Job 9

Chinese TTVR (現代台語譯本羅馬字版)

← Chapter 8 Jump to: Chapter 10 →

1Iok-pek ìn Pí-le̍k-ta̍t kóng:

2Góa chai tāi-chì khak-si̍t sī án-ni; lâng tī Siōng-tè bīn-chêng ná ōe-tàng sǹg-chòe gī?

3Lâng nā beh kap I cheng-lūn, chheng hāng mā bô hoat-tō͘ ìn chi̍t hāng.

4Siōng-tè ū tì-hūi, I ê khùi-la̍t chin tōa; siáⁿ-lâng tùi-khòng I, bōe siū siong-hāi?

5I kā soaⁿ sóa-cháu, soaⁿ mā iáu m̄ chai; I chi̍t-ē siū-khì, soaⁿ chiū pang--lo̍h-khì.

6I hō͘ tōe tín-tāng lī-khui goân-ūi; tāi-tōe ê thiāu mā iô-choah.

7I bēng-lēng ji̍t-thâu, ji̍t-thâu chiū bô chhut--lâi; I hong-ba̍t chhiⁿ-sîn, chhiⁿ-sîn chiū bô hoat-kng.

8I ka-kī thí-khui thiⁿ, kiâⁿ tī hái-éng ê téng-bīn.

9I chhòng-chō Pak-táu, Chham-chhiⁿ, Báu-chhiⁿ, kap lâm-hng ê seng-chō.

10I chòe ê tāi-chì tōa kah bōe chhek-to̍k--tit; I kiâⁿ ê kî-sū chōe kah sǹg bōe liáu.

11I tùi góa chia keng-kè, góa bô khòaⁿ--tio̍h; I kiâⁿ--kè-khì, góa mā m̄ chai.

12I the̍h--khì, siáⁿ-lâng ōe-tàng chó͘-tòng? Siáⁿ-lâng káⁿ mn̄g I: Lí teh chòe sím-mi̍h?

13Siōng-tè bōe siu-hôe I ê siū-khì; liân hû-chō͘ hái-koài La-hap-pek --ê, mā khut-ho̍k tī I ē-bīn.

14Án-ni, góa ná káⁿ ìn I, á-sī ēng sím-mi̍h ōe kap I cheng-piān?

15Góa sui-jiân bû-ko͘, mā m̄-káⁿ ìn I, chí-ū tùi sím-phòaⁿ góa--ê kiû-un.

16Góa nā kiû-kiò I, chiū-sī-kóng I ū ìn góa, góa mā m̄ sìn I ōe thiaⁿ góa ê siaⁿ.

17In-ūi I ēng tōa-hong phah-chhùi góa, bô-iân-bô-kò͘ ke-thiⁿ góa ê chhòng-siong.

18I m̄-chún góa chhoán chi̍t ê khùi, hō͘ góa siū-chīn khó͘-chhó͘.

19Beh kóng khùi-la̍t, i siōng kiông-béng; beh kóng sím-phòaⁿ, siáⁿ-lâng káⁿ thoân I chhut-têng?

20Góa sui-jiân bû-ko͘, góa ka-kī ê chhùi mā ōe tēng góa ê chōe; góa sui-jiân bô thang chí-chek, I mā ōe chèng-bêng góa chhò-gō͘.

21Góa sui-jiân chheng-pe̍k, ū sím-mi̍h lō͘-ēng? Góa oa̍h--lo̍h-khì mā bô sím-mi̍h ì-sù.

22Sím-mi̍h lóng siâng-khoán; só͘-í góa kóng: Chèng-ti̍t--ê kap choh-pháiⁿ--ê, I lóng châu-bia̍t.

23Lâng nā in-ūi chai-hō hut-jiân sí, bû-ko͘ ê lâng nā tú-tio̍h chai-lān, I kā in thí-chhiò.

24Siōng-tè chiong sè-kài kau tī pháiⁿ-lâng ê chhiú; I ng sím-phòaⁿ-koaⁿ ê ba̍k-chiu; che nā m̄-sī I chòe--ê, bô sī siáⁿ-lâng?

25Góa ê ji̍t-chí teh kè chin kín, chin kín kè--khì, bô hióng-siū tio̍h sím-mi̍h hok-khì;

26chin kín kè--khì chhin-chhiūⁿ khoài-théng; chhin-chhiūⁿ eng-chiáu chin kín chhiong lo̍h-khì la̍k chia̍h-mi̍h.

27Góa nā kóng beh chiong góa ê ai-oàn pàng bōe-kì--tit, chiong iu-iông pìⁿ-chòe chhiò-iông,

28góa iû-goân ūi-tio̍h góa chiah-ê khó͘-lān kiaⁿ-hiâⁿ; in-ūi góa chai lí bōe khòaⁿ góa chòe bô-chōe.

29Góa kì-jiân ōe siū tēng-chōe, góa ná tio̍h khang-khang tio̍h-bôa?

30Góa nā ēng sat-bûn sóe seng-khu, ēng kiⁿ sóe-chhiú,

31lí it-tēng ōe kā góa hiat-lo̍h khiⁿ-kau, liân góa ê saⁿ to ōe iàm-ò͘ⁿ góa.

32Siōng-tè kap góa bô siâng-khoán, I m̄-sī sè-kan-lâng; góa bōe-tàng ìn I, kap I khì hoat-têng tùi-chí.

33Goán tiong-kan bô chhâi-phòaⁿ-chiá, thang hō͘ goán siang-hong lóng ōe ho̍k.

34Goān Siōng-tè bô koh ēng koáiⁿ-á hêng-hoa̍t góa, bô ēng I ê ui-giâm hō͘ góa kiaⁿ;

35góa chiū bô kiaⁿ, tōa-táⁿ hoat-giân; chóng-sī góa chai góa m̄-sī chit-khoán lâng.

← Chapter 8 Jump to: Chapter 10 →