Acts 11

Ahirani (आहिराणी नवा करार) - No Year

← Chapter 10 Jump to: Chapter 12 →

1सर्वा यहूदीया प्रांत मा प्रेषितस्नी आणि विश्वासी भावूस्नी हवू संदेश आयक कि बिगर यहुदीस्नी बी परमेश्वर ना वचन मानी लीयेल शे.

2जव पेत्र यरूशलेम शहर मा उना, त सुंता करेल विश्वासी लोक तेना संगे वाद-विवाद कराले लगनात,

3तू बिगर-सुन्ताना दुसरा जाती ना लोकस्ना घर ग्या आणि तेस्ना संगे जेवण करना.

4तव पेत्र नि तेस्ले सुरुवात पासून क्रम ना नुसार ज्या गोष्टी कुरनेलियुस ना घर मा हुयेल होत्यात सांगी आयकाळ,

5“जव मी यापो नगर मा प्रार्थना करी ऱ्हायंतू, आणि बेसुध हुईसन एक दर्शन देखनु. कि एक मोठी चादर सारखी वस्तू चारी कोपरास पासून लटकेल आकाश मधून उतरीसन मना जोळे उणी.”

6जव मनी तेनावर ध्यान दिधा, त तेनावर पृथ्वी ना चारपाई, वनपशु, घसरणार जंतू आणि आकाश ना पक्षीस्ले देख.

7त्याच टाईम ले मले हवू शब्द बी आयकू उना, “ओ पेत्र उठ, मार आणि खा.”

8मनी सांग, “नई प्रभु, नई, कारण कि काही अपवित्र व अशुद्ध वस्तू मनी कदीच नई खाद.”

9एना उत्तर मा आकाश मधून दुसरा सावा आवाज उना, “जे काही परमेश्वर नि शुद्ध ठरायेल शे, तेले तू अशुद्ध नको सांगु.”

10तीन सावा असच हुयन, तव सगळ काही परत आकाश मा उचलाई ग्या.

11बरोबर त्याच टाईम ले तीन लोक ज्या कैसरीया शहर मधून कुरनेलियुस ना द्वारे मना जोळे धाळायेल होतात, त्या घर मा जेनामा आमी होतुत, ईसन उभा ऱ्हायनात.

12तव पवित्र आत्मा नि मले तेस्ना संगे बिगर संशय धराना जावाले सांग, मना संगे ह्या सहा भावू बी चालू लागनात, आणि आमी कुरनेलियुस ना घर मा ग्युत.

13तठे कुरनेलियुस नि आमले सांग, कि तेनी आपला घर मा एक परमेश्वर ना दूत ले उभा ऱ्हायेल देख, जेनी तेले सांग, यापो नगर मा माणुस धाळीसन शिमोन ले जो पेत्र सांगावस, बलाई ले.

14त्या परमेश्वर ना दूत नि सांग, पेत्र तुले अशा गोष्टी सांगीन, जेना द्वारे परमेश्वर तुले आणि तुना सर्वा परिवार ना लोकस्ले वाचाळीन.

15जव मनी प्रवचन देवाले चालू कर, त पवित्र आत्मा तेस्ना वर त्याच प्रमाणे उतरणा, जसा सुरुवात मा आमना वर उतरेल होता.

16तव मले प्रभु ना तो शब्द याद उना, जो तेनी सांगेल होत, “योहान बाप्तिस्मा देणारा नि त पाणी कण बाप्तिस्मा दिधा, पण तुमी पवित्र आत्मा कण बाप्तिस्मा लीशात.”

17एनासाठे हई स्पष्ट शे कि परमेश्वर नि तेस्ले बी तोच दान दिधा, “जो आमले प्रभु येशु ख्रिस्त वर विश्वास करा मुळे भेटणा, त मी कोण होतु जो परमेश्वर ले रोकी सकत होतु?”

18हाय आयकीसन त्या यहुदी विश्वासी चूप ऱ्हायनात आणि परमेश्वर नि वाह-वाह करीसन सांगू लागनात, “तव त परमेश्वर नि बिगर यहुदीस्ले बी कायम ना जीवन ना साठे आपला पापस पासून मन फिरावा ना आणि येशु ख्रिस्त वर विश्वास कराना दान दियेल शे.”

19स्तेफन नि मृत्यु नंतर यरूशलेम शहर मा छळ हुयेल होता, ह्या छळ मुळे ज्या विश्वासी लोक अथा-तथा हुईनात, त्या फिरत-फिरत फेनिके प्रांत, कुप्र बेट आणि सिरीया प्रांत ना अंत्युखिया शहर मा पोहोचनात. पण यहुदी लोकस्ले सोळीसन कोणी आखो कोले येशु ना बारामा संदेश नई आयकाळत होतात.

20पण तेस्ना मधून काही विश्वासी कुप्र बेट ना राहणारा आणि कुरेने शहर ना राहणारा होतात, ज्या अंत्युखिया शहर मा ईसन ग्रीक लोकस्ले बी प्रभु येशु ना सुवार्ता ना गोष्टी आयकाळाले लगनात.

21प्रभु ना सामर्थ्य तेस्ना वर होता आणि गैरा दुसरा जाती ना लोक तेस्ना संदेश ना द्वारे प्रभु येशु वर विश्वास करू लागनात.

22तव तेस्ना गोष्टी यरूशलेम शहर नि मंडळीस्मा बी पोहोचनात. एनासाठे तेस्नी बर्णबा ले अंत्युखिया शहर मा धाळ.

23बर्णबा तठे पोहचीसन आणि त्या विश्वासीस्ना साठे परमेश्वर नि कृपा देखीन खुश हुईना. तेनी सर्वास्ले प्रवचन सांग कि तन मन लाईसन प्रभु ना प्रती विश्वास योग्य बनेल राहोत.

24बर्णबा एक चांगला माणुस होता, तो विश्वास आणि पवित्र आत्मा कण परिपूर्ण होता. बर्णबा नि सेवाकार्य द्वारे गैरा लोक प्रभु येशु वर विश्वास करणात.

25तव बर्णबा अंत्युखिया शहर ले सोळीसन शौल ले झामला साठे तार्सस नगर ले चालना ग्या.

26जव तेनी शौल ले झामली लीध, त तो तेले अंत्युखिया शहर मा लिसन ग्या. शौल आणि बर्णबा एक वरीस लोंग मंडळी ना विश्वासी संगे ऱ्हायसन आणि गैरा लोकस्ले प्रभु येशु ना बारमा शिक्षण देत ऱ्हायनात. अंत्युखिया शहर माच सर्वास्तून पयले ख्रिस्त येशु ना शिष्य, ख्रिस्ती सांगायनात.

27त्याच दिनस्मा काही विश्वासी ज्या भविष्यवक्ता होतात यरूशलेम शहर मधून अंत्युखिया शहर मा उनात.

28तेस्ना मधून अगब नाव ना एक भविष्यवक्ता नि उभा ऱ्हायसन पवित्र आत्मा नि प्रेरणा कण हय सांग कि, सर्वा जग मा मोठा काय पळीन. आणि तो काय सम्राट क्लौदिया ना टाईम मा पळणा.

29तव शिष्यस्नी निर्णय कर कि प्रत्येक आपली-आपली पुंजी प्रमाणे यहूदीया प्रांत मा राहणारा विश्वासी भावूस्नी आपली-आपली सामर्थ्य ना नुसार मदत करूत.

30तेस्नी असच कर व बर्णबा आणि शौल ना हात कण वरिष्ठस कळे काही पैसा धाळनात.

← Chapter 10 Jump to: Chapter 12 →