Jeremiah 2

Zande

← Chapter 1 Jump to: Chapter 3 →

1Sangba Yekova aye kono du mi ni, niya,

2“Mo ndú ka taka pande he ku tu aboro Yerusarema yo, Ya Yekova wẽ, Mi tingidi pa gu weneringise nga ga parangaro, ga nyemuse wa didide, na waĩ mo apeke re rogo ngbakungba, rogo gu ringara i arũ nga he rogo ho ya.

3AYisaraere adu ni kparakpara yo ziazia fu Yekova, gu bambata zuzuhe nga ga gako regbo ke ahe. Agu yo dunduko nari he adu na pai ku ri yo; gbigbitapai aye ku ri yo, wo poi Yekova.”

4Oni gí sangba Yekova, Ako ga Yakoba arika ngbatunga, na agu angbatunga aboro dunduko nga ngbatunga aYisaraere.

5Ya Yekova wẽ: “Gini tindika abaroni abi ti re i andu ti ni tuturũ be re, ki ndu fuo gu he du ni kungba ha ki sa tiyo ni kungba he a?

6I aya nga, ‘Wari du Yekova ni?’ te, ‘nga gu ko naaye na ani ringara Ezipeta yo, naangbe fu rani ku mbata yo ngbakungba yo, rogo ringara ngbi ngume na adue, na ringara ugure na nduunduu bitimo, rogo gu ringara boro asusa nga rogo yo wa sa ya, yo aboro araka nga ni wa sa ya.’

7Mi ki ye na oni ku rogo gu ringara du na ahe kpaima ka ri gaha zuzuahe ki niwasa be gaha wene ahe. Ono ho oni ada ni ku rogo ho yo oni agbarasi gi ringara, ki mangi gu ringara mi afu fu roni ni kere gbegberẽ he.

8Aboromotumo aya nga a, ‘Wari du Yekova ni?’ te. Agu yo namanga pa rugute aina nga re te; ababanda aboro asa mungu kuti re; anebi ki nigumba pai ni sangba Bara, ki ndu sa agu apai au nga ya.

9“Si du mi nadarã kangu na oni kindi, wo poi Yekova, na awiri awironi mi adárã pai na yo a.

10Si du oni sí ti ngba gango baime ku Kupurio yo ka bi nga, watadu keda sunge ku Kedara yo ka wisiga pai sirisiri; ki bi ka ngia ngbatunga gi pai re adu yo wo.

11Rikaaboro ambu gayo ambori ka irisa kura ha? ka i avura nga du ni ambori vurũ ya? Ono gimi aboro sa gayo taarimo tipa gu he au nga ya.

12Ako angbangbaturũ, oni kígi mbiko gere, oni gúnde ni kere gunde, ki gberẽ kpakaya, wo poi Yekova,

13bambiko gimi aboro mangi gbi gbitapai ue: i mbu re, nga gu gugaabi nga ga unga aime, ki nigeteke adue ime tipa tiyo, nga butukabutuka adue ime, arengba nga ka ime nye rogo ho yo ya.

14“Yisaraere nga kanga? Ko nga wirikporo ni kanga? Tipagine tie du ko ti ni ni ũmozi?

15Abahu gbungu sa ko, ami gbungu ni wawa. Ami gbarasi gako ringara; i zokodi gako abaakporo na we, zanga araki rogo.

16Ku ri gere, agu aboro nga ga Nofa na ga Tepenesa yo koro bebere riro yo.

17Mo aye nga na gere ku ri ro ni tiro te? ni mbu mo Yekova ga Mbori, ho ko angbe ni foro ku mbata yo ngba gene.

18Gini mokiisa du foro tie be ndu mo ku Ezipeta yo, ka mbira agu aime nga ga Nire? Watadu gini mokiisa du foro be ndu mo ku Asura yo, ka mbira agu aime nga ga Ferata?

19Ga gbegberẽpai nikaruga ro; pa sa ga berã ku sa yo nikaza ro. Mo íni he ki bi he ya si nga gbegberepai ni kere he foro ka mbu Yekova ga Mbori; gunde ti re kpotoro yo te, wo poi Gbia MBORI nga ga arimbasa ko.

