Jeremiah 23

Zande

← Chapter 22 Jump to: Chapter 24 →

1“Na gberẽ he fu agu ababanda akandoro gbarasi gimi akandoro ki gbandaka ra nga ga gi banambu ra!” wo poi Yekova.

2Si du ya Yekova nga ga aYisaraere Mbori wẽ, tipa agu ababanda aboro nabanda gimi aboro: “Oni gbandaka gimi rimbasa aboro, ki do yo ku sa yo, ka oni awisiga nga pa yo ya. Oni ngére, mi awísiga pa roni tipa gaoni gbigbita mangaapai, wo poi Yekova.

3Mi ki dungura gu yangara gimi rimbasa aboro rogo agu aringara dunduko yo mi ado yo ku ho ni, mi ki yega na yo berewe ku kpuyo yo, i adú ni zugazuga yo ki ninge ange.

4Mi amáa ababandayo ku ri yo nikabanda yo, ka I agúnde nga berewe ya, ka i ayúngura nga ya, ka agu yo aínga nga wa sa a ya, wo poi Yekova.

5“Mo ngére, aragoho naye, wo poi Yekova, ho mi ka kusa ruru Tomohe ni fu Dawidi, ko azóga rago wa bakindo ki nimangi pai ni tatamana, ki nisari ngbanga nzunzu na rurupai rogo ringara.

6Ti rago gako arame aYudo abáta, aYisaraere ki niraki zezeredi. Gere ki ngia gu rimo i ka yamba ko na ni: ‘Yekova nga gaani rurupai.’

7“Si du, mo ngére, aragoho naye, wo poi Yekova, ho aboro ka ya nga ni berewe ya, ‘Wa du Yekova ni ungako naye na awiri aYisaraere ringara Ezipeta yo,’

8ono i ayá. ‘Wa du Yekova ni ungako naye ki ngbe ku mbata yo fu atita awiri aYisaraere rogo ringara ku nodiyo na rogo agu aringara dunduko yo ko ado yo ku ho ni.’ I ki niraki kina rogo gayo ringara.”

9Gu pai dũ tipa anebi: Ngbadure kiti rogo re yo, amemere dunduko nakio; mi du wa bakpiimekakue, wa gu boro imekakue nadi be ni, bambiko Yekova na bambiko gako ziazia apai.

10Bambiko ringara hi be airabari; bambiko ringara nakpara ni nunga be motiwa, agu abanambu du ngbakungba yo ugu du. Gayo sino du ni gbigbita ha, ka gayo ngarã aru nga ya.

11“Anebi na aboromotumo nazanga sino Mbori; zavura rogo gi bambu yo mi bi gayo gbegberẽapai yo, wo poi Yekova.

12Si du gayo sino adú fu yo wa zezerenge gene bitimo yo, i ka do yo ku rogo ho yo i ki tiwi; bambiko mi ayé na gbigbitapai ku ri yo ti garã gayo mbusa, wo poi Yekova.

13Mi bi mumungo pai rogo agu anebi yo nga ga Somorona yo: i nagumba pai ni rimo Bara ki ningbe ku mbata yo fu gimi aboro aYisaraere ki ingisi yo.

14Ono mi bi kere gbegberẽpai rogo agu anebi yo nga ga Yerusarema yo: i namanga bari ki nita rogo azire; i nanyakasa be amangi gbegberẽpai, si du ka boro asa nga tini ti gani gbegberẽpai ya; i dunduko sa tiyo fere wa Sodomo, na araki rogo ho wa Amora.”

15Si du ya Yekova nga ga arimbasa ko tipa anebi wẽ: “Oni ngére, mi aríga yo na hihii ngua, ki fu ime kere kpepasio fu yo i mbiri he; bambiko mbiko anebi nga ga Yerusarema yo si zangasinombori nakuru ti ni ku rogo ringara dunduko.”

16Ya Yekova nga ga arimbasa ko wẽ: “Ka oni dége nga turoni sa ga anebi apai ninagumba pai fu roni ya, nayugo pa kungba maabangirise fu roni; i nagumba pa gu yuguyugupai nga kina ga gayo aberã, ono gu kuru ngba Yekova yo te.

17I nagumba ha kindi fu agu yo napayasi gu pai nga ga Yekova, ‘Si adú fu roni wenengaĩ’; na fu aboro ni ba sa napeka sangba kpotoyo yo ni mumungopai, i naya, ‘Gbigbitapai ayé nga ku ri rani wa sa te.’”

18Bambiko da du dagba yo yo naaru rago ga Yekova gbuu ka bi gako pai na ka gia ha, watadu da gi gako pai ki dege tuni sa ni?

