Job 37

Chinese TTVR (現代台語譯本羅馬字版)

← Chapter 36 Jump to: Chapter 38 →

1In-ūi án-ni góa ê sim pho̍k-pho̍k-chhéng, sim-chōng kiông-beh thiàu--chhut-lâi.

2Tio̍h chù-ì thiaⁿ Siōng-tè ê siaⁿ, thiaⁿ I ê chhùi só͘ chhut chhin-chhiūⁿ lûi teh tân ê siaⁿ.

3I ê sih-nà tùi thiⁿ chit-pêng siā kàu hit-pêng; sih-nà ê kng chiò kàu thiⁿ-piⁿ-hái-kak;

4sòa-chiap ū lōng-lōng-háu ê siaⁿ; I ui-giâm ê siaⁿ chhin-chhiūⁿ lûi teh tân, sih-nà it-ti̍t sih bô-thêng.

5Siōng-tè hoat-chhut tōa koh kî-īⁿ ê siaⁿ; I chòe tōa-sū, lán bōe-tàng liáu-kái.

6I bēng-lēng seh lo̍h tī tōe-chiūⁿ, mā kiò tōa-hō͘ piàⁿ-lo̍h tāi-tōe.

7I kiò lâng lóng thêng-chí kang-chok, hō͘ lâng thang chai I ê chok-ûi.

8Pah-siù lóng ji̍p hia̍t, bih tī in ê tōng-lāi.

9Tōa-hong tùi lâm-pêng thàu--lâi; peng-léng ê khì tùi pak-hng chhe--lâi.

10Siōng-tè pûn-khùi, chúi chiū kian-tàng; kang-hô ê chúi lóng kiat-peng.

11I hō͘ ba̍t-hûn chek-móa sip-khì, tùi hûn siā-chhut sih-nà.

12I chiàu ka-kī ê kè-ōe hō͘ hûn tńg-se̍h, hō͘ in tī tōe-chiūⁿ oân-sêng I chí-tēng ê kang-chok.

13I hō͘ chiah-ê tāi-chì hoat-seng, lóng sī ūi-tio̍h beh chek-hoa̍t á-sī hián-sī chû-ài.

14Iok-pek ah, chù-ì thiaⁿ, an-chēng lâi siūⁿ Siōng-tè kî-biāu ê chok-ûi.

15Siōng-tè án-chóaⁿ bēng-lēng chiah-ê hûn, án-chóaⁿ hō͘ sih-nà tùi hûn siā--chhut-lâi, lí kiám chai?

16Hûn án-chóaⁿ tī khong-tiong chek chòe-tui teh pe, hit-ūi Choân-tì-chiá kî-biāu ê chok-ûi, lí kiám chai?

17Lâm-hong án-chóaⁿ hō͘ tāi-tōe tiām-chēng, kā lí chhēng ê saⁿ hip-sio, lí kiám chai?

18Lí kiám ōe-tàng kap Siōng-tè chòe-hé pho͘ kiong-chhong, hō͘ i chhin-chhiūⁿ chù--chhut-lâi ê tâng-kiàⁿ hiah tēng?

19Goán chin han-bān, bōe-hiáu sin-sò͘, lí tio̍h kà goán eng-kai tùi I kóng sím-mi̍h.

20Kiám ū lâng káⁿ tùi I kóng beh kap I kóng-ōe? Bô lâng hiah gōng ka-kī beh thó-sí.

21Taⁿ, lâng khòaⁿ bōe tio̍h kiong-chhong chhàn-lān ê kng; hong chi̍t-ē chhe--kè, thiⁿ chiū chheng-chhái.

22Chhàn-lān ê kng tùi pak-hng chhut--lâi; Siōng-tè ui-giâm thang kiaⁿ-ùi.

23Choân-lêng-chiá, lán chhē bōe tio̍h; I ū tōa lêng-le̍k koh ū kong-pêng, chhiong-móa kong-gī, bōe ap-chè lâng.

24Só͘-í, lâng kèng-ùi I; I bōe khòaⁿ-tāng hiah-ê ka-kī siūⁿ-chòe ū tì-hūi ê lâng.

← Chapter 36 Jump to: Chapter 38 →