20“Bambiko mo akua ga gonga bakuru yo ki suntbusi gamo azogbo; mo ki ya, ‘Mi amánga nga pa ha te.’ Ii, mo anugadi ku sende wa irabari, ri ago ni ba sa sa na tii iwo angua dunduko.

21Mi arũ ro wa siasia bakakue ni ziazia tunga dunduko. Waĩ tie sa mo tiro ni payapaya ro ki sa tiro ni kungba bakakue nvuo?

22Ka mo vura zunda tiro ni gu ime hĩ ahĩa vurũ, ki zundu tiro na dungu sazundu, fuo ga ingapai du kindi ku bangire, wo poi Gbia MBORI.

23Waĩ rengbe mo ka ya, ‘Mi ni birikobiriko re te, mi andu nga fuo aBara te’? Mo ngére ti ga gene rogo ngboongboorago; ka ina gu pai mangi mo ho― wa zingizingi paranga kameri na watawata he ti bira ru,

24wa dongi nvuo inidi kina ngbakungba, u nagbeda yuge rogo gau nyemuhe! Da rengbe ka dingisa gau nyemuhe? Agu aboro ka gbata ru ka i mbusi nga tiyo ya; rogo gau diwi i abí ru.

25Mo bánda nduro ti ndu zanga rakata na kundugbarãro be gomoro ime. Ono mo aya, ‘Si zanga maabangirise, bambiko mi kpi nyemu akare, mi andú fuo kina yo.’

26“Wa iradĩ du na zee ho zi yo ni ni, wo ga Yisaraere aborokporo ka du na zee: i na gayo abakindo, na gayo abazogo, na gayo aboromotumo, na gayo anebi,

27naya fu ngua, ‘Mo nga buba,’ na fu mbia, ‘Mo nabatika re.’ Bambiko i sa giiyo fere, kpakpuyo te. Ono rago gbigbitapai fu yo i naya, ‘Mo gúari ka batasa rani!’

28Ono wari du gaoni ambori ni nga agu yo oni amangi yo tipa roni? I gúari tigayo, ka i rengbe na batasa roni, rago gbigbitapai fu roni; Ako Yuda, bambiko wa du gaoni abaakporo ni dungu he, a wo du gaoni ambori.

29“Tipagine oni akpara fere ti ni? Oni dunduko sa mungu kuti re, wo poi Yekova.

30Mi ta awironi vurũ, i agia nga rugapai te; kina gaoni basape riti gaoni anebi wa gbiriwogbiriwo bahu.

31Na oni, Ako arikaaboro, oni íka sa ga Yekova pai. Mi adu wa ngbakungba fu Yisaraere? watadu wa ringara nduunduu bitimo? Tipagine tie gimi aboro aya ti ni, ‘Ani nga araniri rani, ani ayé nga berewe koyo du mo ni te’?

32Bangiri paranga de rengbe na go ti gari afongo? watadu bangiri didide ti gari aroko? Ono bangiri gimi aboro go ti re tipa dungu rago zanga geda ha.

33“Oni naruga gaoni gene wenengaĩ ka gbata akpinyemu roni! Si du zavura gbegberẽ ade oni ima yugo gaoni apai fu yo.

34I bi kure ti gaoni aroko nga ga aboro wenesa nga rungorungo yo; ono oni abi nga yo i nikuadi abambu nidĩ he dimo yo te. Ka si vura du wo mbiko agi apai dunduko re

35oni naya, ‘Ani nga aboro wenesa; ni rengo gako zinga sa tihe ti rani.’ Oni ngére, mi ayé na oni sa sarangbanga bambiko ya oni, ‘Ani amanga nga ingapai te.’

36Oni nayara kirikiri tipa ngbarago gbua, ki nisa gaoni asino! Ezipeta abá zee ku ri roni a wa Asura aba zee ku ri roni mbata.

37Oni akúra be he ku sa yo na beroni ri roni yo, bambiko Yekova gindiga agu yo oni nakida kuti yo, oni aú nga be yo te.”

← Chapter 1 Jump to: Chapter 3 →