Acts 24

Ahirani (आहिराणी नवा करार) - No Year

← Chapter 23 Jump to: Chapter 25 →

1पाच दिन नंतर हनन्या महा यहुदी पुजारी काही पूर्वज आणि तिर्तुल्ल नावणा एक वकील ले संगे लिसन कैसरीया नगर मा उना, तेस्नी राज्यपाल ना समोर पौल वर दोष लाव.

2जव पौल ले बलावामा उन त तिर्तुल्ल तेनावर आरोप लाईसन सांगाले लागणा, “ओ महाराज फेलिक्स, तुना द्वारे आमले मोठी शांती शे, आणि तुनी व्यवस्था मुळे ह्या जाती ना साठे गैरा वाईट काम सुधरी जायेल शेतस.

3एले आमी प्रत्येक जागा वर आणि प्रत्येक प्रकारे धन्यवाद कण स्वीकार करतस.

4पण एनासाठे मनी ईच्छा नई कि तुना जास्त टाईम लेवू, मी तुले विनंती करस, कि कृपा करीसन आमन्या दोनेएक गोष्टीस्ले आयकी लेवो.

5कारण कि हवू माणुस ले आमी उपद्रव करणार शे आणि जग भर ना सर्वा यहुदी लोकस्मा आंदोलन करत फिरस आणि येशु नासरेथकर ना नाव ना मत वाला पंथ ना पुढारी शे.

6आणि तेनी परमेश्वर ना मंदिर ले बी अशुद्ध करान देख, म्हणून आमी तेले धरी लीनुत. (आमी आमना नियम प्रमाणे तेले दंड देतुत,)

7पण सैनिक दल ना सरदार लुसिया नि ईसन तेले शक्ती पुर्वक आमना हातस कण हिसकाई लीधा,

8आणि एनावर दोष लावनारस्ले तुना समोर एवानी आदन्या दिधी. ह्या सगळ्या गोष्टीस्ना बारामा आमी तेनावर दोष लावतस, तू स्वता तेनी चौकशी करीसन काय खर शे ते समजी जाशी.”

9यहुदी लोकस्नी बी तेना सात दिसन सांग, ह्या गोष्टी ह्याच प्रकार ना शेतस.

10जव राज्यपाल नि पौल ले बोलाना इशारा करा, त तेनी उत्तर दिध, “मले माहित शे कि तू गैरा सालस पासून ह्या देश ना लोकस्ना न्यायाधीश शे, आणि एनासाठे मी खुशी मा आपला प्रतीउत्तर देस.

11तू स्वता मालुमात करी सकशीन, कि जव पासून मी यरूशलेम शहर ना मंदिर मा उपासना कराले उनू, मले बारा दिन तून वरे नई हुईनात.

12तेस्नी मले नईत परमेश्वर ना मंदिर मा, नईत प्रार्थना घर मा, आणि नईत नगर मा कोठे कोणा संगे वाद-विवाद करतांना व गर्दी जमा करतांना देख,

13आणि नईत ह्या त्या गोष्टीस्ले, जेस्ना बारामा त्या आते मनावर दोष लावतस, तुना समोर खरज प्रमाणित करिसकतस.

14पण मी तुना समोर कबूल करी लेस, कि मी ख्रिस्त ना मत प्रमाणे चालीसन आपला पूर्वजस्ना परमेश्वर नि उपासना करस, आणि ज्या गोष्टी मोशे ना नियम मा आणि भविष्यवक्तास्ना पुस्तक मा लिखेल शे, त्या सर्वास्वर विश्वास करस. जेले यहुदी लोक कुपंथ सांगतस.

15आणि परमेश्वर कळून आशा ठेवस जशी स्वता ह्या लोक बी ठेवतस, कि धर्मी आणि अधर्मी दोनीस्ले परमेश्वर मरेल मधून परत जित्ता करीन.

16म्हणून मी बी परमेश्वर आणि माणसस्ना संगे मना विवेक ले निर्दोष बनावाना साठे सदा प्रयत्न करस.

17गैरा सालस नंतर मी आपला गरीब लोकस साठे भेटवस्तू देवाले, आणि परमेश्वर ले चळावा-चळावा साठे यरूशलेम शहर मा एयेल होतु.

18त्याच टाईम ले जव मी हय करी ऱ्हायंतू (चळावा चळाई ऱ्हायंतू) कि तेस्नी मले परमेश्वर ना मंदिर मा देख, जव मी शुद्धीकरण नि रिती ले पुरी करी ऱ्हायंतू. तठे मना संगे नईत कोणती गर्दी होती आणि नईत कोणता दंगा करणार होतात, पण तठे काही आशिया प्रांत ना लोक होतात जेस्नी दंगा कर. आणि तेस्ले उचित होत.

19कदी मी काही वाईट करेल होतु, त तेस्ले मनावर आरोप लावा साठे आठे तुना समोर ऱ्हावाले पाहिजे होत.

20नईत ह्या लोक स्वताच सांगो, कि जव मी महासभा ना समोर उभा होतु, त तेस्नी मना मा कोणता अपराध दिखना?

21फक्त एक आरोप जो त्या मना विरुद्ध लावू सकतस, तो हवू शे जव मनी मंदिर ना आंगण मा जोरमा सांगेल होत, कि आज मना तुना द्वारे न्याय करामा ईऱ्हायना कारण कि मी विश्वास करस कि परमेश्वर त्या लोकस्ले ज्या मरी जायेल शेतस परत जित्ता करीन.”

22पण फेलिक्स ले ह्या मत ना गोष्टी चांगल्या माहिती होत्यात, तेस्ले हय सांगीसन टाइ दिध, “जव सैनिक दल ना सरदार लुसिया ईन, तव तुमना मुकदमा ना निर्णय देसू.”

23आणि शताधिपतीले आदन्या दिधी, कि पौल ले सुरक्षा मा ठेवामा येवो, पण तेना मित्रस मधून कोले बी तेनी सेवा करा पासून नका रोकज्यात.

24काही दिनस नंतर फेलिक्स राज्यपाल आपली यहुदी बायको द्रुसिल्ला ना संगे उना आणि तेनी पौल ले बलाईसन त्या विश्वास ना बारामा जो ख्रिस्त येशु वर शे, तेना पासून आयक.

25जव तो धार्मिकता, संयम आणि एणारा न्याय नि चर्चा करी ऱ्हायनात, त फेलिक्स नि भयभीत हुईसन उत्तर दिध, “आते त तू जा, जव मना जोळे टाईम राहीन, मी स्वता बलाई लेसू.”

26फेलिक्स घळी-घळी तेले बलावत होता आणि तेना संगे बोलत होता, कारण कि तो विचार करत होता कि पौल बंदीगृह मधून निघा साठे तेले काही पैसा दिन.

27पण जव दोन साल बी ती ग्यात, त फेलिक्स ना जागा वर पुर्क्य फेस्त राज्यपाल बनी ग्या, आणि फेलिक्स यहुदी लोकस्ले ले खुश करानी ईच्छा कण पौल ले कैदमाच सोळी ग्या.

← Chapter 23 Jump to: Chapter 25 →