Acts 18

Ahirani (आहिराणी नवा करार) - No Year

← Chapter 17 Jump to: Chapter 19 →

1ह्या नंतर पौल अथेनै शहर ले सोळीसन करिंथ शहर मा उना.

2आणि तठे अक्विल्ला नाव ना एक यहुदी भेटणा, जेना जल्म पंत प्रांत मा हुयेल होत, आणि आपली बायको प्रिस्कील्ला ना संगे इटली प्रांत मधून आतेच एयेल होता, कारण कि सम्राट क्लौदिया सर्वा यहुदीस्ले रोम मधून निघी जावानी आज्ञा दियेल होती, त्या आदेश मुळे त्या करिंथ शहर मा उनात.

3आणि पौल तेस्ले भेटाले ग्या, पौल आणि अक्विल्ला ना एकच व्यवसाय होता. एनासाठे तो तेस्ना संगे ऱ्हायना आणि तेस्ना संगे तंबू बनावाना काम कराले लागणा.

4आणि पौल प्रतेक आराम ना दिन प्रार्थना घर मा तर्क-वितर्क करीसन यहुदी आणि ग्रीक लोकस्ले येशु ख्रिस्त वर विश्वास कराले समजाळत होता.

5जव सीला आणि तीमुथियुस या मासेदोनिया प्रांत तून उनात, त पौल वचन आयकाळानी धून मा लागीसन यहुदी लोकस्ले साक्षी देत होता कि येशुच ख्रिस्त शे.

6पण जव यहुदी लोक पौल ना विरोध मा विरोध आणि निंदा कराले लागनात, त तेनी आपला कपळा झटकी सन तेस्ले सांग, “परमेश्वर ना संदेश ले अस्वीकार करा मुळे तुमी स्वताच त्या दंड साठे जिम्मेदार शेतस, जो तुमले परमेश्वर कळून भेटीन, मी निर्दोष शे. आते पासून मी बिगर यहुदी लोकस कळे जासू आणि तेस्ना मधमा परमेश्वर ना संदेश ना प्रचार करसू.”

7आणि प्रार्थना घर मधून चालीसन तो तीत युस्त नाव ना परमेश्वर ना भक्त ना घर बिगर यहुदी लोकस्ले शिकाळाले उना, जेना घर प्रार्थना घर ले लागीसन होता.

8तव प्रार्थना घर ना अधिकारी क्रिस्प नि आपला पुरा कुटुंब संगे प्रभु वर विश्वास कर, आणि गैराच करिंथ शहर ना रहिवासीस्नी पौल ना गोष्टीस्ले आयकीसन विश्वास कर आणि बाप्तिस्मा लीधात.

9आणि प्रभु नि रात ले दर्शन ना द्वारे पौल ले सांग, “भ्यावू नको, पण सांगत जा आणि चूप नको राहू,

10कारण कि मी तुना संगे शे, आणि कोणी तुनावर चळीसन तुना नुकसान नई कराव, कारण कि ह्या नगर मा मना गैरा लोक शेतस ज्या मनावर विश्वास करतीन.”

11एनासाठे पौल तेस्ना मधमा परमेश्वर ना वचन शिकाळत दीड वरीस लगून ऱ्हायना.

12जव गल्लियो अखया प्रांत ना राज्यपाल होता त यहुदी लोक एकी करीसन पौल वर चळी उनात, आणि तेले न्याय सिंहासन ना समोर लईसन सांगाले लागनात,

13“हवू माणुस लोकस्ले समजाळस, कि परमेश्वर नि उपासना ह्या प्रमाणे करा, जी मोशे ना नियम ना विरुद्ध मा शे.”

14जव पौल बोलावर होता, त गल्लियो नि यहुदी लोकस्ले सांग, “यहुदी लोकसहोण, कदी हय काही अन्याय व वाईट गोष्ट ऱ्हाती त बर ऱ्हात कि मी तुमनी आयकतू.

