Jeremiah 9

Zande

← Chapter 8 Jump to: Chapter 10 →

1Ako! ka rire angia aime, bangire ki du nga gugaabi aume, ya mi nikpari uru na yuru tipa gu imiimi yo nga ga gimi aboro!

2Ako! ka ba nidu be re ngbi ngume yo ni baraka tipa boro nunguro, ya mi mbu gimi aboro ki guari pati yo ku sa yo! Bambiko i nga airabari dunduko, nga rimbasa aboro biriki.

3I nanuga mirãyo wa mboto; pa zire sono nyanyaki rogo ringara ono pa rengo te; bambiko i nandu ti gu gbigbitapai sa gu gbigbitapai, ka i aina nga re ya, wo poi Yekova.

4Aboro ni ba sa sa bánda tiyo be akurayo, ka i akida nga kuti awirinayo ya; bambiko awirina dunduko nga adiba akurayo, akura aboro ki nindu wa agbarasirimo.

5Aboro ni ba sa sa nananga akurayo, a nga boro ho nagumba ndikidi rengo wa sa te; i yugu pa gumba azire fu mirãyo; i mangi irairapai ki du na bakere mbugo ka i asa nga berãyo ya.

6I naba guta rurigosiro ku ri rungosiro, biriki ku ri biriki, i ka pa ina re, wo poi Yekova.

7Si du ya Yekova nga ga arimbasa ko wẽ: “Mo ngére, mi afúrusa yo ki asadi yo, bambiko gini pai rengbe mi ka manga ha berewe, bambiko gimi aboro?

8Mirãyo nga kere aguanza; si nagumba pai ni biriki; i ni ba sa sa nagumba pai ni ngbayo sa zereda fu akurayo, ono kpotoyo yo i naberã pa runguru tipa yo.

9Mi ambúsa nga yo tipa agi apai te re? wo poi Yekova; ka mi íri nga bape ti ngbatunga rikaaboro wa agi yo te re?

10“Mo tóna kpe na wawa ku ri abaagangara, na kpenunga tipa abanambu ngbakungba, bambiko si gberẽ du ka boro susi nga yo te, i agia nga kpe abagara yo te; azire ari na anya a aoro ki ga du.

11Mi asá Yerusarema ni guguda, ni baraka fu ahúa; mi ki mangi agu abaakporo nga ga Yuda ni vurubate zanga araki rogo ho.”

12Da nga gu boro du na tatamana nga gu ni rengbe ka ruga tini na gere? Da ngba Yekova agumba pai fu ni, ya ni taki pande he? Tipagine gberẽ ringara ti ni ki du ni gbarasigbarasi he wa ngbakungba, si du ka boro susi nga rogo ho wa sa te?

13Yekova ki ya: “Bambiko i mbu gi rugute mi afu fu yo, ka i agia nga fugore ya, watadu ka peka fuo ho a ya,

14ono i ki nipeke kina gayo mumungo aberã ki ndu fuo aBara, wa abayo ayugu he fu yo.

15Si du ya Yekova nga ga arimbasa ko, nga ga aYisaraere Mbori wẽ: Mo ngére, mi aríga agi aboro re ni hihii ngua, ki fu ime kere kpepasio fu yo sa mbira ha.

16Mi agbándaka yo ku dagba arikaaboro yo nga agu yo i aina nga yo ya abayo aina nga yo a ya; mi ki kedi basape fuo yo, daho mi ka nyasa yo ni.”

17Ya Yekova nga ga arimbasa ko wẽ: “Mo bérẽ nga pai, ki yambu he tipa agu ade nga anakparikpe i ye; mo kédi sunge tipa agu ade nga anabangbasia kparakpe i ye;

18i ípisi tiyo ki guari ka kpara ni wawa tipa rani, ya bangirani ga na aume, ime ki nigbadi ti puku bangirani.

19Bambiko i gi pa kpe ni wawa Siona yo; ‘Waĩ gbarasi yo rani! Ani na zee gbe, bambiko ani mbu ringara, bambiko i bafu gaani abaraka ku sande.’”

20Ako ade oni gí ga Yekova pai, turoni ídi gu pai dũ ngbako; oni yúgu bia kpe fu awironi nga ade, oni ni ba sa sa yúgu kpenunga fu akuaroni.

21Bambiko kpio da ti bangiri gaani bambu, si rimi ku rogo gaani abambu bakindo, ki nirogo agude ku sa yo ngba agene bakporo, na aparanga rogo avurukporo bakporo yo.

22Mo gúmba ha, “Ya Yekova wẽ: ‘Kangba aboro atiwa wa regbo anya rogo ati, wa vodivodi zende ahe fuo bakeahe, ka boro adúngura nga ha ya.’ ”

23Ya Yekova wẽ: “Ka iratatamana abia nga tini tipa gani tatamana ya, ka iranyaka abia nga tini tipa gani ngarã ya, ka irakumuko abia nga tini tipa gani akumuko a ya;

24ono gu ni naabia tini ni abia tini rogo gere, ya ni rugu tini na pare ki ini re, ya mi nga Yekova namanga weneringise, na sarangbanga, na rurupai auru kpotosende; bambiko rago angba ti re tipa agi apai re, wo poi Yekova.”

25“Mo ngére, arago nada, wo poi Yekova, ho mi ka mbusa agu yo ni dunduko yere yo yo ono i ta du ni azangayeratise―

26nga Ezipeta, na Yuda, na Edome, na awiri Amona, na Moaba, na agu yo dunduko naraka rogo ngbi ngume nga agu yo nayera tii mburu amangeriyo; bambiko agi arikaaboro dunduko re du ni azangayeratise, na aboro Yisaraere dunduko du ni azangayeratise kpotoyo yo a.”

← Chapter 8 Jump to: Chapter 10 →