Acts 15

Ahirani (आहिराणी नवा करार) - No Year

1काही लोक यहूदीया प्रांत मधून अंत्युखिया शहर मा ईसन प्रभु ना शिष्यस्ले हय शिक्षा देवाले लागनात, “मोशे ना नियम प्रमाणे कदी तुमना सुंता नई हुयेल शे त तुमना तारण असंभव शे.”

2ह्या बारामा पौल आणि बर्णबा ना तेस्ना संगे गैरा झगळा हुयना आणि त्या वाद-विवाद करू लागनात. तव एक मत हुईसन हय ठरावामा उन कि पौल आणि बर्णबा काही दुसरा शिष्यस्ना संगे ह्या बारामा बोला साठे प्रेषित आणि वरिष्ठस जोळे यरूशलेम शहर ले जावोत.

3मंडळी नि तेस्ले धाळी दिध आणि त्या फेनिके आणि शोमरोन प्रांत मधून जात बिगर यहुदी लोक कोणत्या प्रकारे सुवार्ता आयकीसन ख्रिस्त येशु मा विश्वासी बनी ऱ्हायनात ह्या गोष्ट ना सविस्तर वर्तमान आयकाळत ग्यात. हय आयकीसन विश्वासी भावूस्ले गैरी खुशी हुईनी.

4जव त्या यरूशलेम शहर मा पोहोचनात, त मंडळी, प्रेषित आणि वरिष्ठ तेस्ले खुशी मा भेटनात. पौल आणि बर्णबा नि तेस्ले सांग कि परमेश्वर नि तेस्ना द्वारे कसा-कसा काम करात.

5पण परूशी पंथ ना विश्वासी मधून कितलाक उठीसन सांगाले लागनात, “दुसरा जाती ना लोकस्ले सुंता कराले आणि मोशे ना नियमले मानानी आज्ञा देवाले पायजे.”

6तव प्रेषित आणि वरिष्ठ ह्या गोष्ट ना बारामा विचार करासाठे एकत्र हुयनात.

7तव पेत्र नि गैरा वाद-विवाद हुईजावा नंतर उभा ऱ्हायसन तेस्ले सांग, “ओ भावूसहोण, तुमले माहिती शे कि गैरा दिन हुयनात कि परमेश्वर नि तुमना मधून मले निवाळी लीयेल शे, कि मना द्वारे बिगर यहुदी लोक सुवार्ता ना वचन आयकीसन विश्वास करोत.”

8परमेश्वर, जेले सर्वास्ना मन नि गोष्ट माहिती शे, तेनी तेस्ले बी आमना सारखा पवित्र आत्मा दिसन हय दाखाळ कि तेनी तेस्ले आपला लोकस्ना रूप मा स्वीकार करी लीयेल शे.

9तेनी तेस्ना मन विश्वास ना द्वारे शुद्ध करीसन आमना मा आणि तेस्ना मा काही फरक नई ठेव.

10एनासाठे आते तुमी लोक आमना यहुदी नियम आणि रिती-रिवाज ना पालन करासाठे दुसरा जाती ना लोकस्वर भारी वजा टाकीसन परमेश्वर नि परीक्षा काब करतस? ह्या वजा ले त आमी आणि आमना पूर्वज बी नई उचलू सकतस.

11अस करान चांगल नई शे. आमना विश्वास त हवू शे कि जसा प्रभु येशु नि कृपा ना द्वारे आमले तारण भेटणा त्याच प्रमाणे तेस्ले बी भेटीन.

12तव सगळी सभा चूप हुईसन बर्णबा आणि पौल नि गोष्टी आयकाले लागनात, कि परमेश्वर नि तेस्ना द्वारे बिगर यहुदी लोकस्मा कसा मोठ-मोठा चिन्ह, आणि अदभूत काम दाखाळात.

13जव तेस्नी बोलाना बंद कर, त याकोब उठीसन सांगाले लागणा, “ओ भावूसहोण, मनी आयक.

14शिमोन पेत्र नि समजाळ कि परमेश्वर नि सुरुवात मा बिगर यहुदी लोकस्वर कशी कृपादृष्टी करी आणि तेस्ना मधून काही लोकस्ले आपला लोक होवा साठे नीवाळ.”

