Job 31

Chinese TTVR (現代台語譯本羅馬字版)

← Chapter 30 Jump to: Chapter 32 →

1Góa kap góa ê ba̍k-chiu li̍p-iok, bô beh ēng siâ-liām khòaⁿ cha-bó͘ gín-á.

2Siōng-tè tùi thiⁿ-téng chí-tēng ê hūn-gia̍h sī sím-mi̍h? Choân-lêng-chiá tùi téng-bīn hun-phòe ê sán-gia̍p sī sím-mi̍h?

3Kiám m̄-sī hō͘ chai-lān lîm-kàu put-gī ê lâng, chai-hō kàng hō͘ chòe pháiⁿ ê lâng?

4Siōng-tè kiám m̄-sī teh kàm-chhat góa ê lō͘, sǹg góa múi chi̍t ê kha-pō͘?

5Góa nā ū kap hu-ké tàu-tīn kiâⁿ, kha kip beh tè khúi-chà,

6Siōng-tè thang ēng kong-pîⁿ ê thian-phêng chhìn góa, I chiū chai góa ê sûn-choân.

7Góa ê kha-pō͘ nā phian-lī chiàⁿ-lō͘, góa ê sim in-ūi ba̍k-chiu só͘ khòaⁿ--ê siū bê-he̍k, góa ê chhiú bak-tio̍h lâ-sâm,

8goān góa só͘ iā--ê, hō͘ lâng chia̍h--khì, só͘ chèng--ê, hō͘ lâng khau--khì.

9Góa ê sim nā hō͘ pa̍t-lâng ê bó͘ ín-iú--khì, á-sī góa bih tī chhù-piⁿ ê mn̂g teh tán,

10goān góa ê bó͘ kā lâng oe-bō, pa̍t-lâng kap i tâng-pâng;

11in-ūi án-ni chòe sī chin kiàn-siàu ê tāi-chì, sī sím-phòaⁿ-koaⁿ eng-kai pān ê chōe;

12che sī sio kàu Bia̍t-bông ê tōa-hé, chiong góa siu-sêng--ê lóng sio-liáu-liáu.

13Góa ê lâm-po̍k lú-pī ài góa ūi-tio̍h in chú-chhî kong-tō, góa nā m̄ chhap in,

14Siōng-tè khí-lâi sím-phòaⁿ ê sî, góa beh án-chóaⁿ? I sím-mn̄g, góa beh án-chóaⁿ ìn?

15Siōng-tè chō góa, kiám m̄-sī mā chō in? Chō góa kap in tī bú-thai--ê kiám m̄-sī kâng chi̍t ūi?

16Góa nā bû-sī sàn-chhiah-lâng ê su-iàu, á-sī hō͘ kóaⁿ-hū khàu kah ba̍k-chiu hoe,

17góa nā ka-kī chia̍h, bô pun hō͘ ko͘-jî —

18kî-si̍t, tùi siàu-liân ê sî góa chiū chhin-chhiūⁿ lāu-pē ū teh iúⁿ-chhī ko͘-jî, tùi chhut bú-thai góa chiū ū teh chiàu-kò͘ kóaⁿ-hū —

19góa nā khòaⁿ-tio̍h lâng kôaⁿ kah beh sí, sàn-chhiah-lâng bô gōa-phàu thang kah;

20góa nā bô the̍h góa ê iûⁿ-mn̂g hō͘ lâng moa thang tit-tio̍h un-loán, hō͘ i tùi sim-tóe kā góa kám-siā;

21góa nā chai ka-kī tī hoat-têng ū koân-sè, chiū khí-chhiú kong-kek ko͘-jî;

22goān góa ê chhiú-kut tùi keng-kah-thâu lut--lo̍h-khì, chhiú ê ē-chat tùi chhiú-āu-khiau tn̄g--khì.

23In-ūi tùi Siōng-tè lâi ê chai-hō hō͘ góa kiaⁿ-hiâⁿ; I ê ui-giâm hō͘ góa m̄-káⁿ chòe chiah-ê tāi-chì.

24Góa nā óa-khò n̂g-kim, ēng sûn-kim chòe khò-soaⁿ;

25góa nā in-ūi châi-bu̍t hù-jū, thàn tōa-chîⁿ lâi hoaⁿ-hí;

26góa nā in-ūi ji̍t hoat-kng, ge̍h bêng-liāng,

27soah àm-tiong siū ín-iú, ēng in chòe ngó͘-siōng lâi pài;

28che mā-sī sím-phòaⁿ-koaⁿ eng-kai pān ê chōe, in-ūi án-ni chòe sī pōe-poān thiⁿ-téng ê Siōng-tè.

29Góa m̄-bat in-ūi khòaⁿ-tio̍h oàn-hūn góa ê lâng siū chai-lān lâi hoaⁿ-hí, ūi-tio̍h in tú-tio̍h chai-hō lâi tek-ì.

30Góa m̄-bat iông-ún góa ê chhùi hoān-chōe, chiù-chó͘ in sí.

31Goán chhù-lāi ê lâng lóng án-ni kóng: “M̄-bat ū lâng lâi Iok-pek chia bô chia̍h kàu pá.”

32Góa m̄-bat hō͘ chhut-gōa-lâng tī gōa-kháu khùn, mn̂g put-sî khui-khui beh chiap-thāi in.

33Góa m̄-bat chhin-chhiūⁿ it-poaⁿ-lâng am-khàm kè-sit, kā góa ê chōe-kò chhàng tī sim-lāi.

34Góa m̄-bat ūi-tio̍h kiaⁿ kong-chiòng ê phoe-phêng, kiaⁿ chhin-cho̍k ê ki-chhì, soah bô chhut-siaⁿ, m̄-káⁿ chhut-mn̂g.

35Góa jōa-á-ni̍h ǹg-bāng ū chi̍t ūi ōe thiaⁿ góa kóng! Che sī góa chòe-āu ê sin-sò͘; goān Choân-lêng-chiá ìn-tap góa! Nā bô, khòng-kò-chiá tio̍h chhut-lâi siá góa ê chōe-chn̄g,

36góa it-tēng beh kā phāiⁿ tī keng-kah-thâu, chòe hoa-koan tì tī thâu-khak téng.

37Góa beh tùi Siōng-tè soat-bêng góa it-chhè ê kiâⁿ-ta̍h, chhin-chhiūⁿ ông-chú ióng-kám khiā tī I bīn-chêng.

38Góa ê chhân-hn̂g nā chhut-siaⁿ kò góa, lôe-kau chòe-hé thî-khàu;

39góa nā bô la̍p-chîⁿ pe̍h-pe̍h chia̍h chhân-hn̂g ê chhut-sán, á-sī hāi hn̂g-chú gêng--sí,

40goān chhì-á hoat-siⁿ tāi-thòe sió-be̍h, cha̍p-chháu hoat-siⁿ tāi-thòe tōa-be̍h. Iok-pek ê ōe kàu chia kiat-sok.

← Chapter 30 Jump to: Chapter 32 →