Job 41

Chinese TTVR (現代台語譯本羅馬字版)

← Chapter 40 Jump to: Chapter 42 →

1Lí kiám ōe-tàng ēng kau-á thoa hái-siù khí--lâi, á-sī ēng soh liù i ê chi̍h?

2Lí kiám ōe-tàng ēng soh chhng-kè i ê phīⁿ, á-sī ēng kau-á chǹg-kè i ê gê-chô?

3I kiám ōe it-ti̍t kiû lí lîn-bín, á-sī tùi lí kóng un-jiû ê ōe?

4I kiám ōe kap lí li̍p-iok, éng-oán chòe lí ê lô͘-po̍k?

5Lí kiám ōe kā i khòaⁿ-chòe chiáu-á kap i thit-thô, á-sī kā i pa̍k--teh, hō͘ lí ê cha-bó͘ gín-á khan-teh kiâⁿ?

6Seng-lí-lâng kiám ōe kā i tòng-chòe siong-phín phah-bōe? In kiám ōe kā i chhiat chi̍t-tè chi̍t-tè sòaⁿ-sòaⁿ-á bōe?

7Lí kiám ōe-tàng ēng hî-pio kā i kui seng-khu chha̍k-thàu-thàu, á-sī ēng hî-chhe chha̍k-thàu i ê thâu-khak?

8Lí kā kha̍p khòaⁿ-bāi leh! Lí choa̍t-tùi m̄-káⁿ koh kap i piàⁿ!

9Siūⁿ-beh kā chè-ho̍k, choa̍t-tùi bô khó-lêng; lâng chi̍t-ē khòaⁿ--tio̍h chiū kiaⁿ kah phòa-táⁿ.

10Bô lâng hiah hó-táⁿ káⁿ jiá i. Án-ni, siáⁿ-lâng tī góa ê bīn-chêng khiā ōe tiâu?

11Siáⁿ-lâng tùi-khòng góa, góa choa̍t-tùi bōe pàng i soah. Thiⁿ-kha-ē it-chhè lóng sī góa ê.

12Góa bōe-tàng bô kóng chit-ê hái-siù ê seng-khu, bô kóng i kut-keh ê súi kap i ê khùi-la̍t.

13Siáⁿ-lâng ōe-tàng pak i ê gōa-saⁿ? Siáⁿ-lâng ōe-tàng ji̍p-khì i gê-chô ê tiong-kan?

14Siáⁿ-lâng káⁿ khui i ê chhùi? I sì-kho͘-lìn-tńg ê chhùi-khí lóng chin khióng-pò͘.

15Teh pó-hō͘ i--ê sī chi̍t-pâi chi̍t-pâi ê lân, ha̍p--khí-lâi chiū hong-ba̍t-ba̍t;

16chi̍t-tè chi̍t-tè thia̍p chòe-hé, liân hong to chǹg bōe ji̍p--khì;

17lóng liân chòe-hé, liâm chòe chi̍t ê, bô lâng ōe-tàng kā in phah-khui.

18I phah-ka-chhiùⁿ ōe siā-chhut kng; i ê ba̍k-chiu chhin-chhiūⁿ thàu-chá ê ji̍t-kng.

19I ê chhùi thò͘-chhut hé-iām, phùn-chhut hé-chhiⁿ.

20I ê phīⁿ-khang chhèng-ian, chhin-chhiūⁿ tōa-tiáⁿ teh bo̍k-bo̍k-kún.

21I ê khì ōe tiám-to̍h thô͘-thòaⁿ, ū hé-iām tùi i ê chhùi siā-chhut.

22I ê ām-kún ū-la̍t; tú-tio̍h i--ê lóng kiaⁿ kah phi̍h-phi̍h-chhoah.

23I ê pak-tó͘-bah kiat-si̍t, liâm tī seng-khu, bōe-tàng kā i tín-tāng.

24I ê heng-khám tēng kah chhin-chhiūⁿ chio̍h-thâu, chhin-chhiūⁿ chio̍h-bō hiah tēng.

25I chi̍t-ē khí--lâi, ióng-sū lóng kiaⁿ-hiâⁿ, kiaⁿ kah sit-sîn.

26Lâng ēng kiàm chha̍k bōe ji̍p--khì, ēng chhiuⁿ, pio, chìⁿ mā lóng bōe.

27I khòaⁿ thih chòe ta-chháu, khòaⁿ tâng chòe àu--khì ê chhâ.

28Keng-chìⁿ bōe-tàng kā i heh-kiaⁿ kóaⁿ-cháu; i khòaⁿ hìⁿ-soh ēng ê chio̍h-thâu chòe chháu-iù-á.

29I khòaⁿ kùn-á chòe be̍h-kó, thí-chhiò chhiuⁿ khiang-khiang-kiò ê siaⁿ.

30I ê pak-tó͘-ē chhin-chhiūⁿ lāi ê hiā-phìⁿ; i kiâⁿ--kè ê só͘-chāi chhin-chhiūⁿ thih-pê pê--kè ê nōa-thô͘.

31I hō͘ chhim-ian chhin-chhiūⁿ tōa-tiáⁿ bo̍k-bo̍k-kún, hō͘ hái chhin-chhiūⁿ teh kún ê iû-tiáⁿ.

32I kiâⁿ--kè ê lō͘ hoat-kng, siû--kè ê chúi lóng khí pe̍h-pho.

33Tōe-chiūⁿ bô chi̍t ê siū-chō-bu̍t ōe-tàng kap i pí; i sím-mi̍h lóng m̄ kiaⁿ.

34I khòaⁿ-khin it-chhè kiông-béng ê tōng-bu̍t; i sī pah-siù chi ông.

← Chapter 40 Jump to: Chapter 42 →