Jeremiah 1

Zande

Jump to: Chapter 2 →

1Agu apai nga ga Yeremaya, nangia wiri Erekiya, naadu dagba aboromotumo yo naadu Anatota yo rogo ringara Benyamina,

2gu ko ga Yekova pai aye koyo du ko ni ti rago Yosiya nangia wiri Amona, bakindo aYudo, rogo gu bawe na biata garã nga ga gako zogarago.

3Si aye a wo ti agu arago nangia ga Yoyakima nangia wiri Yosiya, bakindo aYudo, ki da ti digida bawe na sa garã nga ga Sedekiya nangia wiri Yosiya, bakindo aYudo, ki da ti rago ga yo na aboro Yerusarema ni zizi yo rogo bisue diwi.

4Were sangba Yekova aye kono du mi ni nga Yeremaya niya,

5“Mi aini ro mbata mi nikambakada ro kii rukumbu yo, mi akpara ro tipa re mbata i nikavunga ro; mi aasia ha foro mo du ni nebi fu arikaaboro.”

6Mi ki ya, “Ako Gbia MBORI! Mo ngére, mi aina nga waĩ ka fura te, bambiko mi nga kina paranga.”

7Ono Yekova ki ya fere, “Ka mo yá nga, ‘Mi nga kina paranga’, ya; bambiko mo andú koyo du agu yo ni dunduko ka mi kedi ro koyo du yo ni, gu pai mi ka ruga ro na ni mo agúmba kina ha.

8Ka mo gúnde nga be yo ya, bambiko mi du na mo ka batasa ro, wo poi Yekova.”

9Si du Yekova ki taĩ beko ki zadi ngbare; Yekova ki ya fere “Mo ngére, mi moi gimi apai ku ngbaro yo.

10Mo bí, mi moi ro ni gi uru re ku ri arikaaboro na ku ri angbi, ka mofa he na ka kuadi he ku sande, ka gbarasa he na ka bafa he, ka dua he na ka rũ he.”

11Sangba Yekova ki ye kono du mi ni, ki ya, “Yeremaya, gini he bi mo?” Mi ki ya, “Mi bi be ngua du wa anzari.”

12Yekova ki ya fere tie, “Mo nibi he wenengaĩ, bambiko mi nabanda pa gi pai ka digisa ha.”

13Sangba Yekova ki ye kono du mi ni ni ue he, niya, “Gini he bi mo?” Mi ki ya, “Mi bi pere baba ime, na degesi ngbaha ku sudiyo.”

14Yekova ki ya fere tie, “Gbigbitapai akúra nodiyo ku ri araki rogo gu ringara re.

15Bambiko, mo ngére, mi nayamba angbatunga aboro dunduko nga ga angbi du ku nodiyo, wo poi Yekova; i ayé; i ni ba sa sa amáa gayo mbatabakindo ti angbadimo Yerusarema, na kuti angapaha dunduko kirikiri, na kuti agu abaakporo dunduko nga ga Yuda.

16Mi agúmba gimi asarangbanga kuti yo tipa gayo gbegberẽapai dunduko wa i ambu re; i azo wepe fuõngua fu kura ambori, ki niirisi aú sabeyo.

17Ono mo, mo síkpa tiro; mo gúari, ki gumba agu apai fu yo dunduko nga gu rugu mi ro na ni. Ka mo yúngura nga be yo ya, mi ka payasi ro ku bangiriyo.

18Mo ngére, mi tigimi mi sa ro ni gi uru re ni bakporo ngapa, ni dangba marã, ni avuro bambu ni sirigi, kuti ringara dunduko, kuti abakindo aYudo, na gayo abazogo, na gayo aboromotumo, na kuti aboro ringara.

19I asó vura kuti ro; ono i adia nga be ro te, bambiko mi du na mo, ka batasa ro, wo poi Yekova.”

Jump to: Chapter 2 →