Jeremiah 31

Zande

← Chapter 30 Jump to: Chapter 32 →

1“Ti gu rago re, wo poi Yekova, mi adú ni Mbori fu arika ngbatunga aYisaraere dunduko, i ki du ni gimi aboro.”

2Ya Yekova wẽ: “Agu aboro nabati be basape i abi undahe ngbakungba yo; ho Yisaraere agbata baongoda ni,

3Yekova ayugu tiko fu ko tuturu rago yo. Mi kpi nyemu ro na nyenye kpinyemuse; si du mi anigbe ro ti ni ni weneringise.

4Mi adúa ro berewe, mo ki du ni duadua ro, Ako ngasu Yisaraere! Mo atiitia agaza berewe, ki kuru ka ndu sa gu gbere nga ga agu yo namoma mongo.

5Mo asópa bino bakakue berewe ri abaagangara Somorona yo; abarú ahe arú he, ki niri zuzuhe.

6Bambiko rago adú a ho ababanda rago ka yamba he ni rogo ringara abaagangara nga Efuraima niya: ‘Oni gúari, ani ndú ku Siona yo, koyo du Yekova ni nga gaani Mbori.’ ”

7Bambiko ya Yekova wẽ: “Oni bi bia ni wawa na ngbarago tipa Yakoba, ki ta wawa tipa gu rikaaboro du ku ri arikaaboro dunduko; oni táki pande he, ki fu tambuahe, ki ya, ‘Yekova batasi gako aboro, gu yangara yo nga ga aYisaraere yo.’

8Oni ngére, mi ayéga na yo ringara nodiyo, ki dungura yo ti tuturu papara kpotosende yo, dagba yo yo airavurari ka du ni na gbarĩgbarĩ yo, de na gude na gu ri naima be vunga, a wa sa; i ayéga kono ni bakere rimbasa.

9I ayéga na kpe, mi angbé fu yo ku mbata yo na kpesarawati, mi ayé na yo i nita pangba ime awiriadi, ngba diiri gene nga gu i ka kotoka nga ngba ha ya; bambiko mi nga ba fu Yisaraere, Efuraima ki ngia bambata wire.

10“Ako arikaaboro, oni gí sangba Yekova, ki taki pande paha rogo aringara ti ngba gango baime tuturu; oni yá, ‘Gu ko nagbandaka aYisaraere ko adúngura yo berewe, ki nibanda yo wa babanda akandoro nabanda gani rimbasa anya.’

11Bambiko Yekova tumo Yakoba, ki ngbe ko be gu boro nyaki anyaka fu ko ki susi.

12I ayé ki nibi bia ni wawa ri basosono ba Siona yo, i ki du na ngbarago mbiko gu weneringise nga ga Yekova, mbiko zende ahe, na imekakue, na nzeme, na mbiko rimbasa paranga akandoro na rimbasa abagara; ungayo adú wa tuditudi ati, ka i adú nga na imisiri berewe ya.

13Si du paranga ade angi rago gbere, paranga akumba na gbinza akumba adú na ngbarago. Mi asá gayo kpenunga ni ngbarago, mi angárãsa yo, ki fu ngbarago fu yo ku ba rungo.

14Mi aríga mbisimo aboromotumo ni riahe kpaima, gimi aboro ki mbiki be gi weneringise ki rengbe, wo poi Yekova.”

15Ya Yekova wẽ: “I nigi fugo Rama yo, kpenunga na nirãnirã kpe ni aume. Raere nikpari tipa awiriri; ka ri awasa nga tipa awiriri ya, bambiko i ho te.”

16Ya Yekova wẽ: “Ka mo kpári nga kpe ni fugoro ya, ka aume dú nga bangiro yo a ya; bambiko i afú mosoro foro tipa ga sunge, wo poi Yekova, i ayéga rogo ga avurayo ringara yo berewe.

17Maabangirise du ho tipa ga pai ku mbata yo, wo poi Yekova, awiro ki yega berewe ku rogo kina gayo ringara.

18Mi gi pa Efuraima ko nikpari, niya, ‘Mo arugu re, mi ki du ni rugurugu re, wa gu wiri bagara i aruga nga pai fu ru ya; mo káraga re berewe ya mi karaga tire, bambiko mo nga Yekova nga gi Mbori.

19Bambiko fuo sa mi tire ku sa yo mi asa gi berã; na fuo ruga yo re, mi anaki tire ri kpakpu mbosore; mi adú na zee, mi ki du mumungo, bambiko mi aberẽ pa gu pa zee nga ga parangare.’

20Gu wire nga Efuraima, ngba ko ti re gbe? Ko nga gu wire nga mangure? Bambiko wa mi naazinga kuti ko dedede, mi naberã pako kindi. Si du kpotore yo du ni fudifudi he tipa ko; mi aina pai aina fu ko ni rengo, wo poi Yekova.

