Jeremiah 13

Zande

← Chapter 12 Jump to: Chapter 14 →

1Ya Yekova fere wẽ, “Mo ndú ki ngbe roko giri dimose, ki vo ho dimoro, ka mo amóga nga ha ku ime yo ya.”

2Si du mi ki ngbe roko giri dimose kuti sangba Yekova, ki vo ho dimore.

3Sangba Yekova ki ye ni ue he kono du mi ni ki ya,

4“Mo di gu roko giri dimose nga gu mo angbe he, du dimoro, ki guari, ki ndu ku di yo nga Ferata, ki igi he yo rogo sarisari mbia.”

5Si du mi ki ndu, ki igi he pati di Ferata, wa Yekova arugu re.

6Fuo dungu arame Yekova ki ya fere, “Mo gúari, mo ndú ku Ferata yo, ki di gu roko giri dimose nga gu mi arugu ro mo igi he yo.”

7Si du mi ki ndu ku Ferata yo, ki ge rago, mi ki di gu roko giri dimose rogo gu ba ho mi aigi he ni. Mo ngére, roko giri dimose agberẽ; si angba nga tipa he wa sa te.

8Sangba Yekova ki ye kono du mi ni ki ya:

9“Ya Yekova wẽ: Mi agbárasa gu ruka nga ga Yuda kina wo na gu bakere ruka nga ga Yerusarema.

10Gi gbigbita aboro re, naka pa gia gimi apai, napeka gayo mumungo aberã du kpotoyo yo ki nindu fuo kura ambori ka manga pa ha ki niirisi he, i adú wa gi roko giri dimose re, nga gu angba nga tipa he ya.

11Bambiko wa roko giri dimose nika kuti dimo boro, kina wo mi amangi ga Yisaraere aboro dunduko na ga Yuda yo i ka kuti re, wo poi Yekova, ya i du ni aboro fere, ni rimo, ni tambuahe, na ni taarimo, ono i akpi nga nyemu ka dega tuyo te.

12“Mo agúmba gi pai fu yo re: ‘Ya Yekova nga ga aYisaraere Mbori wẽ, “Akambu ni ba sa sa adú ni hisihisi he na imekakue.”’ I ayá foro, ‘Ani aina nga ha ni rengo ya akambu ni ba sa sa adú ni hisihisi he na imekakue, te?’

13Mo ki ya fu yo tie, ‘Ya Yekova a wẽ: Mo ngére, mi ahísa araki dunduko rogo gi ringara re na imekakue i kpi he: nga agu abakindo nasunga ri ga Dawidi mbatabakindo, na aboromotumo, na anebi, na araki Yerusarema yo dunduko.

14Mi ki nifoko yo gu ni kuti kura ni, abayo na awiriyo wa sa, wo poi Yekova. Mi aina nga pai fu yo ki banda yo te, nungayo adú nga ti re a te, mi ka mbu pa gbarasa yo.’ ”

15Oni gi he ki ye turoni; ka oni kíisi nga pa tironi ya, bambiko Yekova gumba pai.

16Oni fú taarimo fu Yekova gaoni Mbori mbata ko nikaye na bitimo, mbata nduroni nikakota nziinzii rago yo ri abaagangara, na ho oni ka angera ni tipa imarago ko asá ha ni iyo rago ki sa ha ni nduunduu bitimo.

17Ono ka oni adéga nga turoni ya, mbisimore akpára ni gbuko tipa gaoni ruka; bangire akpára niimi ki niga na aume, bambiko i ndu na ga Yekova rimbasa aboro ni zizi yo.

18Mo yá fu bakindo na fu nabakindo: “Oni súngu auru tiditidi ba, bambiko gaoni betedi kpakpari bakindo zorõ ku sande ri roni yo.”

19I ki kisi agu abaakporo du ku Negebe yo, boro ho ka za ha te; i ga na aYudo dunduko ni zizi yo, i ga na yo dunduko ni zizi yo.

20“Oni túka bangironi ku ari ka bi agu yo ye nodiyo. Wari du gu rimbasa akandoro ni nga agu ra i afu ra fu roni, gaoni betedi rimbasa akandoro?

21Gini pai oni ka gumba ha ho i ka maa agu yo ni ku ri roni nga agu yo kina roni ayugu pai fu yo, i dú ni abadiaroni? Aima azía nga roni te, wa gu nga ga de rago vunga?

22Ka oni ya ku kpotoroni yo, ‘Tipagine agi apai aye ti ni re ku ri rani?’ si bambiko gu babakere irairapai nga gaoni ya i tumba gaoni abaaukadi ku ari, oni ki niegerã be nyanyaki pai.

23Boro Etiopia rengbe ka sa kpotoni watadu mama ka sa zeru? Ka si du wo oni rengbe ka manga wenepai a nga agu roni inidi manga kina gbigbitapai.

24Mi agbándaka roni wa umuhe yuge ngbi ngume naya na ni.

25Gere nga gaoni kparakpara he, gu bete he ringbisi mi fu roni, wo poi Yekova, bambiko bangironi go ti re oni ki nikida kuti pa azire.

26Mi ni tire nikatumba gaoni abaukadi ku ari sa kpakpuroni, i ki bi gaoni zee.

27Mi bi gaoni kere gbegberẽ asino, gaoni abari na gaoni kparakpe wa farasi, gaoni gbakaka kere nyemu bari, ri agangara ati yo. Ako Yerusarema, na gberẽ he fu roni! Rago adú waã mbata oni nikagira?”

← Chapter 12 Jump to: Chapter 14 →