Jeremiah 32

Zande

← Chapter 31 Jump to: Chapter 33 →

1Gu pai naye koyo du Yeremaya ni yo du Yekova ni ti bawe garã zogarago nga ga Sedekiya bakindo aYudo, nga gu nangia bawe na muambi garã zogarago nga ga Nebukadenesara.

2Ti gu rago re gu rikavura nga ga bakindo aBabero aru nguru pati Yerusarema, Yeremaya nangia nebi adu ni kisikisi ko ku vurukporo babandarago yo naadu tii ga bakindo aYudo bambu yo.

3Bambiko Sedekiya nga bakindo aYudo akisi ko, niya, “Tipagine gumba mo pai ti ni ki ya? ‘Ya Yekova wẽ, Mo ngére, mi nafu gi bakporo re ku be bakindo aBabero, ko ki di he;

4Sedekiya bakindo aYudo amérã nga be aKasado te, ono i afú ko ni rengo ku be bakindo aBabero ko ki nifu na ko kina ku ngbako, nibi kina boro bangiriko ni bangiriko;

5ko ki ndu na Sedekiya ku Babera yo, yo ko ka sunga ni daho mi ka ndu ni koyo du ko ni, wo poi Yekova; ka oni vura so vura kuti aKasado vurũ, oni adia nga be yo te.’ ”

6Yeremaya ki ya, “Sangba Yekova aye fere niya:

7Mo ngére, Anamere wiri Saruma nangia wiri unvuruabamo ayé kono du mi ni ki ya, ‘Mo ngbé gimi ati nga gu du Anatota yo, bambiko gu pai nga ga tumori na ngbehe nga gamo.’

8Si du Anamere wiri unvuruabuba aye kono du mi ni ku vurukporo babandarago yo, kuti sangba Yekova, ki ya fere, ‘Mo ngbé gimi ati nga gu du Anatota yo ringara Benyamina yo, tipa gu pai nga ga ukumbo na tumori nga gamo; mo ngbé he tipa ro.’ Si du mi ki ini he ya gere nga sangba Yekova.

9“Mi ki ngbe gu ati du Anatota yo re be Anamere wiri unvuruabuba, ki ringbisi marã fu ko, asekere feda bawe na saba.

10Mi ki ke rimore ti waraga ngbehe, ki dika ha, ki du na adezire he, ki niringbisi gu marã re ti úringbisaahe.

11Si du mi ki ndu na gu dikadika waraga re nga ga ngbe ati, du na gu ringbisapai ti ni na pande agu apai rogo ho, na gu zakizaki kpia ha;

12mi ki fu gu waraga ngbe ati re fu Baruka wiri Neriya, Neriya nangia wiri Maseya, ku bangiri Anamere wiri unvuruabuba, ku bangiri adezirehe nga agu yo nake rimoyo ti waraga ngbe ati, na ku bangiri aEbere dunduko nga agu yo nasungu vurukporo babandarago yo.

13Mi ki rugu Baruka ku bangiri yo, ki ya,

14‘Ya Yekova nga ga arimbasa ko, nga ga aYisaraere Mbori wẽ: Mo dí agi awaraga ngbe ati re, na gi dikadika waraga ngbe ati re a na gí zakizaki waraga ngbe ati re ki moi he ku runge yo, ya si ima tipa gbanga rago.

15Bambiko wo poi Yekova nga ga arimbasa ko, nga ga aYisaraere Mbori: I angbé abambu na aati na aati bakakue angbe berewe rogo gi ringara re.’

16“Fuo fu mi waraga ngbe ati fu Baruka wiri Neriya, mi ki kpari fu Yekova, niya:

17‘Ako Yekova Mbori! Mo du namangi ngbangbaturũ na kpotosende be ga bakere tandu na be taĩtaĩ bero! A nga pai ho kpakara foro susi te,

18mo nga gu ko nayugo weneringise fu aboro wa akutu ono mo naira bape nga ga abaagude ku ri awiriyo fuo yo, Ako bakere Mbori du na tandu apai du du rimoro nga Yekova nga ga arimbasa ko,

19du ni bakere ko rogo rugapai na ome rogo mangapai a; du na bangiro ni zaza ha sa ga aboro apai dunduko, nafu mosoro fu aboro ni ba sa sa kina kuti gayo apai na kuti zuzu gayo mangaapai;

20nayugu yuguyuguhe na iiriwo yuguyuguhe ringara Ezipeta yo, daku areme dagba aYisaraere na dagba arikaaboro dunduko, ki nitaasi rimoro tigamo wa du he ti gi uru re,

21Mo nakusi gamo aboro aYisaraere ringara Ezipeta yo na yuguyuguhe na iiriwo yuguyuguhe, ni nyanyaki bero na taĩtaĩ bero, na bakere kiki;

22mo ki fu gi ringara re fu yo, nga gu mo azunga he tipa ha fu abayo ka fu he fu yo, nga gu ringara du adu na mamuanya na nzeme anyege kpaima;

23i ki rimi ki di he ni gayo. Ono i agia nga sangbaro te watadu peka ga rugute a te; i amanga nga pai sa te ti agu apai mo arugu yo na ni dunduko i mangi he. Si du mangi mo gi gbigbitapai ti ni dunduko re si ye ku ri yo.

