Jeremiah 40

Zande

← Chapter 39 Jump to: Chapter 41 →

1Gu pai naaye koyo du Yeremaya ni yo du Yekova ni fuo mbu Nebuzaradana Yeremaya ko kuru Rama yo, Nebuzaradana nangia baira ababandarago, ho ko andu ni na ko ni vovo ko na azogbo na zizi yo dunduko nga ga Yerusarema yo na ga Yuda yo nga agu yo i andu na yo ni zizi yo ku Babera yo.

2Baira ababandarago adi Yeremaya ki ya fu ko, “Yekova ga Mbori agumba pa gi gbigbitapai re kuti gi ba re;

3Yekova ye na ni, ki mangi he a wa ko agumba ha. Bambiko oni aingi pai kuti Yekova, ka oni agia nga fugoko ya, si du ye gi pai ti ni re ku ri roni.

4Were, mo ngére, mi kusi ro areme rogo azogbo du ti bero. Ka si ngba ti ro ka ndu na mi ku Babera yo, mo yé, mi abánda ro wenengaĩ; ono ka si du bangiro wa ngba nga ha ka ndu na mi ku Babera yo te, ka mo ayé nga ya. Mo bi, ringara dunduko du ku bara bangiro; mo ndú yo berẽ mo ho ya ngba ha ti ro ka ndu ku ho ni, ru nangiro a.

5Ono ka mo nye, mo ki karaga tiro koyo du Gedana ni wiri Aikama, Aikama angia wiri Safana, nga gu ko bakindo aBabero amoi ko ni bazogo agu abaakporo nga gu du Yuda yo, mo ki niraki kpuko yo dagba aboro; watadu mo ndú ku ho berẽ mo ho ya yo ru ka ndu ku ho ni.” Si du baira ababandarago ki fu marã riahe fu ko na gamahe, ki mbu ko ko ndu.

6Si du Yeremaya ki ndu koyo du Gedaria ni wiri Aikama, ku Misipa yo, ki niraki kpuko yo dagba agu aboro i ambu yo rogo ringara.

7Ho abarutiri aborosovura dunduko rogo gu haúrago agi he ni na gayo aboro ya bakindo aBabero moi Gedaria wiri Aikama ni bazogo rogo ringara, ki fu akumba fu ko, na ade, na agude, agu yo nga gu kere rungorungo yo rogo ringara i andu nga na yo ni zizi yo ku Babera yo ya,

8i ki ndu koyo du Gedaria ni ku Misipa yo nga Yisamaere wiri Netania, na Yoanana wiri Karea, na Seraya wiri Tanumeta, na awiri Efe boro Netofa, na Yezanaya wiri boro Maka, i na gayo aboro a.

9Gedaria wiri Aikama. Aikama angia wiri Safana, ki ta zunga he fu yo na gayo aboro, niya, “Ka oni dú nga na gunde ka manga pa aKasado ya. Oni niraki rogo ringara, ka manga pa abakindo aBabero, si ki du fu roni wenengaĩ.

10Na tipa re, mi aráka Misipa yo, ka ru tipa roni barangba aKasado nga agu yo nikaye sa rani; ono tipa roni, oni dungura imekakue na zuzu ngua faarago na nzeme, ki igi he rogo gaoni aúsunge, ki niraki rogo gaoni abaakporo nga gu oni arogo.”

11Kina wo, ho agu aEbere dunduko naadu Moaba yo na dagba aboro Amona yo na ku Edome yo na rogo kura aringara agi he ni ya bakindo aBabero mbu yangara aYudo ki moi Gedaria wiri Aikama ni bazogo ku ri yo, Aikama angia wiri Safana,

12aEbere dunduko ki karaga tiyo rogo agu aba dunduko, nga gu i ado yo ku rogo ki yega ku ringara Yuda yo, koyo du Gedaria ni ku Misipa yo; i ki dungura imekakue na zuzu ngua faarago ni ngenge he.

13Were Yoanana wiri Karea na abarutiri aborosovura dunduko rogo haúrago ki ye koyo du Gedaria ni ku Misipa yo,

14ki ya fu ko, “Mo ini he ya Barisa bakindo aAmona kedi Yisamaere wiri Netanya ka imo ro?” Ono Gedaria wiri Aikama akpi nga nyemu ka ida ha ku ngba yo te.

15Si du Yoanana wiri Karea ki gumba pai ni rondo fu Gedaria niya, “Mo ídi he fere mi ndu ka imo Yisamaere wiri Netanya, ka boro aina nga ha wa sa ya. Tipagine ka ko imi ro ti ni, si du agu aEbere dunduko nadungura tiyo ku pati ro ki gbandaka, gu yangara yo nga ga aYudo yo ki kpiki?”

16Ono Gedaria wiri Aikama, ki ya fu Yoanana wiri Karea, “Mo amánga nga gi pai te re, bambiko mo nagumba pai ni zire kuti Yisamaere.”

← Chapter 39 Jump to: Chapter 41 →