Job 24

Chinese TTVR (現代台語譯本羅馬字版)

← Chapter 23 Jump to: Chapter 25 →

1Choân-lêng-chiá sī-án-chóaⁿ bô beh tēng sím-phòaⁿ ê ji̍t? Bat I ê lâng sī-án-chóaⁿ khòaⁿ bōe tio̍h I ê ji̍t?

2Ū lâng î-sóa tōe-kài, chhiúⁿ kui-kûn ê cheng-siⁿ khì chhī.

3In kā ko͘-jî ê lû khan--khì, lia̍h kóaⁿ-hū ê gû chòe tí-ah.

4In pak-toa̍t sàn-chhiah-lâng ê koân-lī; pek kan-khó͘-lâng tô-bông bih--khí-lâi.

5Sàn-chhiah-lâng chhin-chhiūⁿ hong-po͘ ê iá-lû, ūi-tio̍h kiáⁿ-jî phah-piàⁿ chhē-chia̍h;

6in tī pa̍t-lâng ê hn̂g koah niû-chháu, tī pháiⁿ-lâng ê phû-tô-hn̂g khioh chhun ê phû-tô.

7In kui-mî bô saⁿ thang chhēng, thǹg-theh teh khùn, kôaⁿ mā bô thang kah.

8In tī soaⁿ--ni̍h hō͘ tōa-hō͘ ak-tâm, in-ūi bô jia-cha̍h chiū mo͘h tī chio̍h-piah.

9Ū lâng tùi lāu-bú ê heng-chêng kā bô-pē ê kiáⁿ chhiúⁿ--khì; koh lia̍h sàn-chhiah-lâng ê gín-á tú-siàu.

10Sàn-chhiah-lâng bô saⁿ thang chhēng, thǹg-theh chòe kang, iau pak-tó͘ thòe lâng taⁿ be̍h-khún.

11In tī pháiⁿ-lâng chi̍t-pâi chi̍t-pâi ê kaⁿ-ná-chhiū tiong chiⁿ-iû, ta̍h phû-tô choh-chiú, ka-kī iáu-kú chhùi-ta.

12Siâⁿ-lāi ū teh-beh sí ê lâng haiⁿ-haiⁿ-chhan, siū-siong ê lâng ai-kiò kiû pang-chān, m̄-kú Siōng-tè lóng bô teh koan-sim.

13Ū lâng khì-sak kng, m̄ chai i ê lō͘, bô ài kiâⁿ kng-bêng ê lō͘.

14Thiⁿ iáu-bē kng, thâi-lâng--ê chiū khí--lâi, khì thâi sàn-chhiah khùn-khó͘ ê lâng; mî--sî koh khì choh-chha̍t thau-the̍h.

15Kan-îm ê lâng pek-chhiat thèng-hāu thiⁿ-àm, siūⁿ-kóng “Bô lâng ōe khòaⁿ-tio̍h góa”, koh am ka-kī ê bīn.

16Chha̍t-á mî--sî ó͘ piah-khang, ji̍t--sî bih--khí-lâi; in bô ài kng.

17In khòaⁿ àm-mî chòe ji̍t--sî, in-ūi in khòaⁿ o͘-àm ê khióng-pò͘ chòe pêng-iú.

18Pháiⁿ-lâng chhin-chhiūⁿ chúi-pho, chin kín siau-sit; in pun--tio̍h ê thó͘-tōe siū chiù-chó͘, bô lâng koh kiâⁿ-khì in ê phû-tô-hn̂g.

19Khòng-hān kap iām-jia̍t hō͘ seh iûⁿ--khì, hō͘ chúi siau-sit, Im-kan mā án-ni thun-bia̍t ū-chōe ê lâng.

20Liân siⁿ in ê lāu-bú mā bōe-kì-tit in, thâng kā in chia̍h-liáu-liáu; pháiⁿ-lâng bô lâng siàu-liām in, chhin-chhiūⁿ chhiū siū at-chi̍h.

21In khi-hū bô hoâi-īn bô siⁿ-kiáⁿ ê hū-jîn-lâng, bô hó khoán-thāi kóaⁿ-hū.

22Siōng-tè ēng I ê koân-le̍k siau-bia̍t kiông-pō ê lâng; in sui-jiân heng-khí, I hō͘ in sìⁿ-miā lân-pó.

23Siōng-tè hō͘ in chiām-sî pêng-an bô-sū; I ê ba̍k-chiu put-sî kàm-sī in ê só͘-chòe.

24In sui-jiân heng-ōng, m̄-kú chi̍t-sî-á-kú chiū siau-sit; in ōe soe-bî, kap pa̍t-lâng kâng-khoán hō͘ lâng siu-si̍p, chhin-chhiūⁿ be̍h-sūi hō͘ lâng koah--khí-lâi.

25Án-ni, siáⁿ-lâng ōe-tàng kā góa hoán-pok, chèng-bêng góa só͘ kóng--ê m̄-tio̍h?

← Chapter 23 Jump to: Chapter 25 →