Jeremiah 34

Zande

← Chapter 33 Jump to: Chapter 35 →

1Gu pai naaye kono du Yeremaya ni yo du Yekova ni, ho Nebukadenesara bakindo aBabero aso vura ni kuti Yerusarema na kuti gaha abaakporo dunduko na gako rikaaboro dunduko na agu angbi dunduko nga ga kpotosende ko azogo na aboro dunduko:

2“Ya Yekova nga ga arimbasa ko wẽ: Mo ndú ki gumba pai fu Sedekiya bakindo aYudo ki ya fu ko, ‘Ya Yekova wẽ: Mo ngére, mi nafu gi bakporo re ku be bakindo aBabero, ko azó ho na we.

3Mo amérã nga be ko te, ono i azía ro azia ni rengo ki fu ro ku be ko; mo abí bakindo aBabero ni boro bangiro ku bangiriko ki fura na ko kina ku ngbako; mo ki ndu ku Babera yo.’

4Ono mo gí nga ga Yekova pai, Ako Sedekiya bakindo aYudo! Ya Yekova tipa ro wẽ: ‘Mo akpi nga be basape te.

5Mo akpi rogo zereda. Wa i azo fuõngua tipa abamo, nangia gu bambata abakindo naadu mbata foro, si du aboro ka azó fuõngua ti ni tipa ro ki nikpari nita ngbaduyo tipa ro, niya, “Ako, gbia!”’ Bambiko mi gumba pa ha, wo poi Yekova.”

6Si du Yeremaya ki gumba agi apai dunduko re fu Sedekiya bakindo aYudo, ku Yerusarema yo,

7ho ga bakindo aBabero rikavura aso vura ni kuti Yerusarema na kuti abaakporo dunduko nga ga Yuda nga gu nan ye nangia Rakisa na Azeka; bambiko agere nangia abaakporo ngapa nga ga Yuda nga gu nanye.

8Gu pai naaye kono du Yeremaya ni yo du Yekova ni, fuo manga Bakindo Sedekiya mokido na aboro Yerusarema dunduko ka taka pande raniri fu yo,

9ya aboro ni ba sa sa mbu gayo akanga i du ni ri yo nga aEbere, kumba na de, ya ka boro sa nga boro Yuda nga wirinani ni kanga berewe ya.

10I ki gi sangbako, abazogo dunduko na aboro dunduko nga agu yo namangi mokido ya aboro ni ba sa sambu gayo akanga i du ni ri yo, nga akumba watadu ade, ka i du nga berewe ni akanga ya; i ki gi sangbako ki mbu yo i du ni ri yo.

11Ono i asa pa ha giza, ki rogo agu akumba na ade berewe nangia akanga i ambu yo i du ni ri yp, ki ye na yo i du ni akanga berewe.

12Sangba Yekova ki ye kono du Yeremaya ni yo du Yekova ni:

13“Ya Yekova nga ga aYisaraere Mbori wẽ: Mi amangi mokido na abaroni ho mi aye ni na yo ringara Ezipeta yo, kporo akanga yo, niya,

14‘Ti digida saba garã oni ni ba sa sa ka mbu awirinaroni nga aEbere i du ni ri yo nga agu yo i abagi yo fu roni namangi sunge fu roni tipa agarã sita; oni ka mbu yo ti gaoni sunge i du ni ri yo.’ Ono abaroni adega nga tuyo, watadu ye tuyo fere te.

15Ono oni sa gaoni berã zakperezakpere ki mangi gu pai naru bangire ni taka pande raniri, aboro ni ba sa sa fu akurayo, oni ki mangi mokido ku bangire rogo gu bambu nga gu i ayamba ti rimore;

16ono oni sa tironi berewe ki gbarasi rimore ho oni ni ba sa sa naroga akumba na ade ni ni gaoni akanga berewe, agu yo oni ambu yo i du ni ri yo kuti gu pai i akpi nyemu he, oni ki ye na yo ni avururoni i du ni akanga berewe.

17Si du ya Yekova wẽ: Oni agia nga sangbare te ni taka pande raniri, aboro ni ba sa sa koyo du awirinayo ni na koyo ku akurayo ni; oni ngére, mi taki pande raniri fu roni nga ga basape, na ga tatg kaza, na ga ngbongi, wo poi Yekova. Mi asá roni ri ugbudagbuda fu angbi dunduko nga ga kpotosende.

18Agu aboro nagu auru gi mokido ka i aka nga kuti ringbisiringbisi pai nga ga mokido nga gu i amangi ku bangire ya, mi amánga yo wa gu wiri bagara nga gu ru dewe yo ru ku rogo ru ue ki susi dagba aparu―

19abazogo aYudo, abazogo Yerusarema, abanyaki, aboromotumo, na aboro ringara dunduko nga agu yo nasusi dagba apa wiri bagara;

20mi ki fu yo ku be avurayo na ku be agu yo nagbata ungayo. Kangbayo adú ni riahe fu azire ari na fu anya kpotosende.

21Sedekiya bakindo aYudo, na gako abazogo mi afú yo ku be avurayo na ku be agu yo nagbata ungayo, ku be rikavura nga ga bakindo aBabero nga gu nadi tihe ku sa yo ti roni.

22Oni ngére, mi arúga pai, wo poi Yekova, ki ye na yo berewe ku rogo gi bakporo re; i asó vura kuti ni, ki di he, ki zo ho ni we. Mi asá agu abaakporo nga ga Yuda ni gbarasigbarasi he zanga araki rogo ho.”

← Chapter 33 Jump to: Chapter 35 →