Acts 19

Ahirani (आहिराणी नवा करार) - No Year

1जव अपुल्लो करिंथ शहर मा होता, त पौल वरना सर्वा प्रांतस मधून इफिस शहर मा उना, आणि तठे काही शिष्यस्ले भेटणा.

2तेनी तेस्ले सांग, “काय तुमले विश्वास करतांना पवित्र आत्मा भेटणा?” तेस्नी तेले सांग, “आमी त पवित्र आत्मा नि चर्चा बी नई आयकनुत.”

3पौल नि तेस्ले सांग, “त मंग तुमी कोणता प्रकार ना बाप्तिस्मा लीधा?” तेस्नी सांग, “आमनी तो बाप्तिस्मा लीधा जो योहान देत होता.”

4पौल नि सांग, “योहान नि हय सांगीसन लोकस्ले बाप्तिस्मा दिधा जेस्नी आपला पापस पासून मन फिरायसन परमेश्वर कळे फिरणात, पण तेनी इस्त्राएल ना लोकस्ले सांग कि त्या येशु वर विश्वास करोत जो तेना नंतर ईन, जो कि येशु ख्रिस्त शे.”

5हय आयकीसन तेस्नी प्रभु येशु ना नाव ना बाप्तिस्मा लीधा.

6आणि जव पौल नि तेस्ना वर आपला हात ठेवात, त तेस्ना वर पवित्र आत्मा उतरणा, आणि त्या आल्लग-आल्लग भाषा बोलणे आणि भविष्यवाणी कराले लागनात.

7ह्या सर्वा जवळ-पास बारा माणस होतात.

8तव पौल प्रार्थना घर मा जाईसन तीन महिना लगून बिगर भ्यावाना बोलत ऱ्हायना, आणि परमेश्वर ना राज्य ना बारामा तर्क-वितर्क करत आणि समजाळत ऱ्हायना.

9पण जव काही लोकस्नी कठोर हुईसन विश्वास कराले नकार करी दिधा आणि आखो लोकस समोर येशु ना मत ना बारामा वाईट सांगाले लागनात, त तेनी तेस्ले सोळीसन शिष्यस्ले आल्लग करी लीध, आणि तुरन्नानी शाळा मा दररोज चर्चा करत होता.

10दोन साल लगून अस होत ऱ्हायन, आठ लगून कि आशिया प्रांत ना राहणारा काय यहुदी, काय ग्रीक सर्वास्नी प्रभु ना वचन आयकी लीध.

11आणि परमेश्वर पौल ना द्वारे अदभूत सामर्थ्य ना काम दाखाळत होता.

12आठ लगून कि रुमाल आणि शाल तेना शरीर ले स्पर्श कराईसन आजारीस्वर टाकत होतात, आणि त्या आजारस्तून बरा हुई जात होतात, आणि दुष्ट आत्मा तेस्ना मधून निघी जाया करत होती.

13पण काही यहुदी माणस सर्वा कळे फिरत होतात आणि लोकस मधून दुष्ट आत्मास्ले काळत होतात, आणि त्या तेस्ले प्रभु येशु ख्रिस्त ना नाव कण काळाले लागनात, आणि त्या हय सांगाले लगनात कि “ज्या येशु ना प्रचार पौल करस, आमी तुमले बाहेर येवानी आदन्या देस.”

14आणि स्कीवा नाव ना एक मुख्य यहुदी पुजारी ना सात पोर होतात, ज्या असाच करत होतात.

15पण दुष्ट आत्मा नि तेस्ले उत्तर दिधा, “येशु ले मी वयखस, आणि पौल ले बी वयखस, पण तुमी कोण शेतस?”

16आणि त्या माणुस नि जेनामा दुष्ट आत्मा होती, तेस्ना वर उळीमारीसन, आणि तेस्ले काबू मा लईसन, तेस्ना वर असा झपटना, कि त्या नागा आणि जखमी हुईसन त्या घर मधून निघी पयनात.

17आणि हय गोष्ट इफिस शहर ना राहणारा यहुदी आणि ग्रीक ले बी सर्वास्ले माहिती पळीग्य, आणि त्या सर्वास्मा भीती घुसग्यी, आणि प्रभु येशु नि नाव नि स्तुती करी.

18जेस्नी विश्वास करेल होत, तेस्ना मधून गैरा लोकस्नी ईसन आपला आपला वाईट कामस्ले सर्वास्ना समोर मानी लीनात.

19आणि झाळू फुक करणारास मधून गैरास्नी आपल्या-आपल्या झोयना एकत्र करीसन सर्वास समोर पेटाळी टाक, आणि जव तेस्ना मोळ काळामा उना, त आसपास पन्नास हजार चांदी ना शिक्कास्ना बराबर निघना.

20ह्या प्रकारे प्रभु ना वचन सामर्थ कण पसरत ग्या आणि प्रबळ होत ग्या.

21जव ह्या गोष्टी हुई ग्यात त पौल नि मासेदोनिया प्रांत व अखया प्रांतस मधला विश्वासीस संगे भेटा नंतर यरूशलेम शहर जावाना निर्णय लीधा. आणि सांग, “तठे जावा नंतर मले रोम शहर ले बी देखान अवश्य शे.”

