Jeremiah 51 — Zande

1Ya Yekova wẽ: “Mo ngere, mi awo ti toro bagbarasirago kuti Babera, na kuti araki Kasado yo;

2mi ki kedi abaigitaahe ku Babera yo, i ki igita ha, ki he gaha ringara ni ku he, ho i ka ye ni kuti ni rogo pavururago yo dunduko ti rago fudifudipai.

3Ka baaguanza gbé nga gako mboto ya, ka ko rú nga na gako rokomarã ti ko a ya. Ka i mbú nga gaha aparanga ya; i bá tunga gaha rimbasa aboro kpakaya.

4Kangbayo atiwa ku sande ringara aKasado yo, agu yo ki du ni rupurúpu yo puu ngba gaha gene bakporo.

5Bambiko aYisaraere na aYudo gayo Mbori ambu nga yo te, nga Yekova nga ga arimbasa ko; ono ga aKasado ringara du na pai ku ri he gbe, wa zingi he kuti gu Ziazia Ko nga ga aYisaraere ko.

6“Oni gúari bangbanda Babera, aboro ni ba sa sa bátasi kina ungayo! Ka i kpára nga roni ku sa yo rago gaha mbusa ya, bambiko gere nga rago ga Yekova irabape, gu irabape ko afu fu he.

7Babera adu wa inga dahabu be Yekova nimangi kpotosende dunduko si kpi imekakue; arikaaboro mbiri gaha imekakue, si du zi mungo arikaaboro ti ni.

8Babera ki ti rure ki kuadi; oni yóro wawa tipa ha! Oni dí tomengua nga ngua kaza tipa gaha ima; isoke si ahu.

9Ani akpi nyemu ka husa Babera, ono ka si ahu nga ya. Oni mbú he, ani ndú ni ba sa sa sa kina gaani ringara; bambiko gaha sarangbanga da ku ngbangbaturũ yo ki du ni tumbatumba ha da kuti vuro ngbangbaturũ.

10Yekova kusi gaani rurupai; oni yé, ani táki pande he Siona yo gu mangaapai nga ga Yekova gaani Mbori.

11“Oni bédi aguanza! Oni rogo auvura! Yekova wo ti toro abakindo aMedai, bambiko gu pai ko aberã ha kuti Babera nga ka gbarasa ha, bambiko gure nga gu irabape nga ga Yekova, irabape tipa gako yekaru.

12Oni túmba bendere kuti ngapa bakporo Babera; ki moi rago nyanyaki; ki moi ababandarago; ki mbakadi ba runguru; bambiko Yekova ta ruga pai ki mangi gu pai ko agumba tipa araki Babera yo.

13Ako mo ninaraka pangba dungu aime, nga irakumuko rogo kikiipaahe, digida ga pai da, giri ga unga kati.

14Yekova nga ga arimbasa ko zunga he ni tiko niya: Mi ahísa roni ni aboro ni rengo ni ngenge yo wa abakirigba, i atá tatangba nga ga diabese ku ri roni.

15“Ko nga gu ko namangi kpoto sende ni gako tandu, nanyakasi zegino ni gako tatamana, ko ki zaraga angbangbaturũ mbiko gako rugatinapai.

16Ho ko nagumba fugoko ni gbarakagbaraka ki du rogo aime angbangbaturũ yo, ko namanga nduro si guari ti digida kpotosende yo. Ko namanga aikpira gumba tipa mai, ko ki nikusi yuge rogo gako abaigaahe yo.

17Aboro ni ba sa nga airazuu nga azangainahe; apangu dahabu du na zee ni ba sa sa be gayo kpiaahe; bambiko gayo sese kpiaahe nga úzire, onga rogo ho yo te.

18Si nga kungba he, nga sunge ni ũzire; ti rago gayo mbusa si akpí akpi.

19Gu ko nga ga Yakoba ko ko wa agi yo te re, bambiko ko nga gu ko namangi ahe dunduko, Yisaraere ki du ni gu ngbatunga nga gako kumuko; rimoko nga Yekova nga ga arimbasa ko.

20“Oni nga gi bande na gi marãvura: mi di roni ki kuadi arikaaboro rukutu na oni; mi di roni ki gbarasi angbi na oni;

21mi dí roni ki kuadi farasi na banduriru rukutu na oni; mi di roni ki kuadi ngbagidavura na bandurihe rukutu na oni;

22mi di roni ki kuadi kumba na de rukutu na oni; mi di roni ki kuadi gbinza kumba na paranga boro rukutu na oni; mi di roni ki kuadi paranga kumba na paranga de rukutu na oni;

23mi di roni ki kuadi babanda akandoro na gako rimbasa anya rukutu na oni; mi di roni ki kuadi basopobino na gako rika anya rukutu na oni; mi di roni ki kuadi abarutirivura na abanyaki rukutu na oni.

