Job 32

Chinese TTVR (現代台語譯本羅馬字版)

← Chapter 31 Jump to: Chapter 33 →

1Chit saⁿ ê lâng chiū thêng-chí, bô koh ìn Iok-pek, in-ūi i kian-chhî ka-kī bô-chōe.

2Hit-sî ū Pò͘-su -lâng, sio̍k tī Lân ê cho̍k, Pa-la-ka ê kiáⁿ Í-lī-hō͘, chin siū-khì; siū-khì Iok-pek, in-ūi Iok-pek khòaⁿ ka-kī pí Siōng-tè khah tio̍h.

3I mā siū-khì Iok-pek saⁿ ê pêng-iú, in-ūi in bô ōe thang ìn, iáu-kú kā Iok-pek tēng-chōe.

4Í-lī-hō͘ beh kap Iok-pek kóng-ōe, iáu-teh thèng-hāu, sī in-ūi in saⁿ ê pí i khah chōe hè.

5Í-lī-hō͘ khòaⁿ chit saⁿ ê lâng bô ōe thang ìn, chiū tōa siū-khì.

6Pò͘-su -lâng Pa-la-ka ê kiáⁿ Í-lī-hō͘ hôe-èng kóng: Góa siàu-liân, lín nî-lāu, só͘-í góa pháiⁿ-sè, m̄-káⁿ tùi lín hoat-piáu góa ê ì-kiàn.

7Góa kóng: Tio̍h hō͘ nî-hè chōe--ê seng kóng, hō͘ nî-kí tōa--ê ēng tì-hūi kà-sī lâng.

8M̄-kú lâng ê lāi-bīn ū sim-lêng, chiū-sī Choân-lêng-chiá ê khùi, ōe hō͘ lâng bêng-lí.

9Khah sī-tōa--ê bô lóng ū tì-hūi; khah nî-lāu--ê bô lóng ōe-hiáu hun-piān sī-hui.

10Só͘-í góa kóng, lín tio̍h thiaⁿ; góa beh hoat-piáu góa ê ì-kiàn.

11Khòaⁿ ah, góa ū teh thiaⁿ lín kóng-ōe, chù-ì thiaⁿ lín ê piān-lūn, kî-thāi lín chhē-tio̍h sek-tòng ê ōe.

12Góa ū chù-ì thiaⁿ lín kóng, m̄-kú lín bô lâng ōe-tàng piān-tó Iok-pek, bô chi̍t ê ōe-hiáu ìn i ê ōe.

13Lín m̄-thang kóng: Goán ū tì-hūi; ōe iâⁿ i--ê sī Siōng-tè, m̄-sī lâng.

14Iok-pek m̄-sī teh kap góa piān-lūn, góa mā bōe ēng lín ê kóng-hoat kā i ìn.

15Iok-pek ah, in gāng-gāng bô koh ìn, bô ōe thang kóng.

16In bô kóng-ōe, tiām-tiām khiā--teh, bô koh ìn, góa kiám tio̍h koh thèng-hāu?

17Góa mā beh kóng góa eng-kai kóng ê ōe, hoat-piáu góa ê ì-kiàn.

18Góa ū chin chōe ōe beh kóng, ū chi̍t pak khùi tī góa lāi-bīn teh ká-kún.

19Góa ê pak-lāi chhin-chhiūⁿ ū hong-ba̍t-ba̍t ê chiú, chhin-chhiūⁿ sin ê phê-tē teh-beh piak-li̍h.

20Góa beh kóng--chhut-lâi, thang tháu-khùi; góa beh khui-chhùi lâi ìn.

21Góa bōe khòaⁿ lâng ê sin-hūn tùi-thāi lâng, mā bōe phô͘-tháⁿ lâng.

22Góa bōe-hiáu kā lâng phô͘-tháⁿ; nā ōe, góa ê Chhòng-chō-chiá chin kín chiū kā góa chhú-hoa̍t.

← Chapter 31 Jump to: Chapter 33 →