15पण कदी हवू तर्क-वितर्क शब्द, आणि नाव, आणि तुमना आठला मोशे ना नियम ना बारामा शे, त तुमीच जाना, कारण कि मी ह्या गोष्टीस्ना न्यायाधीश बनाना नई देखत.”

16आणि गल्लियो नि तेस्ले आदन्या दिधी कि त्या तेस्ले न्याय सिंहासन समोरून काळी देवोत.

17तव सर्वा लोकस्नी प्रार्थना घर ना अधिकारी सोस्थीनेस ले धरीसन न्याय सिंहासन ना समोर मार. पण गल्लियो नि ह्या गोष्टीस्नी काही बी चिंता नई करी.

18तव पौल गैरा दिन लगून करिंथ शहर मा ऱ्हायना, मंग विश्वासीस पासून निघीसन पाणी ना रस्ता कण सिरीया प्रांत चालना ग्या, तेना संगे प्रिस्कील्ला आणि अक्विल्ला बी होतात. सिरीया जावाना पहिले किंख्रिया नगर मा पौल नि आपला डोकान मुंडण कराई लीध कारण कि तेनी एक नवस करेल होता.

19आणि त्या इफिस शहर मा पोहचीसन पौल नि प्रिस्कील्ला आणि अक्विल्ला ले तठे सोळी दिध, आणि स्वताच प्रार्थना घर मा जाईसन यहुदी लोकस संगे तर्क-वितर्क कराले लागणा.

20जव लोकस्नी तेले विनंती करी कि, “आमना संगे काही दिन आखो ऱ्हाय.” त तेनी मना करी टाक.

21पण जातांना तेस्ले हय सांगीसन ग्या, “जर परमेश्वर नि ईच्छा अशीन त मी तुमना जोळे परत एसू.” तव इफिस शहर तून जहाज सोळीसन चाली पाळणा,

22आणि कैसरीया शहर मा उतरीसन (यारुशलेम ले) ग्या आणि मंडळी ले भेटीसन अंत्युखिया शहर मा उना.

23मंग काही दिन अंत्युखिया नगर मा राहीसन तठून चालना ग्या, आणि एक कळून गलतिया प्रांत व फ्रुगिया प्रांत मा सर्वा शिष्यस्ले विश्वास मा बळकट करत फिरणा.

24अपुल्लो नाव ना एक यहुदी जेना जल्म सिकंदरिया शहर मा हुएल होत, जो विध्वान माणुस होता आणि परमेश्वर ना पुस्तक मा निपुण होता, इफिस मा उना.

25तेनी प्रभु ना रस्ता नि शिक्षा लीयेल होती, आणि आत्मा मा उत्साहित हुईसन येशु ना बारामा खर-खर आयकाळत आणि शिकाळत होता, पण तेले फक्त योहान ना बाप्तिस्मा ना बारामाच माहित होता.

26तो प्रार्थना घर मा बिगर भ्यावाना बोलाले लागणा, पण प्रिस्कील्ला आणि अक्विल्ला तेन्या गोष्टी आयकीसन, तेले आपला घर लई उनात आणि परमेश्वर ना रस्ता तेले आखो बी स्पष्टपणे दाखाळ.

27आणि जव तेनी निश्चय कर कि पार उतरीसन अखया प्रांत ले जावूत विश्वासीस्नी तेले जावा साठे प्रोत्साहित करीसन शिष्यस्ले लिख कि त्या तेना चांगल्या प्रकारे स्वागत करोत. एनासाठे जव अपुल्लो तठे पोहोचना, तेनी त्या शिष्यस्ना गैरा प्रोत्साहन कर. जेस्नी कृपा ना द्वारे विश्वास करेल होता.

28अपुल्लो नि आपली शक्ती आणि कौशल्य कण यहुदी लोकस्ले सार्वजनिक रूप कण हाराव, परमेश्वर ना पुस्तक मधून पुरावा दि दिसन कि येशुच ख्रिस्त शे.

← Chapter 17 Jump to: Chapter 19 →