Jeremiah 18

Zande

← Chapter 17 Jump to: Chapter 19 →

1Gu pai naye koyo du Yeremaya ni yo du Yekova ni:

2“Mo gúari, ki zorõ ku bameakoro yo, yo mi ka ida ha ni foro mo gi gimi apai.”

3Si du mi ki ndu ku bameakoro yo, ko ki nimangi sunge yo ti gako ngbagida me ahe.

4Gu pere ko ame rogo pere si agberẽ be bamehe, ko ki sa ha berewe ni kura pere, wa si arengbe bangiri bamehe ka me he.

5Sangba Yekova ki ye kono du mi ni niya:

6“Ako aboro aYisaraere, ka mi rengbe nga ka manga na oni wa gi pai mangi gi bameakoro te re? wo poi Yekova. Ako aboro aYisaraere, oni ngére, wa pere ku be bameakoro yo, wo du oni ku be re.

7Ka ngia ti gu rago ka mi taki pande pai tipa gu rikaaboro watadu aboro gu ngbi, ya mi amófa yo ki kuadi yo ku sande ki gbarasi yo,

8ka gu rikaaboro re, nga agu yo gumba mi pa yo, sa tiyo ti gayo gbigbitapai, mi abíra tire ti gu gbigbitapai mi aberã pa manga yo na ni.

9Ka ngia ti gu rago ka mi taki pande pai tipa gu rikaaboro watadu aboro gu ngbi nga agu yo mi ka dua yo na ka nyakasa yo,

10ka i mángi gbigbitapai ku bangire, ka i adéga nga tuyo sa sangbare ya, si du mi ka bira tire ti ni ti gu wenepai mi aberã pa manga ha fu yo.

11Were, si du, mo yá fu aboro Yuda na araki Yerusarema yo: ‘Ya Yekova wẽ, Oni ngére, mi nabeda gbigbitapai kuti roni ki nisangi apai kuti roni. Oni sá tironi, aboro ni ba sa sa ti gayo gbigbitapai, ki mbakadi gaoni apai na gaoni mangaapai.’

12“Ono ya yo, ‘Gure si gbua! Ani apéka kina agu apai ani akpi nyemu he, aboro ki nimangi pai ni ba sa sa ku sangba gu mungo nga ga gbigbita ngbaduyo yo.’

13“Si du ya Yekova wẽ: Oni sána he ku dagba arikaaboro yo, da nagi pai wa gere? Gu ngasu de nga Yisaraere mangi kere gbegberẽpai.

14Gu morogumba du ri Rebanona si guari ri agu ambia du ringara yo? Aime bagangara nafu ku padiyo ni zezere he ki ugudi?

15Ono bangiri gimi aboro go ti re, i zo fuõngua fu kungba ambori; i kotokosi yo ngba gayo agene, ngba kuru agene, ki ndu ku rogo pa vuru gene, ngba bagene te,

16ki sa gayo ringara ni bate, ni gu he aboro naumo ho nye anye kindi. Agu aboro nasusa pati he ni ba sa sa ki kigi ki nipikipo riyo.

17Mi agbándaka yo wa yuge ku uroyo barangba avurayo. Mi ayúgo kina giire yo fu yo, ono kpakpure te, ti rago gayo gberãngbi.”

18I ki ya, “Oni yé, ani mángi biriki kuti Yeremaya, bambiko rugute anyása nga be boromotumo te, na rondo be iratatamana, watadu pai ngba nebi a te. Oni yé, ani tá ko ni mirãrani, ka ani adéga nga turani sa gu gako apai re ya.”

19Ako Yekova, mo dége turo fere, ki ye turo sa agu apai agu yo nagumba ha nati kango na mi.

20Ka gbigbitapai iri bape wenepai? Ono i ge due tipa ungare. Mo tingidi pa waĩ mi aru ku bara bangiro ka gumba wenepai tipa yo, ka sa ga zinga ku sa yo ti yo.

21Si du mo kúsi awiriyo sa ngbongi; mo fú yo sa tandu basape, adiayo sá tiyo ni airazangada ni adekurugbo. Gayo akumba ki nibi kpio be tata kaza, gayo aparanga ki nikpi be basape rago sovura.

22I gi kpe ku kpuyo yo, ho mo ka ye ni na aborosovura gbuahe rure ku ri yo! Bambiko i ge due ka zia re rogo ho, ki reke agbina tipa ndure.

23Ono mo, Ako Yekova, mo ini gayo tabura ka imo re. Ka mo vú nga yo tipa gayo irairapai ya, ka mo gbándaka nga gayo ingapai bangiro a ya. I sika yo bara bangiro; mo mángi yo rago ga zinga.

← Chapter 17 Jump to: Chapter 19 →