Jeremiah 17

Zande

← Chapter 16 Jump to: Chapter 18 →

1“Gu ingapai nga ga Yuda i ke pa ha na wiri ngua waraga nga ga marã; i ase pa ha ti ngbaduyo ni rindi kikii pa geno mbia, na ti agbanga gayo abamotumo,

2ho awiriyo natingida pa gayo abamotumo ni na gayo aAsera nga ngbama, pati iwo angua ni ba sa sa, na ri gbangagbanga agangara yo,

3ri bagangara rogo hau ringara. Gaoni ũkumuko na gaoni kikiipaahe dunduko mi afú he ni ũgbuahe tipa geno gaoni ingapai rogo gaoni ringara dunduko.

4Oni tigaoni aguari pati gaoni ukumbo ni tironi nga gu mi afu fu roni, mi ki sa roni oni mangi pa avuraroni rogo gu ringara nga gu oni aina nga ha ya, bambiko rago gi zinga mi ginda we nga gu nikaagbi nye anye kindi.”

5Ya Yekova wẽ: “Boro motiwa nga gu boro nakida kuti boro ka songoda tini kuti borose, gu ni sa ngbaduni ku sa yo ti Yekova.

6Ni du wa yegbende ngua rogo ngbi ngume, ka ni abí nga wiri wenepai ye fu ni ya. Ni aráka rogo ugu rago nga ga ngbakungba, rogo ringara tikpo yo aboro araka nga ni ya.

7“Boro maku nga gu boro nakida kuti Yekova, du gani maabangirise nga Yekova.

8Ni wa ngua rú yo ho pangba ime, nga gu nakparaka tarãha ku ime yo, ka si agunde nga ho faarago nida ni ya, bambiko akpehe ninye ni kina iwo ho, ka ngbaduhe akua nga garã ugure ya, bambiko si aongoda nga ti zu te.”

9Kpotoboro yo nangi ahe ki susi ahe dunduko, si na kere kaza; da ka ini he?

10“Mi nga Yekova nangera ku kpotoboro yo, ki asadi aberã a, ka fu he fu aboro ni ba sa sa kina kuti gayo apai, kuti zuzu gayo mangaapai.”

11Wa gbate nadungura awiri azire nga agu ra u ateta nga ra ya, wo du gu ni nadia aukumuko ono ni ruru paha te; bangbanda gani rame si agúari be ni, na ti digida gani rago ni adú ni iramungo.

12Gu taasitaasi mbatabakindo moi yo ku ari gbe ti tonatona rago nga gu ba nga ga gaani kparakpara ba.

13Ako Yekova, nga ga aYisaraere maabangirise, agu yo dunduko mbu ro i abá zee ku ri yo; agu yo sa tiyo ku sa yo ti ro i aké rimoyo rogo kpotosende, bambiko i mbu Yekova, nga unga ime.

14Ako Yekova, mo húsi re mi ki hu; mo bátasi re, mi ki bati; bambiko mo nga gi útambuahe.

15Mo ngére, ya yo fere, “Wari du ga Yekova pai ni? Si yé ke!”

16Mi ata ipisa nga tire ka guari ti babanda aboro fuo ro te; mi akpi nga nyemu rago sarangbanga a te, mo ini gere; gu pai nakuru ngbare yo si adu kina ku bangiro.

17Ka mo dú nga ni ugbudagbuda fere ya; mo nga gi bagbuko rago gbigbitapai.

18I bá zee ku ri agu yo narungosi re, ono ka mo bá nga zee ku ri re ya; i yungura, ono ka mo ídi nga ha fere mi yungura ya; mo yé na rago gbigbitapai ku ri yo; mo gbárasi yo na gbarasaahe bara ue!

19Ya Yekova fere wẽ: “Mo ndú ki ru ti Ngbadimo Benyamina, nga gu abakindo naarima ti ni nga ga aYudo yo, na yo i naakura ni a, na ti angbadimo bakporo dú du Yerusarema yo,

20ki ya: ‘Oni gí sangba Yekova, oni abakindo aYudo, na aboro Yuda dunduko, na araki Yerusarema yo dunduko a, nga agu roni ninarima ti agi angbadimo re.

21Ya Yekova wẽ: Oni bérẽ nga pa ungaroni, ka oni nitindi nga tindiro rago sabiti watadu ye na ni ku pangbadimo bakporo Yerusarema yo a ya.

22Ka oni nitindi nga tindiro ku zegi yo dimo kpuroni yo rago sabiti watadu manga sunge wa sa ya, ono oni niká kuti rago sabiti ni kparakpara ziazia rago, wa mi arugu abaroni.

23Ono i ata dega nga tuyo watadu ye tuyo te, ono i ki nyakasi ri yo, ya ka i gi nga pai ki gi rugapai a ya.

24“‘Oni ka oni dége turoni fere, wo poi Yekova ka oni ayé nga na tindiro kono ku ngbadimo bakporo yo rago sabiti ya, ono oni ki ka kuti rago sabiti ni kparakpara ziazia rago, ka oni amánga nga sunge rago ho ya,

25abakindo aríma ti ngbadimo gi bakporo re nikasunga auru ga Dawidi mbatabakindo, nioro ri angbagidavura na ri afarasi, i na gayo abazogo, aboro Yuda na araki Yerusarema yo; i aráka rogo gi bakporo re nye anye kindi.

26Aboro ki ye rogo abaakporo Yuda yo na rogo agu aba du pati Yerusarema kirikiri, tona ringara Benyamina yo, na ngboongboorago yo, ringara agangara yo, na Negebe yo. I ki niye na zozo amotumo na amotumo, amotumo zende ahe na fuõngua, ki niye na agamunihe nga ga tambuahe ku rogo ga Yekova bambu yo.

27Ono ka oni adéga nga turoni fere ya, ka ka kuti rago sabiti ni kparakpara ziazia rago, na aka tindiro ka rima ti angbadimo Yerusarema ti rago sabiti, si du mi ka ginda we ti ni ti gaha angbadimo, i ki riti abambu bakindo Yerusarema yo, ka i abísa nga ha ya.’ ”

← Chapter 16 Jump to: Chapter 18 →