Job 27

Chinese TTVR (現代台語譯本羅馬字版)

← Chapter 26 Jump to: Chapter 28 →

1Iok-pek kè-sio̍k kóng:

2Siōng-tè kū-choa̍t góa ê koân-lī; Choân-lêng-chiá hō͘ góa sim-sîn thòng-khó͘. Góa chí éng-oa̍h ê Siōng-tè chiù-chōa:

3Góa ê oa̍h-miā nā iáu tī góa ê lāi-bīn, Siōng-tè ê khùi nā iáu tī góa ê phīⁿ-khang,

4góa ê chhùi-tûn choa̍t-tùi m̄ kóng put-gī, góa ê chi̍h m̄ kóng khúi-chà.

5Góa choa̍t-tùi m̄ khòaⁿ lín chòe tio̍h; góa kàu sí mā kian-chhî ka-kī sûn-choân chèng-ti̍t.

6Góa kian-chhî góa sī tio̍h, m̄ hòng-khì; góa ê liông-sim chi̍t-sì-lâng bōe chek-pī góa.

7Te̍k-tùi góa--ê tio̍h siū pháiⁿ-lâng ê cho-gū; kong-kek góa--ê tio̍h siū put-gī ê lâng ê pò-èng.

8Bô kèng-ùi Siōng-tè ê lâng siū siau-bia̍t, sìⁿ-miā hō͘ Siōng-tè chhú--khì ê sî, iáu ū sím-mi̍h ǹg-bāng?

9Hoān-lān lîm-kàu ê sî, Siōng-tè kiám ōe thiaⁿ i ê kiû-kiò?

10I kiám ōe in-ūi Choân-lêng-chiá lâi hoaⁿ-hí, kiám ōe sî-siông kiû-kiò Siōng-tè?

11Góa beh kà-sī lín Siōng-tè koân-lêng ê chok-ûi; Choân-lêng-chiá ê só͘-chòe, góa bōe am-khàm.

12Chiah-ê, lín lóng ū khòaⁿ--tio̍h, ná iáu-teh kóng hiah-ê gōng-ōe?

13Che sī Siōng-tè hō͘ pháiⁿ-lâng ê pò-èng, sī Choân-lêng-chiá pun hō͘ kiông-pō ê lâng ê sán-gia̍p.

14Sui-jiân i ê kiáⁿ-jî chin chōe, in lóng ōe sí tī to-ē; i ê hō͘-tāi bô thang chia̍h kàu pá.

15Só͘ chhun ê lâng in-ūi un-e̍k siū bâi-chòng; in ê kóaⁿ-hū beh khàu, mā khàu bōe chhut--lâi.

16In sui-jiân chek-chū gûn chhin-chhiūⁿ thô͘-hún hiah chōe, thia̍p saⁿ-á-khò͘ chhin-chhiūⁿ thô͘-tui hiah koân;

17chòe in thia̍p, gī-lâng beh chhēng in ê saⁿ, bû-ko͘ ê lâng beh pun in ê gûn.

18In khí ê chhù chhin-chhiūⁿ ti-tu ê bāng, chhin-chhiūⁿ siú-bōng ê lâng tah ê liâu-á.

19In khì khùn ê sî hó-gia̍h, châi-hù iáu tī--teh, chi̍t-ē khùn-chhíⁿ ta̍k-hāng lóng bô--khì.

20Khióng-pò͘ chhin-chhiūⁿ tōa-chúi tī ji̍t--sî kā in chhiong--khì, chhin-chhiūⁿ tōa-hong tī mî--sî kā in sàu--khì.

21Tang-hong chi̍t-ē chhe, in chiū bô--khì, kā in chhe lī-khui pún só͘-chāi.

22Kông-hong kā in sàu, lóng bô liû-chêng; in piàⁿ-miā tô-cháu beh thoat-lī i ê ui-le̍k.

23Kông-hong tùi in phah-pho̍k-á, kā in thí-chhiò, kóaⁿ in lī-khui pún só͘-chāi.

← Chapter 26 Jump to: Chapter 28 →