19Oni bi nga, gu bakamikami yuge nga ga Yekova! ngariangaria zinga kuru, nga bagugugu mamu yuge; si asú ku ri gbegberẽ aboro.

20Ga Yekova zinga asá nga tihe te, daho ko ka manga gu pai ni ki nyasi he ko aberã paha rogo gako berã. Ti yangara arame mo arúga tiro na ni nzunzu.

21“Mi akeda nga agu anebi te re, ono i aoro; mi agumba nga pai fu yo te, ono i agumba pai.

22Ono ka i aru rogo gi gbuu, ka i ataki pande pa gimi apai fu gimi aboro, ki sa yo ti gayo gbigbita sino, na ti gu gbigbitapai nga ga gayo mangaapai.

23“Mi nga Mbori du mbembedi te? wo poi Yekova, Mbori nga mi turu aturã te.

24Boro rengbe ka gbu ku rogo abagbuko yo, yo ka mi arengba nga ka bi ni ni ya? wo poi Yekova. A nga mi rengbe na rago ku ngbangbaturũ yo na ku kpotosende no te? wo poi Yekova.

25Mi gi gu pai gumba anebi ni pa azire na rimore, naya, ‘Mi rari musumo, mi rari musumo!’

26Rago agíza waĩ azire ki du kpoto anebi yo nga agu yo nagumba azire? nga agu yo nagumba biriki nga kina sangba kpotoyo yo,

27naberã pa manga gimi aboro bangiriyo go ti rimore na gayo sangba amusumo nga gu gu ni nagumba ha fu gu ni, zavura wa bangiri abayo ago ti rimore mbiko Bara.

28Gu nebi rari musumo ni gúmba sangba musumo, ono gu ni du na gi pai ni gúmba gi pai sirisiri. Gini he du ti ugu katakpahe du ti zende ahe a? wo poi Yekova.

29A nga gi pai wa we te, wo poi Yekova, na wa bande nga gu nakua mbia rukutu?

30Si du, mo ngére, mi gbarasi rimo anebi, wo poi Yekova, nadĩ gimi apai ngba akurayo.

31Mo ngére, mi gbarasi rimo anebi, wo poi Yekova, namanga pai ni mirãyo ki ya, ‘Wo poi Yekova.’

32Mo ngére, mi gbarasi rimo agu yo nagumba sangba musumo nga pa zire, wo poi Yekova, nagumba ha fu gimi aboro ki ingisi yo ni gayo azire na gayo ruguzuruguzu pai, ho mi akeda nga yo ni watadu ruga yo a ya; si du i ahusa nga agi aboro dunduko re wa sa te, wo poi Yekova.

33“Ho boro sa dagba agi aboro yo re ka sana ro ni, watadu nebi, watadu boromotumo, niya ‘Gine nga gu tindiro nga ga Yekova?’ mo ayá fu yo, ‘Oni nga gu tindiro, mi abá roni ku sa yo, wo poi Yekova.’

34Na tipa gu nebi, watadu gu boromotumo, watadu gu boro sa dagba agu aboro yo ka ya, ‘Gu tindiro nga ga Yekova,’ mi ambúsa gu boro re na gani aborokporo.

35Oni ayá aboro ni ba sa sa fu akurayo na aboro ni ba sa sa fu awirinayo wẽ, ‘Gini pai karaga Yekova?’ watadu ‘Gini pai gumba Yekova ha?’

36Ono ‘gu tindiro nga ga Yekova’ oni apé nga paha berewe te, bambiko gu tindiro re nga kina ga aboro fugo dunduko, oni nasa agu apai nga ga unga Mbori akia, nga Yekova nga ga arimbasa ko, nga gaani Mbori.

37Oni ayá fu gu nebi re wẽ, ‘Gini pai Yekova akaraga foro?’ watadu ‘Gini pai gumba Yekova foro?’

38Ono ka oni aya, ‘Gu tindiro nga ga Yekova,’ ya Yekova wẽ, Bambiko oni gumba agi apai re, ‘Gu tindiro nga ga Yekova;’ ho mi akedi pai ni foro niya, Ka mo yá nga, ‘Gu tindiro nga ga Yekova,’ ya,

39si du, oni ngére, mi atúmba roni ni rengo ku ari ki bafu roni ku bara bangire, oni na gu bakporo nga gu mi afu fu roni na fu abaroni.

40Mi ki ye na nyenye gbarasarimo ku ri roni na nyebaru zee, nga gu bangirise ka go nga ti ni ya.”

← Chapter 22 Jump to: Chapter 24 →