Job 30

Chinese TTVR (現代台語譯本羅馬字版)

← Chapter 29 Jump to: Chapter 31 →

1Hiān-chāi pí góa khah siàu-liân ê lâng thí-chhiò góa; kî-si̍t hiah-ê lâng ê lāu-pē, góa liân hō͘ in kap góa kò͘-iûⁿ ê káu tàu-tīn to bô ài.

2In tùi góa lóng bô lō͘-ēng; in ê cheng-le̍k í-keng soe-thè.

3In in-ūi khiàm-kheh, iau-gō, siau-sán-lo̍h-bah, àm-mî tī hong-hòe chhiⁿ-chhìn ê só͘-chāi chia̍h-hong pō͘-thô͘.

4In tī chháu-phō bán kiâm-chháu chòe chhài chia̍h, ēng khó͘ koh siap ê chhiū-kun chòe chia̍h-mi̍h.

5In tùi jîn-kûn ê tiong-kan hō͘ lâng kóaⁿ-cháu; lâng tī āu-bīn hoah in, ná teh hoah chha̍t.

6In soah tio̍h tòa tī soaⁿ-kok gûi-hiám ê só͘-chāi, tī thô͘-khang kap chio̍h-tōng ê lāi-bīn.

7In tī chhiū-nâ lāi chhin-chhiūⁿ iá-siù teh háu, tī chhì-phè ē-bīn khoeh chòe-hé.

8In sī gōng-lâng, hā-chiān ê bô-miâ-sió-chut, siū piⁿ-phah, khu-tio̍k chhut-kéng.

9Taⁿ, chiah-ê lâng chhiùⁿ-koa hì-lāng góa, ēng góa chòe ōe-pìⁿ thí-chhiò.

10In iàm-ò͘ⁿ góa, siám-khui góa hn̄g-hn̄g, tú-tio̍h góa chiū kā góa phùi chhùi-nōa.

11In-ūi Siōng-tè pak-toa̍t góa ê bú-khì, khó͘-chhó͘ góa, chhut-chāi lâng kā góa bú-jio̍k.

12Chiah-ê húi-lūi khí-lâi kong-kek góa, siat lô-bāng hō͘ góa poa̍h-tó, pek góa kiâⁿ bia̍t-bông ê lō͘.

13In chhiat-tn̄g góa tô-cháu ê lō͘, pek góa oân-choân siau-bia̍t, iáu-kú bô lâng kā in chó͘-tòng.

14In chhin-chhiūⁿ kun-tūi kong-phòa siâⁿ-chhiûⁿ, tùi phòa-khiah chi̍t-pho chi̍t-pho chhiong--ji̍p-lâi.

15Khióng-pò͘ kā góa ap-tó; góa ê chun-giâm chhin-chhiūⁿ hō͘ hong sàu-chīn; góa ê hoân-êng ná hûn siau-sòaⁿ.

16Taⁿ, góa ê sim pi-siong kàu beh sí; chai-lān ta̍k-ji̍t kā góa khîⁿ-tiâu-tiâu.

17Mî--sî góa ê kut-thâu chhin-chhiūⁿ chhì teh chha̍k, put-sî thiàⁿ kah tòng bōe tiâu.

18Siōng-tè tōa-la̍t chang góa ê gōa-saⁿ, chhui góa ê ām-kún.

19I kā góa hiat tī thô͘-bê tiong; góa liân thô͘-hún hé-hu to m̄-ta̍t.

20Góa kiû-kiò lí, lí bô ìn góa; góa tùi lí kî-tó, lí m̄ chhap góa.

21Lí pìⁿ-bīn chân-jím tùi-hù góa, tāng-tāng khó͘-chhó͘ góa.

22Lí hō͘ hong kā góa kńg-lâi-kńg-khì, ēng pō-hong kā góa siau-bia̍t.

23Góa chai lí beh chhōa góa khì sí-bông ê só͘-chāi, kàu ūi-tio̍h ōe sí ê lâng chún-pī ê chhù.

24Lâng tú-tio̍h chai-lān hoah-kiù-lâng, lí kiám bōe chhun-chhiú kā kiù?

25Lâng tú-tio̍h hoān-lān, góa kiám bô ūi-tio̍h i thî-khàu? Lâng sàn-chhiah, góa ê sim kiám bô ūi-tio̍h i iu-būn?

26Góa ǹg-bāng hok-khì, chai-lān chiū kàu; góa thèng-hāu kng-bêng, o͘-àm chiū lâi.

27Góa ê sim-tn̂g kún-ká bô-thêng; khó͘-lān ê ji̍t-chí chhiong-kek góa.

28Góa iu-ut kiâⁿ-lâi-kiâⁿ-khì, bô lâng an-ùi; góa tī chū-hōe tiong khiā khí-lâi âu-kiò kiû pang-chān.

29Góa kap chhâi-lông chòe hiaⁿ-tī, kap tô-chiáu chòe tâng-phōaⁿ.

30Góa ê phê-hu hoán-o͘ liù-phê; góa ê kut-thâu in-ūi hoat-sio chhàu-hé-ta.

31Góa ê khîm tôaⁿ pi-ai ê tiāu; góa ê siau kā thî-khàu ê lâng phōaⁿ-chàu.

← Chapter 29 Jump to: Chapter 31 →