Jeremiah 24

Zande

← Chapter 23 Jump to: Chapter 25 →

1Fuo ga Nebukadenesara nangia bakindo aBabero na Yekonya Yerusarema yo ni zizi ko nangia wiri Yoyakima, nangia bakindo aYudo, na abazogo aYudo na ko a, na abangbasia, na apangu, ki ye na yo ku Babera yo, Yekova ayugu gi yuguyugupai fere re: Mo ngére, abaga vurumo ue i amoi he barangba ga Yekova yekaru.

2Baga sa adu na bawene vurumo rogo ho, wa bambata zamba vurumo, ono gu kura baga ki du na bagbegberẽ vurumo rogo ho, ni gbegberẽ he i arengba nga ka ri he ya.

3Yekova ki ya fere, “Yeremaya, gini he bi mo ho?” Mi ki ya, “Avurumo, gu wene vurumo du ni bawene he, na gu gbegberẽ vurumo du ni bagbegberẽ he, ni gbegberẽ he i arengba nga na ri he ya.”

4Sangba Yekova ki ye kono du mi ni niya:

5“Ya Yekova nga ga aYisaraere Mbori wẽ: Wa agi abawene vurumo re, wo mi ka berã pa gu zizi yo nga ga aYudo yo ni bawene yo, nga agu yo mi akedi yo ku sa yo rogo gi ba re ku ringara aKasado yo.

6Mi amáa bangire ti yo tipa wenepai, mi ki yega na yo berewe ku rogo gi ringara re. Mi adúa yo ku ari, ka mi akúadi nga yo ku sande ya; mi aru yo, ka mi amófanga yo ya.

7Mi afú ngbaduse fu yo i ini ti ni ya mi nga Yekova; i adú ni gimi aboro mi ki du ni gayo Mbori, bambiko i akáraga tiyo fere na kpotoyo yo dunduko.

8“Ono ya Yekova wẽ: Wa gu bagbegbe rẽ vurumo du gbegberẽ arengba nga na ka ri he ya, wo mi ka manga Sedekiya bakindo aYudo, na gako abazogo, na gu yangara yo nga ga Yerusarema yo nanye rogo gi ringara re, na agu yo naraka ringara Ezipeta yo a.

9Mi asá yo ni ukiga fu angbi dunduko nga ga kpotosende, ka du ni úgbarasarimo, ni sanza, ni uumohe, ni motiwa rogo agu arago dunduko mi ka do yo ku ho ni.

10Mi ki kedi basape, na ngbongi, na tata kaza ku ri yo, daho mi ka gbarasa yo ni kpakaya rogo gu ringara nga gu mi afu fu yo na fu abayo.”

← Chapter 23 Jump to: Chapter 25 →