Jeremiah 14

Zande

← Chapter 13 Jump to: Chapter 15 →

1Gu pai nga ga Yekova naye koyo du Yeremaya ni tipa pa ugure:

2“Yuda nakpara ni nunga gaha angbadimo bakporo nakpataka; gaha aboro nasunga na roko gira ti yo, kpe Yerusarema napaa ku ari.

3Gaha abaworimo kedi gayo amo yambu tipa ime; i ye sa adue ime, i abi nga ime yo te, i karaga tiyo na gayo arunge ni ku he; i na zee ki mungosi tiyo ki dadi riyo.

4Bambiko sende nasapa, wa adu nga mai rogo ringara ya, abasopobino du na zee, i dadi riyo.

5Zavura nzungba u mbu fogo wiru bariga ra yo bambiko nvuo yo te.

6Abaadongi nvuo ru ri kungba basosono arago yo, ami naonga zorokozoroko tipa yuge wa ahúa; bangira mbu bambiko nvuo yo te.

7“Ka gaani irairaapai vura du ni dezirepai kuti rani, Ako Yekova mo mángi pai mbiko rimoro; bambiko gaani tikusayo ni dungu he, ani ingi pai kuti ro.

8Ako mo nga ga aYisaraere maabangirise, nga gayo batasi rago fudifudipai, tipagine ka mo du ti ni wa kungba boro rogo ringara, wa bandugene nasa tini ku bani ka ongoda yuru?

9Tipagine ka mo du ti ni wa gu boro ngbani nizere, wa iranyaka arengba nga ka batasa boro ya? Ako Yekova, ono mo du bangbanda rani, i nayamba rani ti rimoro; ka mo mbú nga rani ya.”

10Ya Yekova a wẽ tipa agi aboro re: “I nakpi nyemu ka ta bau, i aka nga na nduyo ti nduge te; si du Yekova aida nga na yo ti ni ya, ko atingida pa gayo irairapai awere ki mbusi yo tipa gayo ingaapai.”

11Yekova ki ya fere: “Ka mo kpári nga tipa wenepai tipa agi aboro re ya.

12Ka i vura ka gina riahe, mi agia nga gayo kpe te, ka i vura tumo ni zozo amotumo na motumo riahe, mi aida nga na yo te; ono mi anyása yo ni basape, na ngbongi, na tata kaza.”

13Mi ki ya tie: “Ako, Gbia MBORI, Mo ngére, ya anebi fu yo, ‘Oni abí nga basape te, oni adú nga na ngbongi a te, ono mi afú zereda fu roni ni rengo rogo gi ba re.’”

14Yekova ki ya fere: “Anebi nagumba azire na rimore mi naakedi yo te, mi aruga nga yo te watadu gumba pai fu yo a te. I nagumba pa zire yuguyuguhe fu roni, pa kungba soroka, na gu biriki du rogo kina gayo berã.

15Si du ya Yekova wẽ tipa agu anebi nagumba pai na rimore ka mi avura nga keda yo vurũ ya, naya, ‘Basape na ngbongi ayé nga ku ri gi ringara te re’: Agu anebi re anyása be basape na ngbongi.

16Agu aboro i agumba pai fu yo i abáfa yo ku zegi yo ku ngba agene bakporo Yerusarema yo, kangba aboro ngbongi na be basape, boro adú nga ho ka kpisida yo te ― i, na adiayo, na awiriyo nga akumba, na awiriyo nga ade. Bambiko mi aúka gayo gbegberẽpai ku ri yo.

17“Mo agumba gi pai fu yo re: ‘Bangire nigá na aume yuru na uru, ka ami akata nga ya, bambiko gimi aboro i hogi yo na bakere oro, na kere fõ he a.

18Ka mi ndu ku ati yo, mo ngére, agu yo imi yo yo ni basape! Ka mi rimi ku bakporo yo, mo ngére, agu akaza nga ga ngbongi! Bambiko nebi na boromotumo namanga gayo sunge rogo ringara, ka i adu nga na inahe ya.’ ”

19Mo gindiga Yuda kindi? Mbisimoro nasoga Siona? Tipagine ta mo rani ti ni ka husa adu nga fu rani ya? Ani angere tipa zereda, ono wenepai aye nga te; tipa rago husa rani, ono mo ngere, kina gbudagbuda ki du.

20Ako Yekova, ani idi pa gaani gbegberẽpai, na gu irairapai nga ga abarani, bambiko ani ingi pai kuti ro.

21Ka mo páyasi nga pa rani, mbiko pa rimoro ya; ka mo wási nga ga ga mbatabakindo taarimo ya; mo tingidi pa ga mokido na ani ka mo gú nga ri he ya.

22Dagba agu airazire ambori nga ga arikaaboro yo gu ho sa rengbe ka fu mai? watadu angbangbaturũ rengbe ka fu moromoro mai? Ako Yekova gaani Mbori, a nga kina mo sa te? Ani moi bangirani ti ro, bambiko mo namanga agi apai dunduko re.

← Chapter 13 Jump to: Chapter 15 →