24“Mi afú mbusa fu Babera na fu araki ringara Kasada yo dunduko ku bangironi tipa gu gbigbitapai dunduko nga gu i amangi Siona yo, wo poi Yekova.

25“Ako bagangara nagbarasa ahe, mo ngére, mi gbarasi rimoro, wo poi Yekova, nga gu ko nagbarasa kpotosende dunduko; mi atáã bere sa ro, ki wirigi ro ri mbia yo ku sande, ki sa ro ni gbitiri bagangara.

26A nga mbia sa i ka dia ha ti ro ka maa ha ti tukpu ahe te na mbia tipa mburu bambu a te, ono mo adú ni vurubate nye anye kindi, wo poi Yekova.

27“Oni túmba bendere ku ari auru kpotosende, oni vúdi nambongo dagba arikaaboro; oni mbakadi arikaaboro tipa sovura kuti ni, oni yámbu angbi kuti he, nga Ararata, na Mini, na Asekenaza; oni ringbisi bazogo tipa ha, oni yé na afarasi wa kere abakirigba.

28Oni mbakadi arikaaboro tipa sovura kuti ni, abakindo aMedai, na gayo abarutirivura na abanyaki, na aringara ni ba sa sa du ku tii gayo zogarago.

29Ringara nakio ki nisoronga rogo ima, bambiko gu pai Yekova aberã paha kuti Babera du ku ba ha, ka sa gu ringara nga Babera ni úkiga, zanga araki rogo ho.

30Agu airanyaka du Babera yo i mbu sovura, i nye kina rogo gayo nyanyaki aba; omeyo ti bungudu, i sa tiyo wa kina ade; we nazo gaha abambu, gaha angbongbo bakporo kuadi.

31Iraoto sa naora ka gbia kura ko, bamokedi sa naora ka gbia kura ko, ka gumba ha fu bakindo aBabero ya i di gako bakporo ti bangbanda apavuruhe dunduko;

32i zi basigoime du, i zo andugu na we, abasovura ki gunde.

33Bambiko ya Yekova nga ga ari mbasa ko nga ga aYisaraere Mbori wẽ: Aboro Babera du wa bataka zende ahe ti gu rago ho i nataka he ni yo; fuo rago ngbutuko rago gayo ke ahe ki da.”

34Araki Siona yo yá, “Nebukadenesara bakindo aBabero riti rani, ko fudi rani; ko mangi rani wa ku akoro, ko mbiri rani wa nyaime du wa kpaka nimbiri he; ko hisi vuko na gaani wene ariahe, ko ba rani ku zegi yo. Gu zuu namangi fu rani na fu agume rani si dú ku ri Babera.” Yerusarema yá, “Kurere du ku ri araki Kasada yo.”

36Si du ya Yekova wẽ: “Oni ngére, mi azúngadi he tipa roni ki iri bape roni. Mi aúgudisa haga baime tikpo ki ugudisi haga gugaabi;

37Babera ayé ka du ni guguda ni baraka tipa ahúa, ni ũkiga ni ũumohe, zanga araki rogo ho.

38“I apázuo wa sa wa abahu; i aérã wa paranga abahu.

39Ho gayo zinga ka runguda ni mi ambakada pumbo fu yo, ki mangi yo i kpi mbirimbiri he, daho he ka maka yo ni, i ki ra nyenye rame ka i azinga nga berewe ya, wo poi Yekova.

40Mi ayé na yo wa awiri akandoro sa imo ra, wa abaakandoro na abaameme.

41“Ako, i di Babera, i zi gu tambuahe nga ga kpotosende dunduko! Ako, Babera sa tihe ni úkiga dagba arikaaboro!

42Baime tikpo fu ri Babera; si du ni dadidadi he be gbarakagbaraka angiri baime.

43Gaha abaakporo ye ka du ni úkiga, ni ringara ugure na kungba ngbi, ringara nga gu boro araka nga rogo ho wa sa ya, gu ka wiri boro asusa nga rogo ho a ya.

44Mi ki mbusi Bere Babera yo, ki kusi gu he ngbaha yo si ambiri he. Arikaaboro andú nga koyo du he ni berewe te; ngapa bakporo nga ga Babera ti.