21“Mo moi úyugo gene tipa ro; k i mbakadi ngua yugo gene tipa ro; mo bérẽ pa bagene wenengaĩ, gu gene mo andu ngba ha. Ako Yisaraere, mo káraga tiro, mo káraga tiro ku rogo gi gamo abaakporo re.

22Ako aboro nga atikusayo, rago agíza waĩ oni nindu ngbuongbuo? Bambiko Yekova mangi vovo pai auru kpotosende: nga de nabanda kumba.”

23Ya Yekova nga ga arimbasa ko, nga ga aYisaraere Mbori wẽ: “I agúmba agi apai re bara sa berewe ringara Yuda yo na rogo gaha abaakporo, ho mi ka yega ni na yo gene zia yo yo: ‘Yekova fú maku foro, Ako baraka rurupai, Ako ziazia bagangara!’

24Yuda na gaha abaakporo aráka yo wa sa, na abasopobino na agu yo nata ata na gayo rimbasa akandoro.

25Bambiko mi ambísa gu mbisimo mbu, na agu ambisimo dunduko adu nga na ngbarago ya mi aungasi he.”

26Mi azingi rame yo ka ngera, gi rame adu ni wene he fere.

27“Mo ngére, aragoho naye, wo poi Yekova, ho mi ka rú tunga boro na tunga nya ni ku rogo aboro aYisaraere na aboro Yuda.

28Si ki ye ka du wa gere wa mi aberẽ pa yo ka mofa yo na ka kuadi yo ku sande, ka sika yo, ka gbarasa yo, ki ye na gbigbitapai ku ri yo, wo mi ka berã pa yo ka dua yo na ka ru yo a, wo poi Yekova.

29Ti gu rago re i ayá nga berewe te: ‘Abarani ari kakaĩ bakakue rindi agude ki niimi be he.’

30Ono aboro ni ba sa sa akpi tipa kina gayo irairapai; gu boro nari kakaĩ bakakue, rindini aima be he.

31“Mo ngére, aragoho naye, wo poi Yekova, ho mi ka manga vovo mokido ni na aboro aYisaraere na aboro Yuda,

32wa gu mokido mi amangi na abayo te ho mi azi yo ni ti beyo ka kusa yo ringara Ezipeta yo, gi mokido nga gu i agbarasi, wa mi avura du wa kumbayo vurũ, wo poi Yekova.

33Ono gere nga gu mokido mi ka manga na aboro aYisaraere fuo agu arago re, wo poi Yekova: mi amáa gi rugute ku rogo yo yo, mi ki ke he ku ngbaduyo yo; mi ki du ni gayo Mbori, i ki du ni gimi aboro.

34Ka aboro ni ba sa sa ayúgo nga pai fu kurani na fu awirinayo, niya, ‘Oni ini Yekova,’ ya, bambiko i dunduko nikaina re, tona ti gu umba yo ki da ti gu bakumba yo, wo poi Yekova; bambiko mi avú yo ti gayo irairaapai, ka mi atingida nga pa gayo ingapai berewe ya.”

35Ya Yekova wẽ, nafu uru tipa hasa rago uru na gu ringbisapai nga ga diwi na akerekuru tipa hasa rago yuru, ninawo ti ngiri baime si poi― rimoko nga Yekova nga ga arimbasa ko:

36“Ka gi ringoisapai guari re bara bangire, wo poi Yekova, si du tie atita aYisaraere ki nyasi ti du ni rikaaboro bara bangire nye anye kindi.”

37Ya Yekova wẽ: “Ka i rengbe na ringbisa pa angbangbaturũ ari yo, ka boro rengbe ka wisiga pa amburu kpotosende ku sende no, si du mi ka gindiga atita aYisaraere dunduko ti ni tipa agu apai dunduko mangi yo, wo poi Yekova.”

38“Mo ngére, aragoho naye, wo poi Yekova, ho i ka dua bakporo ni berewe tipa Yekova tona ti gu kirikiri gbata nga ga Ananere ki da ti Ngbadimo Tukpuhe.

39Gu ringbisiringbisi gene andu ku zegi yo tuturu, diiri sa gangara Gareba, ki sa tihe sa Goa.

40Gu ngboongboorago dunduko nga ga kangba aboro na akuke, na aati dunduko daku wiridi yo nga Kidirona, na tukpu Ngbadimo Farasi ku uroyo, si adú ni kparakpara ha ziazia fu Yekova. I adia nga ha baha te watadu gbandaka ha berewe nye anye kindi a te.”

← Chapter 30 Jump to: Chapter 32 →