Job 28

Chinese TTVR (現代台語譯本羅馬字版)

← Chapter 27 Jump to: Chapter 29 →

1Gûn ū gûn-khòng; kim ū thê-liān ê só͘-chāi.

2Thih sī tùi tōe--ni̍h ó͘--chhut-lâi; tâng sī tùi khòng-chio̍h thê-liān--chhut-lâi.

3Lâng lo̍h-khì ke̍k-chhim ê só͘-chāi, tī o͘-àm tiong chhē khòng-chio̍h.

4In khì chin hn̄g bô lâng khiā-khí ê só͘-chāi, ó͘-khang ó͘ kah chin chhim, ēng soh-á kā seng-khu pa̍k--teh, lūi-lo̍h khang-lāi tōng-tōng-hàiⁿ.

5Tōe-chiūⁿ chhut thó͘-sán; tōe-ē ū iām-hé ká--khí-lâi;

6kî-tiong ū nâ-pó-chio̍h, mā ū kim-soa.

7Khòng-khiⁿ hit-tiâu lō͘ eng-chiáu m̄ bat, sió-eng ê ba̍k-chiu mā khòaⁿ bōe tio̍h;

8hiong-ok ê iá-siù m̄-bat kiâⁿ--kè, béng-sai mā m̄-bat kàu.

9Lâng chhun-chhiú phah tēng-chio̍h, kui-lia̍p soaⁿ kā i péng--khí-lâi.

10In tī chio̍h-pôaⁿ tiong khui-kau, chù-ì chhē ta̍k-khoán pó-mi̍h.

11In kā chúi-goân that--khí-lâi, hō͘ ún-ba̍t ê mi̍h lō͘-hiān.

12Chóng-sī tì-hūi beh khì tó-ūi chhē? Chhong-bêng tī tó-ūi?

13Tì-hūi ê kè-ta̍t bô lâng chai, tī oa̍h-lâng ê só͘-chāi mā chhē bōe tio̍h.

14Chhim-ian kóng: Bô tī chia. Tōa-hái kóng: Bô tī goán chia.

15Tì-hūi bōe-tàng ēng n̂g-kim bóe--tio̍h, bōe-tàng ēng gûn tēng i ê kè-ta̍t.

16Sûn-kim bōe-tàng kap i phēng, pó-kùi ê âng-bé-ló kap nâ-pó-chio̍h mā bōe-tàng.

17N̂g-kim, chúi-chiⁿ lóng kap i bōe-pí--tit; hó-kim ê khì-khū bōe-tàng kap i kau-ōaⁿ.

18San-ô͘ kap phek-ge̍k mā bián-kóng; in-ūi tì-hūi iâⁿ-kè chin-chu.

19Kó͘-si̍t ê n̂g-ge̍k kap i bōe-pí--tit; sûn-kim m̄-ta̍t-tio̍h i.

20Án-ni tì-hūi tùi tó-ūi lâi? Chhong-bêng tī tó-ūi?

21Tì-hūi tùi só͘-ū oa̍h-mi̍h ê ba̍k-chiu ún-ba̍t, khong-tiong ê pe-chiáu mā khòaⁿ bōe tio̍h.

22Húi-bia̍t kap Sí-bông kóng: Goán chí-ū thiaⁿ-tio̍h i ê hong-siaⁿ.

23Chí-ū Siōng-tè chai tì-hūi ê lō͘, chai i tī tó-ūi.

24In-ūi Siōng-tè ōe khòaⁿ kàu tōe ê ke̍k-thâu, piàn-khòaⁿ phó͘-thiⁿ-ē.

25I tēng hong ê khin-tāng, niû chúi ê chōe-chió.

26I kā hō͘-chúi tēng kùi-choeh, kā lûi kap sih-nà tēng lō͘-sòaⁿ;

27I khòaⁿ-tio̍h tì-hūi, kā kàm-tēng, chiū soan-pò͘ koh khak-tēng.

28I tùi lâng kóng: Kèng-ùi Chú chiū-sī tì-hūi; lī-khui pháiⁿ chiū-sī chhong-bêng.

← Chapter 27 Jump to: Chapter 29 →