Jeremiah 16

Zande

← Chapter 15 Jump to: Chapter 17 →

1Sangba Yekova ki ye kono du mi ni niya:

2“Mo adia nga de te, mo adú nga na awiro nga akumbagude na adegude rogo gi rago te re.

3Bambiko ya Yekova wẽ tipa agu akumbagude na adegude vungu yo yo rogo gi rago re, na tipa agu anayo nabatika yo na agu abayo nabatika yo rogo gi ringara re:

4I akpíka be kere akaza. I aréngba nga na kpara yo nita ngbaduse te, i akpísida nga yo a te; i adú wa regbo anya sande. I akpíka be basape na ngbongi, akangbayo ki du ni riahe fu azire ari na fu anya kpotosende.

5“Bambiko ya Yekova wẽ: Ka mo rími nga ku dimokpe yo ya, watadu ndu ka ta ngbaduro ni kpenunga watadu ka kpara kpe a ya; bambiko mi di gi zereda ti agi aboro re ku sa yo, wo poi Yekova, na gi weneringise na gi wene nunga aboro.

6Kindigi pa yo akpíka na umba pa yo rogo gi ringara re; i akpísida nga yo te, ka boro akpara nga yo nata ngbaduse watadu dewa tini watadu kpe rini tipa yo a ya.

7Boro akita nga kpokuta fu kparikpe, ka ngarãsi ni tipa kpio boro te; a nga boro sa nikafu uwasa fu ni ni mbiri he tipa pa kpio bani watadu nani a te.

8Mo andú nga ku kporo pumbo yo ka sunga na yo te, ka ri gu he na mbira he yo a te.

9Bambiko ya Yekova nga ga arimbasa ko, nga ga aYisaraere Mbori wẽ: Mo ngére, mi anyása fugo wasa na fugo ngbarago rogo gi rago re ku bangironi na ti rago gaoni arame, na fugo badide na fugo didide a.

10“Ho mo ka gumba agi apai ni dunduko re fu agi aboro re, i ki ya foro, ‘Tipagine gumba Yekova gi bagbigbitapai ti ni re dunduko kuti rani? Gini nga gaani irairaapai? Gini ingapai mangi ani kuti Yekova gaani Mbori?’

11Mokiyafuyo: ‘Bambiko abaroni mbu re, wo poi Yekova, ki ndu fuo kura ambori ki nimangi pa ha ki niirisi he, ki mbu re ka i aka nga kuti gi rugute ya,

12bambiko ani mangi he gbegberẽ susi ga abaroni, bambiko oni ngére, aboro ni ba sa sa dagba roni napeka kina gayo mumungo berã nga ga gbegberẽ kpotoyo yo, ki ka pa dega tuyo fere;

13si du mi ka bafa roni ti ni ku zegi yo rogo gi ringara re ku rogo gu ringara oni aina nga ha na abaroni ya, yo oni ka manga pa kura ambori ni uru na yuru, bambiko mi ayúgo nga inapai fu roni te.’

14“Si du, oni ngére, ragoho naye, wo poi Yekova, ho i ka ya nga ni berewe wẽ ‘Wa du Yekova ni ungako naye na awiri aYisaraere ringara Ezipeta yo,’ ya,

15ono ‘Wa du Yekova ni ungako naye na awiri aYisaraere rogo ringara nodiyo na rogo agu aringara dunduko yo ko ado yo ku ho ni.’ Bambiko mi ayé na yo berewe kina ku rogo gayo ringara nga gu mi afu fu abayo.

16“Oni ngére, mi nakeda sunge tipa dungu abaziatĩo, wo poi Yekova, i azía yo; mi ki kedi sunge giza tipa abamangi anya, i ki nigbata yo ri abaagangara yo ni ba sa sa na ri agangara na rogo siambia yo.

17Bambiko bangire du ti gayo apai dunduko; i agbu nga be re te, gayo irairapai ni okooko ho ti bangire a te.

18Mi ki fu mosoro tipa gayo irairapai bara ue na tipa gayo ingapai, bambiko i birikosi gi ringara ni gayo kuakua kere kpiaahe, ki hisi gu ringara mi afu fu yo na gayo kere gbegberẽ asino.”

19Ako Yekova, nga gi ome nga gi nyanyaki gbata, gi bagbuko rago fudifudipai, arikaaboro ayé koyo du mo ni ti digida kpotosende yo niya: “Abarani adi kina pa zire ni gayo he, nga gu kungba ahe adu nga u rogo ho ya.

20Boro rengbe ka manga ambori fu tini? Ngbatunga gu angia nga ambori ya!”

21“Si du oni ngére, mi ayúgo pai fu yo, bara sa mi ka yugo pa gi tandu na gi ome i ki ini he, i ki ini he ya rimore nga Yekova.”

← Chapter 15 Jump to: Chapter 17 →