⁿ ê liú-chhiū kā i ûi--teh.

23Hô-chúi hoàn-lām, i mā m̄ kiaⁿ; Iok-tàn-hô tiòng kàu i ê chhùi, i mā chū-chāi.

24Siáⁿ-lâng ōe-tàng tī i ba̍k-chiu kim-kim ê sî kā i lia̍h--tio̍h, á-sī ēng kau-á kǹg-kè i ê phīⁿ?

← Chapter 39 Jump to: Chapter 41 →