24Mo ngére, avura moi akanda kuti bakporo yo ka dia ha, bambiko basape na ngbongi na tata kaza i fu bakporo ti ni ku be aKasado naso vura kuti ni. Gu pai mo agumba, ragoho da, mo ngére, mo nabi he.

25Ako Yekova Mbori, ono mo aya fere, “Mo ngbé gu ati re na marã ki rogo adezire” ― ka i vura fu bakporo ku be aKasado vurũ.’ ”

26Sangba Yekova ki ye koyo du Yeremaya ni:

27niya, “Mo ngére, mi nga Yekova, nga ga aboro Mbori dunduko; he ho kpakara fere susi?

28Si du, ya Yekova wẽ: Mo ngére, mi nafu gi bakporo re ku be aKasado na ku be Nebukadenesara bakindo aBabero, ko adia ha.

29Agu aKasado naso vura kuti gi bakporo re i ayé ki moi we ti gi bakporo re, ki zo ho, wa sa na agu abambu i naazo fuõngua ri he yo ni motumo fu Bara, na mbirimbiri amotumo i nauka ha fu kura ambori a, ka gara gi zinga ku ri yo.

30Bambiko awiri aYisaraere na awiri aYudo amanga nga kura pai te ono kina gbigbitapai ku bangire tona ti rago parangayo; awiri aYisaraere amangi kina gu pai nagara gi zinga ku ri yo ni sunge sabeyo, wo doí Yekova.

31Gi bakporo re agara gi zinga ku ri he na gi ngariangaria zinga, tona ti gu uru i adua ha daku areme, si du mi adia ha ti bangire ku sa yo,

32bambiko gu gbigbitapai dunduko nga ga awiri aYisaraere na awiri aYudo nga gu i amangi ka gara gi zinga ku ri yo ― gayo abakindo na gayo abazogo, gayo aboromotumo na gayo anebi, aboro Yuda na araki Yerusarema yo a.

33I sa giiyo yo fere ono kpakpuyo te; mi ki vura yugo pai fu yo ni guari ngbatutu ka yugo ho ka i adega nga tuyo ka gia gi rugapai ya.

34I moi gayo kere gbegberẽ asino ku rogo gu bambu nga gu i ayambu ti rimore, ka birikosi he.

35I dudua tumbatumba arago nga ga Bara rogo ngboongboorago nga ga wiri Inomi, ka tumo na awiriyo nga akumba fu Moreke na awiriyo nga ade, zavura wa mi aruga nga yo na ni wo vuru ya, ka si adu nga rogo gi berã yo a ya, ya i nikamanga gi kere gbegberẽpai re, ka ingisa aYudo i ingi pai.

36“Were si du ya Yekova nga ga aYisaraere Mbori wẽ, tipa gu bakporo oni aya ti ni, ‘Si ni fufu he ku be bakindo aBabero be basape, be ngbongi, na be tata kaza’:

37Mo ngére, mi adungura yo rogo aringara yo dunduko nga gu mi ado yo ku rogo ho ni gi zinga na gi ngariangaria zinga na bakere imisiri ngbaduse; mi ayé na yo ku rogo gi ba re, mi ki idi he fu yo i niráki zezeredi.

38I ki du ni gimi aboro, mi ki du ni gayo Mbori.

39Mi afú ngbaduse sa fu yo na sino a sa, ya i gunde ti re nye anye kindi, wenepai ki du fu yo na fu awiriyo tigayo fuo yo.

40Mi amánga nyenye mokido na yo, ya mi asá nga tire ti manga wenepai fu yo te; mi ki moi gunde re ku kpotoyo yo, ya ka i sa nga tiyo ti re ya.

41Mi angi rogo pa manga mi yo yo wenengaĩ, mi ki ru yo rogo gi ringara re ni rengo, na kpotore yo dunduko na mbisimore dunduko a.

42“Bambiko ya Yekova wẽ: Wa ye mi na gi gbigbitapai re dunduko ku ri agi aboro re, kina wo mi ka ye na gu wenepai re nga gu mi akido yo tipa ha dunduko a.

43I angbé aati rogo gi ringara re nga gu oni naya ti ni, Si nga vurubate, zanga boro watadu nya; i fu he ku be aKasado.

44I angbé aati na marã, i ki ke rimo ti awaraga ngbehe ki dika ha ni dezire, rogo ga Benyamina ringara, rogo agu aba du pati Yerusarema kirikiri, rogo abaakporo nga ga Yuda, na abaakporo ringara agangara, rogo abaakporo tiditidi rago yo, na rogo agu abaakporo du Negebe yo; bambiko mi akáraga yo gene zia yo yo, wo poi Yekova.”

← Chapter 31 Jump to: Chapter 33 →