Job 16

Chinese TTVR (現代台語譯本羅馬字版)

← Chapter 15 Jump to: Chapter 17 →

1Iok-pek ìn Í-lī-hoat kóng:

2Chit-khoán ōe, góa í-keng thiaⁿ chin chōe; lín ê an-ùi tian-tò hō͘ lâng kan-khó͘.

3Chit-khoán liâng-khiang-ōe, lí kóng soah--bē? Sī sím-mi̍h kek lí ìn bōe thêng?

4Lín nā tiàm tī góa ê chhù-kéng, góa mā ōe-hiáu kóng lín chit-khoán ōe, mā ōe kóng kui-kōaⁿ ê ōe kong-kek lín, koh ōe tùi lín hàiⁿ-thâu.

5M̄-kú góa ōe ēng chhùi kā lín kó͘-lē, ēng chhùi-tûn kā lín an-ùi, kiám-khin lín ê khó͘-thàng.

6Góa nā kóng-ōe, khó͘-thàng iû-goân bōe kiám-khin; góa nā chēng-chēng, khó͘-thàng kiám ōe lī-khui góa?

7Taⁿ Siōng-tè ah, lí hō͘ góa iu-khó͘ ià-siān, hō͘ góa ka-phò-jîn-bông.

8Lí ûi-khùn góa, te̍k-tùi góa, hō͘ góa siau-sán-lo̍h-bah, hō͘ lâng tng-bīn chí-chek góa ū-chōe.

9Lí tùi góa hoat siū-khì, thiah-chhùi góa, khún-pek góa, tùi góa kā-gê-chhiat-chhí; góa ê tùi-te̍k ēng chha̍k--lâng ê ba̍k-sîn gîn góa.

10In khui-chhùi thí-chhiò góa, siàn góa ê chhùi-phóe bú-jio̍k góa, liân-ha̍p kong-kek góa.

11Siōng-tè kā góa kau hō͘ put-gī ê lâng, chiong góa hiat hō͘ pháiⁿ-lâng.

12Góa pêng-an bô-sū ê sî, I hut-jiân kā góa kòng-chhùi, tīⁿ góa ê ām-kún, kā góa siak kah chhùi-chhùi, koh chhāi góa chòe I siā-chìⁿ ê bo̍k-phiau.

13I chân-jím ēng chìⁿ tùi sì-bīn siā góa, siā-phòa góa ê chōng-hú; táⁿ-chiap phùn kah móa-sì-kòe.

14I chhin-chhiūⁿ ióng-sū chhiong-lâi kong-kek góa, chi̍t-piàn koh chi̍t-piàn phah-siong góa.

15Góa kā môa-saⁿ chhēng-tiâu-tiâu; góa ê thâu-hia̍h phak tī thô͘-kha.

16Góa ê ba̍k-chiu khàu kah ham-ham, ba̍k-chiu-phê tńg o͘;

17m̄-kú góa ê chhiú bô hoān kiông-pō, góa ê kî-tó sûn-chin.

18Tōe ah, m̄-thang khàm-ba̍t góa só͘ lâu ê huih, m̄-thang chó͘-chí góa ê âu-kiò.

19Khòaⁿ ah, taⁿ góa ê chèng-jîn tī thiⁿ--ni̍h; góa ê pó-chèng tī téng-bīn.

20Góa ê pêng-iú thí-chhiò góa; góa ǹg Siōng-tè ba̍k-sái lâu bōe thêng.

21Góa jōa-á-ni̍h ǹg-bāng tī Siōng-tè kap lâng ê tiong-kan ū chhâi-phòaⁿ-chiá, chhin-chhiūⁿ ū lâng tī lâng kap i ê chhù-piⁿ tiong-kan choh chhâi-phòaⁿ.

22In-ūi koh kè bô kúi nî, góa ōe kiâⁿ-ji̍p bōe koh tò-tńg ê lō͘.

← Chapter 15 Jump to: Chapter 17 →