Job 17

Chinese TTVR (現代台語譯本羅馬字版)

← Chapter 16 Jump to: Chapter 18 →

1Góa ê khùi beh tn̄g lah, ji̍t-chí teh-beh soah lah; góa ê bōng chō hó lah.

2Góa ê chiu-ûi lóng sī thí-chhiò góa ê lâng; góa só͘ khòaⁿ--tio̍h ê lâng lóng teh kek góa siū-khì.

3Kiû lí chhin-sin chòe góa ê tam-pó, nā bô, siáⁿ-lâng khéng chòe góa ê pó-chèng?

4Lí hong-ba̍t in ê sim, hō͘ in bô bêng-lí, só͘-í lí bōe hō͘ in khah iâⁿ góa.

5Lâng ūi-tio̍h ka-kī ê lī-ek chhut-bōe pêng-iú, i ê kiáⁿ-sun ba̍k-chiu ōe sit-bêng.

6Góa chiâⁿ-chòe lâng-lâng ê chhiàu-tâm; in tùi góa ê bīn phùi chhùi-nōa.

7Góa in-ūi iu-siong ba̍k-chiu bū; góa ê seng-khu siau-sán-lo̍h-bah.

8Chèng-ti̍t ê lâng khòaⁿ--tio̍h chin tio̍h-kiaⁿ; bô-chōe ê lâng ōe tùi bô kèng-ùi Siōng-tè ê lâng hoat siū-khì.

9Chèng-ti̍t ê lâng ōe kian-siú ka-kī só͘ kiâⁿ ê lō͘; chhiú chheng-khì ê lâng khùi-la̍t ōe ná ke-thiⁿ.

10Lín lóng koh tńg--lâi; lín tiong-kan góa chhē bô chi̍t ê ū tì-hūi ê lâng.

11Góa ê ji̍t-chí í-keng kè--khì; góa ê kè-ōe kap sim só͘ ì-ài--ê lóng siau-sit.

12In kóng mî--sî sī ji̍t--sî, kng í-keng kūn; kî-si̍t góa iáu tī o͘-àm tiong.

13Góa nā kî-thāi Im-hú chòe góa ê chhù, tī o͘-àm ê só͘-chāi pho͘ bîn-chhn̂g,

14góa nā tùi hûn-bōng kóng “lí sī góa ê lāu-pē”, tùi thâng kóng “lí sī góa ê lāu-bú, góa ê chí-bē”,

15án-ni góa ê ǹg-bāng tī tó-ūi? Góa ê ǹg-bāng siáⁿ-lâng khòaⁿ ōe tio̍h?

16Ǹg-bāng kiám ōe lo̍h-khì Im-hú? I kiám ōe kap góa chòe-tīn tī thô͘-tóe?

← Chapter 16 Jump to: Chapter 18 →