Job 18

Chinese TTVR (現代台語譯本羅馬字版)

← Chapter 17 Jump to: Chapter 19 →

1Su-a -lâng Pí-le̍k-ta̍t ìn Iok-pek kóng:

2Lí chhē goán ê ōe-phāng beh chhē jōa kú? Lí léng-chēng siūⁿ khòaⁿ-bāi, jiân-āu goán chiah kóng.

3Goán sī-án-chóaⁿ hō͘ lí khòaⁿ-chòe cheng-siⁿ, hō͘ lí khòaⁿ-chòe gû-gōng?

4Lí chit-ê lâng, lí hoat tōa siū-khì siong-hāi ka-kī, tōe kiám ōe in-ūi lí pìⁿ-chòe hong-po͘? Tōa chio̍h kiám ōe sóa-lī goân-ūi?

5Pháiⁿ-lâng ê teng ōe sit--khì; i ê hé-iām ōe hoa--khì.

6I pò͘-pîⁿ lāi ê kng ōe àm--khì, tiàu tī téng-bīn ê teng ōe sit--khì.

7I ún-kiān ê kha-pō͘ khai-sí iô-choah; i ê kè-bô͘ ōe hāi-tio̍h ka-kī.

8I ka-kī kiâⁿ-ji̍p hām-khiⁿ; i ê kha ta̍h-tio̍h oa̍h-tauh.

9Khoân-thò ōe tîⁿ-tio̍h i ê kha-āu-tiⁿ; lô-bāng ōe lia̍h-tio̍h i.

10Liù-soh ūi-tio̍h i khàm tī thô͘--ni̍h; hām-chíⁿ ūi-tio̍h i siat tī lō͘--ni̍h.

11Sì-ûi ū khióng-pò͘ teh tng-tán, kā i tè-tiâu-tiâu.

12I ê khùi-la̍t in-ūi iau-gō soe-bî; chai-hō put-sî tè tī sin-piⁿ.

13Ōe tì-kàu sí ê pīⁿ thòaⁿ kah kui seng-khu, hō͘ kha-chhiú lóng nōa--khì.

14I ōe tùi só͘ óa-khò ê pò͘-pîⁿ hō͘ lâng khiú--chhut-lâi, thoa kàu khióng-pò͘ ê ông bīn-chêng.

15I ê pò͘-pîⁿ hō͘ hé sio--khì; ū liû-hông iā tī i khiā-khí ê só͘-chāi.

16Tī ē-tóe, i ê kun sí--khì; tī téng-bīn, i ê ki ta--khì.

17Tī tōe-chiūⁿ, bô lâng ōe koh kì-tit i; koe-thâu-hāng-bé, bô lâng ōe koh thê-khí i ê miâ.

18I ōe tùi kng-bêng tiong siū kóaⁿ-ji̍p o͘-àm, koh siū kóaⁿ-chhut sè-kài.

19Tī pún-cho̍k tiong-kan i bô kiáⁿ bô sun; tī khiā-khí ê só͘-chāi i bô lâu pòaⁿ-lâng.

20I ê cho-gū hō͘ sai-pêng ê lâng gông-ngia̍h, hō͘ tang-pêng ê lâng tio̍h-kiaⁿ.

21Che chiū-sī pháiⁿ-lâng ê miā-ūn, m̄ bat Siōng-tè ê lâng ê kiat-kio̍k.

← Chapter 17 Jump to: Chapter 19 →