Job 19

Chinese TTVR (現代台語譯本羅馬字版)

← Chapter 18 Jump to: Chapter 20 →

1Iok-pek ìn Pí-le̍k-ta̍t kóng:

2Lín hō͘ góa ê sim iu-khó͘, ēng ōe teh-chhùi góa, beh kàu tī-sî?

3Lín chi̍t-piàn koh chi̍t-piàn lêng-jio̍k góa, pháiⁿ khoán-thāi góa mā bōe kám-kak kiàn-siàu.

4Góa nā chin-chiàⁿ ū kè-sit, kè-sit góa ka-kī sêng-tam.

5Lín khoa-kháu ka-kī pí góa khah hó, koh ēng góa ê put-hēng chèng-si̍t góa ū-chōe.

6Tio̍h chai, Siōng-tè óng-khut góa, I ēng lô-bāng ûi góa.

7Góa tōa-siaⁿ hoah “Oan-óng o͘h!” m̄-kú bô lâng ìn góa; âu-kiò, mā bô lâng chú-chhî kong-tō.

8I cha̍h góa ê lō͘, hō͘ góa bōe-tàng kè--khì, ēng o͘-àm jia-khàm góa beh khì ê lō͘.

9I pak-toa̍t góa ê chun-êng, liù-khì góa thâu-khak téng ê hoa-koan.

10I tùi sì-bīn kong-kek góa, kā góa siau-bia̍t; I kā góa ê ǹg-bāng pu̍ih--khí-lâi, chhin-chhiūⁿ teh pu̍ih chhiū.

11I hoat tōa siū-khì kong-kek góa, khòaⁿ góa chòe I ê tùi-te̍k.

12I ê kun-tūi chòe-chi̍t-ē chhiong--lâi, khui-lō͘ lâi kong-kek góa, tī góa pò͘-pîⁿ ê sì-ûi chat-iâⁿ.

13I hō͘ góa ê chhin-cho̍k oán-lī góa, hō͘ pêng-iú kap góa so͘-oán.

14Góa ê chhin-lâng kap góa toān-choa̍t koan-hē; góa ê ti-kí lóng bōe-kì-tit góa.

15Góa ê lâng-kheh, góa ê lú-pī khòaⁿ góa chòe gōa-lâng; in lóng khòaⁿ góa chòe siⁿ-hūn-lâng.

16Góa kiò góa ê lô͘-po̍k, in m̄ ìn; góa tio̍h chhin-chhùi kā in ko͘-chiâⁿ.

17Góa ê khùi hō͘ góa ê bó͘ iàm-chiān; góa ê chhin hiaⁿ-tī mā iàm-ò͘ⁿ góa ê chhàu-bī.

18Liân gín-á to khòaⁿ-khin góa; in khòaⁿ--tio̍h chiū thí-chhiò góa.

19Góa siōng chhin-bi̍t ê pêng-iú lóng iàm-chiān góa; góa siōng-thiàⁿ ê lâng pìⁿ-bīn hoán-tùi góa.

20Góa sán kah phê-pau-kut; góa chí-ū chhun chi̍t-kháu-khùi.

21Góa ê pêng-iú ah, lín tio̍h khó-lîn góa, khó-lîn góa, in-ūi Siōng-tè ê chhiú kong-kek góa.

22Lín sī-án-chóaⁿ chhin-chhiūⁿ Siōng-tè khún-pek góa? Lín beh khó͘-chhó͘ góa kàu sím-mi̍h sî?

23Góa jōa-á-ni̍h ǹg-bāng chiong góa ê ōe siá--khí-lâi, kì tī chheh--ni̍h;

24ēng thih-chām-á khek tī chio̍h-thâu, ēng iân koàn-chù lâu kàu éng-oán.

25Chóng-sī góa chai, góa ê Kiù-sio̍k-chiá oa̍h--teh; chòe-āu I ōe khí-lâi thòe góa piān-hō͘.

26Sui-jiân góa ê phê nōa--khì, góa ê jio̍k-sin iáu ōe kìⁿ-tio̍h Siōng-tè.

27Góa ōe khòaⁿ-tio̍h I khiā tī góa sin-piⁿ; góa ōe chhin-ba̍k khòaⁿ--tio̍h, m̄-sī pa̍t-lâng. Góa ê sim-tn̂g án-ni khat-bō͘ kàu hūn--khì.

28Lín nā kóng: Lán beh án-chóaⁿ kā i khún-pek? In-ūi būn-tôe ê kun-goân chāi-tī i.

29Lín tio̍h kiaⁿ to-kiàm, in-ūi Siōng-tè siū-khì, lín ōe siū to-kiàm ê hêng-hoa̍t. Lín tio̍h chai, it-tēng ū sím-phòaⁿ!

← Chapter 18 Jump to: Chapter 20 →