Job 36

Chinese TTVR (現代台語譯本羅馬字版)

← Chapter 35 Jump to: Chapter 37 →

1Í-lī-hō͘ koh sòa-chiap kóng:

2Lí tán--chi̍t-ē, góa beh chí-sī lí, in-ūi góa iáu ū ōe beh thòe Siōng-tè kóng.

3Góa beh tùi sì-hng chhú tì-sek, chèng-bêng góa ê Chhòng-chō-chú sī tio̍h.

4Góa ê ōe si̍t-chāi, bô pe̍h-chha̍t, ū tì-sek chiâu-pī--ê khiā tī lí bīn-chêng.

5Siōng-tè ū tōa koân-lêng, bô khòaⁿ-khin lâng; I ê tì-hūi koân, lêng-le̍k tōa.

6I bô hō͘ pháiⁿ-lâng oa̍h--lo̍h-khì; I kong-pêng tùi-thāi khùn-khó͘ ê lâng.

7I ê ba̍k-chiu put-sî khòaⁿ-kò͘ gī-lâng, hō͘ in kap kun-ông chòe-hé chē ông-ūi, tit-tio̍h chun-êng kàu éng-oán.

8Lâng nā hō͘ só-liān liān--teh, hō͘ khó͘-lān ê soh tîⁿ--tio̍h,

9án-ni sī Siōng-tè teh chí-sī in chai ka-kī ê só͘-chòe, í-ki̍p in só͘ hoān ê tāng-chōe.

10I koh khui in ê hī-khang siū kà-sī, chí-sī in tio̍h hóe-kái, lī-khui chōe-ok.

11In nā sūn-thàn lâi ho̍k-sāi I, chiū ōe ji̍t-ji̍t heng-thong, nî-nî an-lo̍k.

12In nā m̄ sūn-thàn, ōe hō͘ to-kiàm thâi, in-ūi bû-ti lâi sí.

13Sim-lāi bô Siōng-tè ê lâng put-sî teh siū-khì; in siū chek-hoa̍t mā m̄ kiû Siōng-tè pang-chān.

14In ōe tī siàu-liân ê sî chiū sí, tī kiàn-siàu tiong tn̄g-khùi.

15Siōng-tè thong-kè khó͘-lān kái-kiù siū-khó͘ ê lâng, ēng chai-lān hō͘ in chhíⁿ-ngō͘.

16Siōng-tè ài-beh kiù lí thoat-chhut chai-lān, chhōa lí kàu khui-khoah chū-iû ê só͘-chāi, koh pâi-móa hong-sēng ê chia̍h-mi̍h tī lí ê toh-téng.

17Chóng-sī pháiⁿ-lâng èng-tit ê hêng-hoa̍t taⁿ lîm-kàu lí; lí bōe-tàng thoat-lī kong-gī ê sím-phòaⁿ.

18M̄-thang in-ūi siū-khì tì-kàu lí bú-bān Siōng-tè, mā m̄-thang in-ūi châi-hù ê ín-iú kiâⁿ phian--khì.

19Lí ê châi-hù tùi lí kiám ū lī-ek? Lí ê koân-le̍k tùi lí kiám ū pang-chān?

20M̄-thang khat-bō͘ àm-mî, in-ūi hit-sî lâng tī in tòa ê só͘-chāi siū siau-bia̍t.

21Tio̍h kín-sīn, m̄-thang choán-ǹg chōe-ok, in-ūi lí soán-te̍k chōe-ok chiah siū-tio̍h khó͘-lān.

22Khòaⁿ leh, Siōng-tè ê koân-lêng hiah-ni̍h úi-tāi; ū tó chi̍t ê tō-su chhin-chhiūⁿ I?

23Siáⁿ-lâng ōe-tàng chí-tēng I tio̍h chòe ê sū? Siáⁿ-lâng ōe-tàng kā I kóng “Lí chòe m̄-tio̍h”?

24Lâng lóng chhiùⁿ-koa o-ló I, lí mā tio̍h ōe-kì-tit chheng-chàn I ê chok-ûi.

25Só͘-ū ê lâng lóng ū khòaⁿ-tio̍h I ê só͘-chòe, m̄-kú in chí-ū ōe-tàng tùi hn̄g-hn̄g khòaⁿ.

26Siōng-tè si̍t-chāi úi-tāi, lán bô hoat-tō͘ liáu-kái; I ê hè-siū bû-kiông-chīn.

27I khip chi̍t-tih chi̍t-tih ê chúi, hō͘ in pìⁿ-chòe hûn-bū, kek-hō͘,

28chiū tùi thiⁿ lo̍h chhiong-chiok ê hō͘-chúi, hō͘ sè-kan chèng-lâng.

29Siáⁿ-lâng ōe bêng-pe̍k hûn án-chóaⁿ thí-khui, lûi ê siaⁿ án-chóaⁿ tùi Siōng-tè khiā-khí ê só͘-chāi hoat-chhut?

30I tùi I ê chiu-ûi hoat-chhut sih-nà, siā kàu hái-tóe.

31I ēng chiah-ê tī-lí sè-kan-lâng, koh sù in hong-sēng ê chia̍h-mi̍h.

32I chhiú--ni̍h the̍h sih-nà, bēng-lēng i siā beh siā ê bo̍k-phiau.

33Lûi ê siaⁿ piáu-bêng I beh lâi, liân cheng-siⁿ to chai I teh-beh lâi.

← Chapter 35 Jump to: Chapter 37 →