Jeremiah 38

Zande

← Chapter 37 Jump to: Chapter 39 →

1Were Safataya nangia wiri Matana, ko agi agu apai Yeremaya agumba ha fu aboro dunduko, na Gedaria wiri Pasura, na Yukara wiri Seremaya, na Pasura wiri Marekiya,

2wa ko aya, “Ya Yekova wẽ, Gu ni nikasunga rogo gi bakporo re ni akpi be basape, be ngbongi, na be tata kaza; ono gu ni nikakura koyo du aKasado ni ni anyé ni ungani; ungani adú wa umozi fu ni nga ga sovura, ni ki nye ni ungani.

3Ya Yekova wẽ, Gi bakporo re i afú he ku be gu rikavura nga ga bakindo aBabero ni rengo ko ki di he.”

4Abazogo ki ya fu bakindo tie, “I imi gi kumba aimo re, bambiko ko narungburasi abasovura nga agu yo i ambu yo rogo gi bakporo re, na aboro dunduko, nigumba ko ngbatunga pai wa gure fu yo. Bambiko gi kumba re agbata nga wenepai tipa agi aboro te re, ono kina gu pai nikagberã fu yo.”

5Bakindo Sedekiya ki ya. “Oni ngére, ko kina be roni; bambiko ka bakindo mangi nga pai kuti roni te.”

6Si du i andu na Yeremaya ti ni ki moi ko ku rogo due ime nga ga Marekiya, nangia wiri bakindo, nga gu naadu vurukporo ku babandarago yo, ki zogo Yeremaya ku rogo yo ti gire. Ime adu nga due yo te, ono kina dogoro, Yeremaya ki rinda ku dogoro yo.

7Ho Ebede-mereke nangia boro Etiopia, nangia moyambu ku bakindo yo, agi he ni ya i ba Yeremaya ku due ime yo ― bakindo asungu ti Ngbadimo Benyamina―

8Ebede-mereke ki guari ku bakindo yo ki ya fu bakindo,

9“Gi gbia nga bakindo, agi aboro re mangi kina gbigbitapai rogo gu pai mangi yo dunduko ti Yeremaya nga nebi ni ba ko ku due ime yo; ko akpi yo be gomoro, bambiko kpokuta ho nye bakporo yo te.”

10Si du bakindo ki rugu Ebedemereke nangia boro Etiopia, ki ya fu ko, “Mo rogo aboro 30 gbia kuti ro erẽ, ki kusi Yeremaya nga nebi due ime yo mbata ko nikakpi.”

11Si du Ebede-mereke ki rogo aboro gbia kuti ko ki ndu sa ga bakindo bambu, ku vuru baigaaroko yo du rogo bambuigaahe yo, ki rogodi kuru akpata roko yo na sipisipi aroko, ko ki zogo ho ku sende yo fu Yeremaya ku rogo due ime yo ti agire.

12Si du Ebede-mereke nangia boro Etiopia ki ya fu Yeremaya, “Mo moi kuru akpata roko na aroko ku tii gagaro yo na agire.” Yeremaya ki mangi he wo.

13I ki gbe Yeremaya ku ari no ti gire ki kusi ko due ime yo. Yeremaya ki nye vurukporo ku babandarago yo.

14Bakindo Sedekiya ki kedi sunge tipa Yeremaya nga nebi ki di ko ku biata barima du ti ga Yekova yekaru. Bakindo ki ya fu Yeremaya, “Mi asána ro na sanahe sa; ka mo óko nga pai ti re wa sa ya.”

15Yeremaya ki ya fu Sedekiya, “Ka mi gumba ha foro, mo aimo re ni rengo? Ka mi rugu ro, mo adéga nga turo fere te.”

16Bakindo Sedekiya ki zunga he ni rondo fu Yeremaya ki ya, “Wa du Yekova ni ungako, nafu mbisimorani, mi aimo nga ro te watadu kusa ro ku be agi aboro nagbata ungaro a te re.”

17Yeremaya ki ya fu Sedekiya, “Ya Yekova nga Mbori nga ga arimbasa ko, nga ga aYisaraere Mbori wẽ, Ka mo ra na goro fu abazogo aBabero, ungaro ki bati, ka i azó nga gi bakporo re na we ya, mo na gamo aborokporo ki nye ni ungaroni.

18Ono ka mo ará nga na goro fu abazogo aBabero ya, si du i ka fu gi bakporo ti ni re ku be aKasado, i azó ho na we, ka mo amérã nga be yo ya.”

19Bakindo Sedekiya ki ya fu Yeremaya, “Mi nagunde be agu aEbere naaoro koyo du aKasado ni, i ka fu re fu yo i nisawia re.”

20Yeremaya ki ya, “I afú nga ro fu yo te. Mo gí sangba Yekova awere rogo gu pai gumba mi foro, si ki du foro wenengaĩ, ungaro ki bati.

21Ono ka mo ka pa ra na goro fu yo, gere nga gu yuguyugupai yugu Yekova fere:

22Mo ngére, agu ade dunduko naanye rogo ga bakindo aYudo bambu i nagasa yo dã fu abazogo nga ga bakindo aBabero yo, agu ade re ki ya, ‘Agu abadiaroni oni akida kuti yo i nangi roni ki di be roni; were wa nduroni narinda ku dogoro gbegberẽpai yo, i sa tiyo ku sa yo ti roni.’

23Adiaroni dunduko na awironi nga akumbagude i agása yo koyo du aKasado ni, mo ni tiro amérã nga be yo te, bakindo aBabero ki zi ro; i ki zo gi bakporo re na we.”

24Sedekiya ki ya fu Yeremaya, “Ka boro ini nga pa agi apai re ya, si ka mo akpi nga ti ni ya.

25Ka abazogo gi he ya mi fura na mo ki ye koyo du mo ni ki gumba pai foro ki ya, ‘Mo pe nga gu pai fu rani mo nagumba fu bakindo, na gu pai bakindo nigumba foro; ka mo óko nga pai ti rani wa sa ya, si du ka ani aimo nga ro ti ni ya,’

26mo ki ya fu yo, ‘Mi nasarawa tire ni umbasiti fu bakindo ya ka ko kedi nga re berewe ku Yonatana yo mi ndu ka kpi yo ya.’ ”

27Abazogo dunduko ki ye koyo du Yeremaya ni ka sasana ko, ko ki karaga ha fu yo wa bakindo arugu ko na ni. Si du i ki guari ki mbu fura na ko, bambiko i agia nga gu pekapai te re.

28Yeremaya ki nye vurukporo ku babandarago yo daho i adi Yerusarema ni.

← Chapter 37 Jump to: Chapter 39 →