22एनासाठे आपली सेवा करणारस मधून तीमुथियुस आणि एरास्त ले मासेदोनिया प्रांत मा आपला पुळे धाळीसन स्वता काही दिन आशिया प्रांत मा राही ग्या.

23त्या टाईम ले प्रभु ना मत ना बारामा मोठा गोंधय हुयना.

24कारण कि देमेत्रिय नाव ना एक सोनार होता जो अर्तमी ग्रीक देवी ना चांदी ना मंदिर ना नमुना बनाईसन, कारागीरस्ले तेस्ले बनावा साठे गैरा पैसा देत होता.

25देमेत्रियस्नि आपला कारागीरस्ले बलाव आणि अशी वस्तूस्ना कारागीरस्ले एकत्र करीसन सांग, “भावूसहोण, तुमले माहिती शे कि ह्या काम कण आपले कितला पैसा भेटस.

26आणि तुमी देखतस आणि आयकतस कि फक्त इफिस शहर माच नई, पण आशिया प्रांत ना सर्वा गावस्मा हय सांगी सांगीसन ह्या पौल नि गैराच लोकस्ले समजाळेल आणि फुसलायेल बी शे, कि जी हात नि कारागिरी शे, त्या परमेश्वर नईत.

27आणि आते फक्त ह्याच गोष्ट नि भीती नई कि आमना ह्या धंदा नि प्रतिष्ठा चालनी जाईन, पण हय कि महान देवी अर्तमी ना मंदिर तुच्छ समजामा ईन आणि जिले पुरा आशिया प्रांत मा आणि जग भर मा तेना महत्व बी चालना जाईन.”

28सर्वी गर्दी हय आयकीसन रागे भरी गई आणि आराया मारी-मारीसन सांगाले लागणी, “इफिसस्नि देवी अर्तमी महान शे.”

29आणि शहर ना दुसरा कईक लोकस्नी आराया मारानी आवाज आयक आणि जाईसन गर्दी मा मिई ग्यात आणि शहर मा गोंधय उठी गी आणि लोकस्नी गायस आणि अरिस्तार्ख, मासेदोनिया प्रांत ना राहानारस्ले ज्या पौल ना संगी प्रवासी होतात, धरी लीनात, आणि एकत्र हुईसन रंग शाळा मा पईग्यात.

30जव पौल बी रंग शाळा ना मधमा जाईसन लोक संगे बोलाले देखत होता त शिष्यस्नी तेले जावू नई दिध.

31आशिया ना अधिकारीस मधून बी तेना काही मित्रस्नी तेना जोळे सांगी धाळ आणि विनंती करी, कि रंग शाळा मा जाईसन आपला जीव ले धोका मा नको टाकजो.

32रंग शाळा ना मधमा, सर्वा लोक आराया मारत होतात, कोणी एक काही आणि आखो कोणी काही, सर्व काही गोंधय होत. आणि गैरा जास्त लोकस्ले त हय मालूम बी नई होत कि त्या कसा साठे एकत्र हुएल शेतस.

33तव गर्दी मधून काही यहुदी लोकस्नी आलेक्सांद्र नाव ना एक माणुस्ले गर्दी मधून पुळे कर, आणि आलेक्सांद्र हात ना इशारा कण शांत राहा साठे लोकस्ले समजाळाना प्रयत्न करू लागणा.

34पण जव त्या समजी ग्यात कि तो यहुदी माणुस शे, त सर्वान सर्वा एक सूर मा जवळ-पास दोन घंटा लगून वरळत ऱ्हायनात, कि “इफिसस्नि देवी अर्तमी महान शे.”

35तव नगर ना मंत्री नि लोकस्ले शांत करीसन सांग, “ओ इफिस शहर ना रहिवासीसहोण, सर्वास्ले माहित शे कि महान अर्तमी देवी ना मंदिर आणि तेनी मूर्ती जी आकाश मधून पळेल होती, तेनी राखोई इफिस शहर ना लोक करी ऱ्हायनात.

36एनासाठे जव कि ह्या गोष्टीस्ना खंडनच नई होवू सकस, त बर शे, कि तुमी शांत राहा, आणि बिगर विचार-पूस ना काही नका करा.

37कारण कि तुमी ह्या माणसस्ले लयेल शेतस, ज्या नईत मंदिर ले लुटणार शेतस, आणि नईत आमनी देवी ना निंदा करणारा शेतस.

38एनासाठे कदी देमेत्रिय आणि तेना जोळीदार कारागीरस्ना कोणा संगे विवाद हुईन त त्या न्यायालय मा जावू सकतस, आणि तेस्ना प्रकरण ना न्याय करासाठे लोक बी शेतस, तठे लोक एक दुसरा वर आरोप लावू सकतस.

39पण कदी तुमी कोणती दुसरी गोष्ट ना बारामा काही विचाराना देखतस, त नियमित सभा मा न्याय करामा ईन.

40कारण कि मले भीती शे कि राज्यपाल ह्या सर्वा गोंधय ना बारामा आयकीन आणि सांगीन कि आमी रोम सरकार ना विरुद्ध विरोध कराना प्रयत्न्य करी ऱ्हायंतुत, कारण कि एन काहीच कारण नई, आखो आमी ह्या गर्दी ना एकत्र होवान कोणताच उत्तर नई देवू सकस.”

41आणि हय सांगीसन तेनी सभा ले जावान सांग.

← Chapter 18 Jump to: Chapter 20 →