Job 39

Chinese TTVR (現代台語譯本羅馬字版)

← Chapter 38 Jump to: Chapter 40 →

1Soaⁿ-giâm tiong ê iá soaⁿ-iûⁿ tī-sî siⁿ-kiáⁿ, lí chai bô? Lo̍k-bú siⁿ-kiáⁿ ê sî, lí bat khòaⁿ--tio̍h bô?

2In hoâi-thai tī-sî kàu-ge̍h, lí ōe-hiáu sǹg bōe? In tī-sî seng-sán, lí chai bô?

3In khut--lo̍h-khì, kā kiáⁿ siⁿ--chhut-lâi;

4in ê kiáⁿ tī soaⁿ-iá chiām-chiām tióng-tōa ióng-chòng, lī-khui chiū bô koh tńg--lâi.

5Siáⁿ-lâng pàng iá-lû chū-iû? Siáⁿ-lâng tháu-khui soaⁿ-lû ê soh?

6Góa ēng khòng-iá hō͘ in chòe chhù, ēng kiâm ê tōe hō͘ in tòa.

7Iá-lû thí-chhiò siâⁿ-lāi ê soan-hoa, mā bián koh thiaⁿ kóaⁿ lû-á ê lâng hoah-hiàm.

8Tōa-soaⁿ sió-soaⁿ lóng sī in ê chháu-po͘; in chhē ta̍k-khoán chhiⁿ-chhùi ê chháu lâi chia̍h.

9Iá-gû kiám beh kā lí chòe kang, kiám beh tī lí ê tiâu-lāi kè-mî?

10Lí kiám ōe-tàng ēng soh pa̍k iá-gû lâi lôe-chhân? I kiám ōe tè lí khì kā soaⁿ-kok ê tōe pê hō͘ pîⁿ?

11Lí kiám thang in-ūi i la̍t tōa chiū khò i, kiám thang chiong lí ê khang-khè lóng kau-tài i?

12Lí kiám ōe-tàng sìn-jīm i chiong lí ê siu-sêng tòa--tńg-lâi, siu-chi̍p tī ngó͘-kok-tiûⁿ?

13Tô-chiáu phah-piàⁿ ia̍t-si̍t, mā bōe-tàng chhin-chhiūⁿ ho̍h pe--khí-lâi.

14I kā nn̄g pàng tī thô͘-kha, hō͘ thô͘ ê sio-khì pū;

15bô siūⁿ-tio̍h kha ōe lap--tio̍h, iá-siù ōe ta̍h--tio̍h.

16I bô hó-hó chiàu-kò͘ i ê kiáⁿ, ká-ná m̄-sī ka-kī siⁿ--ê; i ê lô-khó͘ bô sêng-kó mā bô iàu-kín.

17In-ūi Siōng-tè bô hō͘ i tì-hūi, mā bô hō͘ i lêng-khiáu.

18M̄-kú i chi̍t-ē théng-sin cháu, chiū thí-chhiò bé kap khiâ-bé--ê.

19Bé ê la̍t kiám sī lí hō͘ i--ê? I ām-kún ê chang kiám sī lí kā i chhēng--ê?

20Lí kiám ū hō͘ i chhin-chhiūⁿ chháu-meh hiah gâu thiàu, hō͘ i tián-ui phn̍gh-phn̍gh-háu hō͘ lâng kiaⁿ?

21I tī soaⁿ-kok tiong chhut-la̍t pê thô͘, tián i ê ui-le̍k beh chhut-hoat èng-chiàn.

22I bô teh kiaⁿ, bô teh lún, biān-tùi to-kiàm lóng bô hôe-thâu.

23Seng-khu téng ê chìⁿ-tē khiang-khiang-kiò; tn̂g-chhiuⁿ, té-chhiuⁿ siám-sih hoat-kng.

24I thiaⁿ-tio̍h lat-pah ê siaⁿ chiū tòng bōe tiâu, heng-hùn kek-tōng, hiòng-chêng ti̍t-chhiong.

25Lat-pah chi̍t-ē tân, i chiū phǹg-phǹg-kiò; i tùi hn̄g-hn̄g chiū phīⁿ-tio̍h kau-chiàn ê bī, thiaⁿ-tio̍h kun-tiúⁿ ê hō-lēng kap sio-thâi ê hoah-hiàm.

26Bā-hio̍h thí-si̍t pe-khì lâm-pêng, kiám sī khò lí ê tì-hūi?

27Eng-chiáu chhèng-koân, tī koân ê só͘-chāi choh-siū, kiám sī chiàu lí ê bēng-lēng?

28I tiàm tī soaⁿ-giâm, tòa tī soaⁿ-chiam an-ún ê só͘-chāi,

29tùi hia ba̍k-chiu kim-kim siòng hn̄g-hn̄g, sì-kòe chhē chia̍h-mi̍h.

30Si-thé tī tó-ūi, eng-chiáu chiū tī hia, eng-á-kiáⁿ khîⁿ óa-khì suh huih.

← Chapter 38 Jump to: Chapter 40 →