Jeremiah 5

Zande

← Chapter 4 Jump to: Chapter 6 →

1Mo óro koyo na kono ngba agene bakporo Yerusarema, mo ngere ki bi nga! Mo wísigi gaha avurukporo ka bi si ngia mo rengbe ka bi boro yo, nga gu ni nasara ngbanga ni ruru he, ki nigbata rengo; ya mi vu bakporo ti gaha gbegberẽpai.

2Ka i vura ya, “Wa du Yekova ni ungako,” i nazunga he ni zire.

3Ako Yekova, bangiro nangera nga tipa rengo te? Wa ta mo yo, ono i aina nga pa imisiri he te; mo vura manga yo vurũ, ono i ka pa rugapai. I nyakasi kpakpuyo gbe ki susi mbia; i ka pa saberã.

4Mi ki ya tie, “Agi yo re nga kina rungorungo yo, wene berã ti yo te; bambiko i aina nga gu pai nga ga Yekova te, nga ga gayo Mbori rurungbanga.

5Mi andú sa gu bakikindigi yo, ki gumba pai fu yo; bambiko i ini gu pai nga ga Yekova, nga ga gayo Mbori rurungbanga.” Ono i dunduko kuadi agonga wa sa, i kafu azogbo.

6Si du bahu bire yo aímo yo, waru ngbi ngume yo agbárasa yo. Mama napida gayo abaakporo, agu yo nakura ku zegi yo u asípa yo rukutu; bambiko gayo samungu ni dungu he, gayo pa tikusayo du ni bakere he.

7“Waĩ rengbe mi ka vu roni? Awironi mbu re, ki zunga he fu agu yo angia nga ambori ya. Ho mi arigi yo ni i ki mbiki, i amangi bari ki ndu ni rimbasa yo sa ga airaban abambu.

8I adu wa abaafarasi i arigi ra wenengaĩ, i ni ba sa sa nakpara wa farasi tipa dere akurayo.

9Mi ambúsa nga yo tipa agi apai te re? wo poi Yekova; mi aira nga bape ku ri rikaaboro wa ngbatunga agi yo te re?

10“Mo ndú dagba gaha agene baka kue ki gbarasi he, ono ka mo gbárasi nga ha du ya; mo kúya abehe ku sa yo, bambiko i nga ga Yekova yo te.

11Bambiko ngbatunga Yisaraere na ngbatunga Yuda i mangi pai ni biriki kuti re, wo poi Yekova.

12I gumba pai ni zire kuti Yekova, ki ya, ‘Ko amánga nga pai te; gbigbitapai ayé nga ku ri rani te, ani abí nga basape watadu ngbongi a te.

13Anebi asa tiyo wa yuge; pai rogo yo yo te. Were si ka manga fu yo!’”

14Si du ya Yekova nga Mbori nga ga arimbasa ko wẽ: “Bambiko i gumba gi pai re, mo ngére, mi namaa gimi apai ku ngbaro yo wa we, ki sa agi aboro re wa ngua, we ki riti yo.

15Ako ngbatunga aYisaraere, oni ngére, mi naye na rikaaboro gii ngbi yo ku ri roni, wo poi Yekova. I nga nyenye rikaaboro, i nga bakuru rikaaboro, gu rikaaboro oni aina nga pa fugoyo ya, ka oni aruga nga tironi na gu pai i agumba ha ya.

16Gayo kporo wa gbagaza murã, i dunduko nga nyanyaki aboro.

17I arita gaoni kekeahe na gaoni riahe; i arita awironi nga akumbagude na adegude; i aríta gaoni rimbasa akandoro na gaoni zogozogo anya; i aríta gaoni abakakue na gaoni avurumo; gaoni abaakporo ngapa nga gu oni nakida kuti ni i agbárasa ha na basape.”

18“Ono zavura rogo agu arago re, wo poi Yekova, mi anyása nga roni dú te.

19Ho gaoni aboro ka ya ni, ‘Tipagine Yekova gaani Mbori amangi agi apai ti ni re fu rani?’ oni ayá fu yo, ‘Wa oni ambu re ki niirisi kungba ambori rogo gaoni ringara, wo oni ka irisa kungba aboro rogo gu ringara angia nga gaoni a ya.’ ”

20Oni táki pande gere fu ngbatunga Yakoba, ki tungusi he ku Yuda yo;

21“Ako airamungo nga aboro zanga wene berã, oni gí gere, nga agu roni du na bangirise, ka oni abi nga he ya, du na tue, ka oni agia nga pai ya.

22Oni agunde nga ti re te? wo poi Yekova; Oni akio nga bara bangire te? Mi ba ngume wa ngbongbo baime ni nyenye naiga ha nga gu si arengba nga ka sira ha ya; ka ngiri baime vura ka fo ho vurũ, si arengba nga ka dia be he te, ka si vura rikita, si arengba nga ka yara ri he te.

23Ono agi aboro re du na nyanyaki ngbadu samungu; i sa tiyo ku bani ki ndu ku sa yo.

24I aya nga kpotoyo yo, ‘Ani gúnde ti Yekova nga gaani Mbori’, te, ‘nafu mai ti regbo ho, mamu faarago na mamu zere, ki nibanda aposo tipa rani ni ringbisiringbisi he tipa rago ke ahe.’

25Gaoni irairaapai sa agi apai re ku sa yo, na gaoni ingaapai ki ka na wenepai be roni.

26Bambiko i bi gbegberẽ aboro dagba gimi aboro yo; i nagbu wa abaziazire nasunguda ra. I re gbina; i ki zi kina aboro.

27Wa baga nihi be azire, gayo abambu hiki be biriki; si du i sa tiyo ni bakikindigi yo ni airakumuko,

28i kindigi, kpotoyo ki du rõrõrõ. I aina nga pa dingisa manga gbigbitapai te; i asara nga ngbanga na rurupai te na gu pai nga ga awirinyaure, ka manga ha si u a te, ka i aberã nga pa gu pai ru aru tipa irazingohe a ya.

29Mi ambúsa nga yo tipa agi apai te re? wo poi Yekova, na mi aíra nga bape ni tire ti ngbatunga rikaaboro wa gi te re?”

30Baiiriwo pai ni kere he mangi rogo ringara;

31anebi gumba pai ni zire, aboromotumo ki nirũ ndika ni gayo rugapai; gimi aboro nakpi nyemu si du wo, ono gini pai oni ka manga ha ho digidaha ka da ni?

← Chapter 4 Jump to: Chapter 6 →