Job 21

Chinese TTVR (現代台語譯本羅馬字版)

← Chapter 20 Jump to: Chapter 22 →

1Iok-pek ìn Só-hoat kóng:

2Chhiáⁿ chù-ì thiaⁿ góa kóng-ōe; che chiah sī lín ōe-tàng hō͘ góa ê an-ùi.

3Chhiáⁿ nāi-sim thiaⁿ góa kóng; góa kóng-liáu, chiah chhut-chāi lín ki-chhì.

4Kiám kóng góa sī teh tùi lâng oàn-thàn? Góa tio̍h-kip kiám bô lí-iû?

5Lín chù-ì khòaⁿ góa, chiū ōe kiaⁿ--tio̍h, ēng chhiú ng-chhùi tiām--khì.

6Góa nā siūⁿ--tio̍h chiū kiaⁿ-hiâⁿ, kui seng-khu phi̍h-phi̍h-chhoah.

7Pháiⁿ-lâng sī-án-chóaⁿ oa̍h--teh, chia̍h tn̂g-hè-siū, koh ū-koân ū-sè?

8In kiáⁿ-sun boán-tông, koh chhin-ba̍k khòaⁿ-tio̍h hō͘-tāi ê sêng-chiū.

9In ê ka-têng an-ún bô kiaⁿ, Siōng-tè ê koáiⁿ mā bô phah in.

10In ê gû-káng thoân-chéng bô tn̄g, gû-bú siⁿ-kiáⁿ mā bô liû-sán.

11In hō͘ gín-á chū-iû thit-thô, chhin-chhiūⁿ iûⁿ-kûn; in ê kiáⁿ-jî sì-kòe tiô-thiàu.

12In hô lin-long-kó͘ kap khîm chhiùⁿ-koa, tè phín-á kap siau ê siaⁿ hoan-ho͘.

13In it-seng hēng-hok, sū-sū heng-thong, koh pêng-an lo̍h Im-hú.

14In tùi Siōng-tè kóng: Mài chhap--goán! Goán bô ài chai lí ê tō-lō͘.

15Choân-lêng-chiá sī siáⁿ-lâng, goán ná tio̍h ho̍k-sāi I? Goán tùi I kî-kiû ū sím-mi̍h lī-ek?

16In chú-tiuⁿ hoân-êng sī khò ka-kī ê khùi-la̍t tit--tio̍h-ê. Pháiⁿ-lâng ê ì-liām si̍t-chāi oh liáu-kái.

17Pháiⁿ-lâng ê teng kiám bat hoa--khì? Chai-hō ū jōa-chōe piàn lîm-kàu in? Siōng-tè ê siū-khì kiám bat hō͘ in kan-khó͘?

18In ū jōa-chōe piàn chhin-chhiūⁿ hō͘ hong chhe-sòaⁿ ê chháu-á-iù? Chhin-chhiūⁿ hō͘ kông-hong chhe--khì ê chho͘-khng?

19Lín kóng: Siōng-tè in-ūi lāu-pē ê chōe-kò hêng-hoa̍t i ê kiáⁿ-jî. M̄-kú góa siūⁿ, m̄-ta̍t-tio̍h i pún-sin siū pò-èng, hō͘ i chai ka-kī ê chōe;

20hō͘ i chhin-ba̍k khòaⁿ-kìⁿ ka-kī pāi-hoāi, pún-sin sêng-siū Choân-lêng-chiá ê siū-khì.

21Lâng it-tàn sí--khì, kiám ōe-tàng koh koan-sim ke-lāi ê tāi-chì?

22Liân thiⁿ-téng ê sù-chiá to siū Siōng-tè sím-phòaⁿ, siáⁿ-lâng ōe-tàng chiong tì-sek kà-sī I?

23Ū lâng kàu sí kiān-khong ióng-chòng, it-seng pêng-an bô-sū;

24i ê cheng-le̍k chhiong-chiok, kun-kut ióng-chòng.

25Ū lâng kàu sí, sim-sîn thòng-khó͘, it-seng m̄-bat hióng-siū hok-khì.

26In lóng siâng-khoán kui-thó͘, hō͘ thâng khàm-ba̍t.

27Góa chai lín teh siūⁿ sím-mi̍h, mā chai lín hām-hāi góa ê im-bô͘.

28Lín mn̄g: Tōa-jîn-bu̍t ê chhù tī tó-ūi? Pháiⁿ-lâng tòa ê só͘-chāi tī tó-ūi?

29Lín kiám m̄-bat mn̄g kè-lō͘ ê lâng? Kiám bô chiap-siū in só͘ kóng--ê?

30Pháiⁿ-lâng tī chai-lān ê sî pêng-an bô-sū, tī tōa siū-khì ê ji̍t tit-tio̍h tô-thoat.

31I só͘ kiâⁿ--ê, siáⁿ-lâng ōe tng-bīn kā i chí-chek? I só͘ chòe--ê, siáⁿ-lâng ōe kā i pò-èng?

32I ōe hō͘ lâng kng-khì bōng-tōe, koh ū lâng kò͘-siú i ê bōng.

33Bâi-chòng ê thô͘ tùi i mā kam-tiⁿ; sàng-chòng ê lâng chêng-kiâⁿ-āu-tè sǹg bōe liáu.

34Lín ê an-ùi lóng sī hu-ké; lín ê ìn-tap lóng bô ì-sù.

← Chapter 20 Jump to: Chapter 22 →