45“Oni kúru bangbanda ha yo, oni nga gimi aboro! Aboro ni ba sa sa bátasi kina ungayo be gu ngariangaria zinga nga ga Yekova!

46Ka he máki nga roni kpotoroni yo ya, ka oni adú nga na gunde a ya mbiko gu pangbanga oni agi rogo ringara, ho pangbanga naye ni rogo garã sa kura pangbanga ki ye rogo kura garã sa fuo gure, pa zuu ki du rogo ringara, gu bazogo ki du kuti gu bazogo.

47“Si du mo ngére, aragoho naye ho mi ka mbusa gu sese kpiaahe ni nga ga Babera; i bá zee ku ri gaha ringara dunduko, gaha kangba aboro ki nitiwi bangbanda ha.

48Si du angbangbaturũ na kpoto sende, na agu ahe dunduko du rogo ho, abí biasima ku ri Babera; bambiko abagbarasiahe ayé nodiyo sa yo, wo poi Yekova.

49Babera ka ti tipa kangba agu yo nga ga aYisaraere yo, wa kangba agu yo nga ga kpotosende yo ati tipa Babera dunduko.

50“Agu roni naabati be basape oni ndú, ka oni rú nga zaa ya! Oni tingidi pa Yekova wa du oni tuturu, tingida pa Yerusarema yé ku rogo gaoni berã:

51‘I ba zee ku ri rani, bambiko ani gi pa gbarasarimo; pa zee zi rani bambiko akare ye ku rogo kparakpara aba nga ga ga Yekova bambu.’

52“Si du, mo ngére, aragoho naye, wo poi Yekova, ho mi ka sara ngbanga ni ku ri gaha sese kpiahe, na rogo gaha ringara dunduko gu hõgihõgi yo aúko.

53Ka Babera vura bita ku ngba ngbaturũ yo, ka si vura nyakasa gaha nyanyaki ba ni sosonoho vurũ, abagbarasiahe aye yo du mi ni ku ri he, wo poi Yekova.

54“Oni dége turoni! kpe ye Babera yo! Woro buna rago ni bakere he ye ringara aKasado yo!

55Bambiko Yekova nagbarasa Babera, ki niza gaha fugo ome. Angirihe napaa wa dungu abaime, woro fugoho tumba tihe;

56bambiko bagbarasiahe ye ku ri he, ku ri Babera; i zi gaha airanyaka, gayo amboto kuadi rukutu; bambiko Yekova nga Mbori naira bape, ko anyása paha ni rengo.

57Mi amánga gaha abazogo na gaha airatatamana i kpi mbirimbiri he, na gaha abarutirivura na gaha abanyaki, na gaha airanyaka a; i ará nyenye rame ka i azinga nga berewe ya, wo poi Bakindo du rimoko nga Yekova nga ga arimbasa ko.

58“Ya Yekova nga ga arimbasa ko wẽ: Gu bananaga ngapa bakporo nga ga Babera adú kpasakpasa ku sande, na gaha gbanga angbadimo i azó ho ni we. Aboro namanga sunge gbua, arikaaboro ki nimbusi tiyo tipa kina we.”

59Gu pai Yeremaya nangia nebi arugu Seraya na ni nangia wiri Neriya, Neriya angia wiri Maseya; ho Serava andu ni na Sedekiya bakindo aYudo ku Babera yo, rogo biama garã gako zogarago. Seraya nangia baira aúsunge.

60Yeremaya ki ke pa gu gbigbitapai dunduko rogo kitabu nga gu nikaye ku ri Babera, nga agu apai dunduko du ni keke he tipa Babera.

61Yeremaya ki ya fu Seraya: “Ho mo ka da ni ku Babera yo, mo bi he ya mo gédi agi apai dunduko re,

62ki ya, ‘Ako Yekova, mo aya tipa gi ba re ya mo akpara ha ku sa yo, si du ka he araka nga rogo ho ya, boro, watadu nya a te, si ki du ni vurubate nye anye kindi.’

63Ho mo ka nyasa geda gi kitabu ni re, mo ki vo mbia kuti ni, ki ba ha ku bebere di yo nga Ferata,

64ki ya, ‘Wo Babera nikarinda, ka si akúra nga berewe ya, bambiko gu gbigbitapai nga gu mi naye na ni ku ri he.’ ” Were ga Yeremaya apai adigi ku erẽ.