Job 13

Chinese TTVR (現代台語譯本羅馬字版)

← Chapter 12 Jump to: Chapter 14 →

1Chiah-ê it-chhè góa ê ba̍k-chiu lóng ū khòaⁿ--tio̍h, góa ê hī-khang lóng ū thiaⁿ--tio̍h, mā bêng-pe̍k.

2Lín chai--ê, góa mā chai; góa bô khah su lín.

3Góa si̍t-chāi ài kap Choân-lêng-chiá kóng-ōe, chin ài kap Siōng-tè lí-lūn.

4Lín ēng pe̍h-chha̍t-ōe am-khàm ka-kī ê bû-ti; lín lóng sī bô lō͘-ēng ê i-seng.

5Khó͘-bōe-tit lín lóng tiām-tiām; tiām-tiām chiah sī ū tì-hūi.

6Chhiáⁿ lín thiaⁿ góa lí-lūn, chù-ì thiaⁿ góa sin-sò͘.

7Lín sī beh ūi Siōng-tè kóng bô-iáⁿ-chiah ê ōe, ūi I kóng pe̍h-chha̍t-ōe sī--bô?

8Lín kiám m̄-sī teh phian-thán Siōng-tè, beh ūi I piān-hō͘?

9I nā kā lín chhâ-giām, lín kiám ōe bô tāi-chì? Lín kiám ōe-tàng chhin-chhiūⁿ phiàn--lâng án-ni phiàn Siōng-tè?

10Lín nā àm-àm-á phian-thán, I it-tēng ōe kā lín chek-pī.

11I ê ui-giâm kiám bōe hō͘ lín kiaⁿ-hiâⁿ? I ê khióng-pò͘ kiám bōe lîm-kàu lín?

12Lín só͘ kì-tit ê chim-giân chhin-chhiūⁿ hé-hu bô lō͘-ēng; lín ê piān-hō͘ chhin-chhiūⁿ thô͘-bê bōe-khò--tit.

13Lín tiām-tiām, ōaⁿ góa kóng, chhut-chāi i lâi, bô-lūn sím-mi̍h góa lóng sêng-tam.

14Góa koat-tēng beh mō͘ sìⁿ-miā ê gûi-hiám, kap I piàⁿ su-iâⁿ.

15Góa í-keng bô ǹg-bāng, Siōng-tè beh thâi góa, góa mā m̄ kiaⁿ; góa beh tī I bīn-chêng ūi-tio̍h ka-kī ê só͘-chòe piān-hō͘.

16Góa án-ni chòe, khó-lêng ōe khioh-tio̍h sìⁿ-miā; in-ūi bô kèng-ùi Siōng-tè ê lâng m̄-káⁿ biān-tùi Siōng-tè.

17Tio̍h chù-ì thiaⁿ góa ê ōe, hō͘ góa ê sin-sò͘ ji̍p lín ê hī-khang.

18Khòaⁿ leh, góa í-keng chún-pī hó-sè; góa chai góa it-tēng ōe sèng-sò͘.

19Siáⁿ-lâng ōe-tàng kap góa piān-lūn? Nā ū, góa chiū bô koh sin-sò͘, kam-goān sí.

20Kiû lí chún góa nn̄g hāng chhéng-kiû, góa chiū bōe tùi lí ê bīn-chêng bih--khí-lâi:

21Kiû lí ê chhiú kiu tò-tńg, bô hêng-hoa̍t góa, bô ēng lí ê ui-giâm kā góa khióng-hat.

22Án-ni, lí lâi kò, góa lâi ìn; á-sī góa sím-mn̄g, lí tap-piān.

23Góa ê kè-sit kap chōe-kò ū jōa-chōe? Kiû lí hō͘ góa chai góa ū sím-mi̍h chōe-kò, sím-mi̍h kè-sit.

24Lí sī-án-chóaⁿ ng lí ê bīn, khòaⁿ góa chòe lí ê tùi-te̍k?

25Hō͘ hong chhe-cháu ê hio̍h-á, lí kiám tio̍h koh kā i heh-kiaⁿ? Ta--khì ê chháu-iù-á, lí kiám tio̍h koh kā i tui-jip?

26Lí kèng-jiân siá giâm-hat ê khí-sò͘-su lâi pān góa, liân góa siàu-liân ê sî ê chōe-kò, lí iáu m̄ pàng góa soah.

27Lí ēng kha-khàu khàu góa ê kha, kàm-sī góa it-chhè ê hêng-ûi, hān-chè góa ê hêng-tōng.

28Lâng pāi-hoāi chhin-chhiūⁿ nōa--khì ê mi̍h, chhin-chhiūⁿ hō͘ chiù-thâng chia̍h--khì ê saⁿ.

← Chapter 12 Jump to: Chapter 14 →