Job 29

Chinese TTVR (現代台語譯本羅馬字版)

← Chapter 28 Jump to: Chapter 30 →

1Iok-pek kè-sio̍k kóng:

2Góa jōa-á-ni̍h ài tò-tńg-khì í-chêng ê sòe-goa̍t, Siōng-tè pó-siú góa ê ji̍t-chí.

3Hit-sî I ê teng chiò tī góa ê thâu-khak, góa khò I ê kng kiâⁿ-kè o͘-àm.

4Chhin-chhiūⁿ góa chòng-liân ê sî, Siōng-tè kap góa chhin-bi̍t khiā-khí.

5Hit-sî Choân-lêng-chiá iáu kap góa tông-chāi, góa ê kiáⁿ-jî tī góa ê sì-ûi;

6hit-sî góa kiâⁿ--kè ê lō͘ ū lin lim bōe chīn, chio̍h-pôaⁿ ūi-tio̍h góa chhut iû chhin-chhiūⁿ khoe-chúi teh lâu.

7Hit-sî góa kiâⁿ kàu siâⁿ-mn̂g, tī chhī-tiûⁿ-kháu chē góa ê chō-ūi,

8siàu-liân-lâng khòaⁿ--tio̍h chiū siám-khui, lāu-lâng peh khí-lâi khiā.

9Léng-siù thêng-chí kóng-ōe, ēng chhiú ng in ê chhùi;

10kùi-cho̍k bô chhut-siaⁿ, tiām-tiām bô kóng-ōe.

11Thiaⁿ-kìⁿ góa kóng-ōe--ê, lóng chheng-chàn góa; khòaⁿ-tio̍h góa--ê, lóng o-ló góa.

12Góa kái-kiù ai-kiû ê sàn-chhiah-lâng, pang-chān bô i-óa ê ko͘-jî.

13Teh-beh sí ê lâng kā góa chiok-hok; góa hō͘ kóaⁿ-hū ê sim hoaⁿ-hí chhiùⁿ-koa.

14Góa ēng kong-gī chòe saⁿ chhēng, ēng chèng-ti̍t chòe gōa-phàu moa, chòe bō tì.

15Góa chòe bông-jîn ê ba̍k-chiu, chòe kha-pái ê lâng ê kha.

16Góa chòe sàn-chhiah-lâng ê pē kā in chiàu-kò͘, ūi-tio̍h siⁿ-hūn-lâng piān-hō͘.

17Góa phah-chhùi pháiⁿ-lâng ê gê-chô, chhiúⁿ in ê chhùi-khí só͘ kā ê chia̍h-mi̍h.

18Góa chiū kóng, “Góa ōe sí tī ka-kī ê chhù-lāi; góa ê ji̍t-chí ōe ke-thiⁿ chhin-chhiūⁿ soa hiah chōe.

19Góa ê kun chhun kàu chúi-piⁿ, lō͘-chúi kui-mî lo̍h tī góa ê ki.

20Góa ê cheng-le̍k put-sî móa-móa; góa ê keng tī góa ê chhiú put-sî ân-ân.”

21Lâng pek-chhiat thèng-hāu góa kóng-ōe, chēng-chēng tán góa ê chí-tō.

22Góa kóng-liáu, in chiū lóng tiām--khì; góa ê ōe chhin-chhiūⁿ kam-lō͘ tih tī in téng-bīn.

23In thèng-hāu góa chhin-chhiūⁿ thèng-hāu hō͘-chúi; in ê chhùi tōa khui chhin-chhiūⁿ him-bō͘ chhun-thiⁿ ê hō͘.

24In sit-bāng ê sî, góa kā in an-ùi; góa ê chhiò-iông hō͘ in tit-tio̍h kó͘-lē.

25Góa chòe siú-léng chí-sī in tio̍h kiâⁿ ê lō͘; góa chhin-chhiūⁿ ông teh chhōa i ê kun-tūi, tī in ai-siong ê sî kā in an-ùi.

← Chapter 28 Jump to: Chapter 30 →