15दुसरा जाती ना लोकस्ना ह्या बदलाव ना बारामा भविष्यवक्तास्ना लेख ना समर्थन बी भेटस, जस कि लिखेल शे,

16“एना नंतर मी परत ईसन दाविद ना राज्य जो तेना शत्रूस्ना द्वारे नाश करी दियेल शे तेले परत बनावसू. आणि तेना तंबूस्ले परत बनाईसन उभा करसू.

17जेना कण सर्वा जाती ना लोक जेस्ले मनी आपला लोक होवा साठे बलायेल शे, त्या मले झामली सकोत.

18हवू तोच प्रभु ना आवाज शे जेनी जग नि निर्मिती पासून ह्या गोष्टीस्ना संदेश दिधा.”

19एनासाठे मना निर्णय हवू शे कि दुसरा जाती ना लोकस मधून ज्या लोक परमेश्वर ना जोळे येतस. तेस्ले दाबिसन आमी सर्वा यहुदी नियम आणि रिवाज ना पालन करासाठे दुख नई देवोत.

20पण तेस्ले आमी एक पत्र लिख हय सांगा साठे, “आमी हय निर्णय करासाठे लिखी धाळेल शे कि त्या मूर्तीस्ना समोर अर्पण करेल मांस पासून, आणि रक्त पासून, आणि गयाले दाबिसन मारेल जनावरस्ना मांस पासून, आणि व्यभिचार पासून वाचेल राहा.”

21कारण कि जुना टाईम पासून नगर-नगर मा ह्या मोशे ना नियम ना प्रचार करणार येत ऱ्हायनात आणि दर आराम ना दिन प्रार्थना घर मा वाचामा येस.

22तव यरूशलेम शहर मा सगळी मंडळी संगे प्रेषित आणि वरिष्ठस्ले चांगल वाटण कि आपला मधून कईक लोकस्ले निवाळी लेवो म्हणजे यहूदा जो बर्शब्बा सांगावस आणि सीला ले जो विश्वासीस्ना मधमा आदरणीय होता. तेस्ले पौल आणि बर्णबा ना संगे अंत्युखिया शहर ले धाळ.

23आणि तेस्नी ह्या पत्र ले तेस्ना संगे धाळ, “अंत्युखिया शहर, सिरीया प्रांत आणि किलकिया प्रांत ना ऱ्हायनारा भावूस्ले ज्या बिगर यहुदीस मधून शेतस प्रेषित आणि वरिष्ठ भावूस्ना नमस्कार.

24आमी आयकेल शे, कि आमना मधून कीतलास्नी तठे जाईसन, तुम्हले आपली गोष्टीस कण घाबराई टाक, आणि तुमना मन उलटाई दियेल शे पण आमी तेस्ले आज्ञा नई दियेल होती.

25एनासाठे आमी एक चित हुईसन बर समजनूत, कि आमना द्वारे निवाळेल कईक लोकस्ले आपला प्रिय बर्णबा आणि पौल ना संगे तुमना जोळे धाळोत.

26ह्या त असा लोक शेतस, जेस्नी आपला प्रभु येशु ख्रिस्त ना साठे आपला जीव जोखीम मा टाकेल शे.

27एनासाठे आमनी यहूदा आणि सीला ले तुम्हना जोळे धाळी ऱ्हायनूत, कि त्या व्यक्तिगत रूप मा ह्या बारामा गोष्टी आयकाळोत ज्या आमी तुमले लिखीरायनुत.

28कारण कि पवित्र आत्मा ले आणि आमले हई चांगल वाटण कि ह्या आवश्यक गोष्टीस्ले सोळीसन तुमना वर आखो कोणती गोष्टी ना भार नई टाकोत.

29तुमी त्या मूर्तीस्नी अशुद्धता कण आणि व्यभिचार कण आणि गया दाबिसन मारेल जनावरस्ना मांस कण आणि जनावरस्ना रक्त खावा पासून दूर राहोत. असाच करा तर तुमना चांगल हुईन. क्षेमकुशल राहा.”

30मंग त्या तठून निघीसन अंत्युखिया शहर मा पोचनात, तठे तेस्नी मंडळी ले एकत्र करीसन पत्र दि टाक.

31त्या पत्र ना संदेश ले वाचीसन गैरा उत्साहित आणि आनंदित हुयनात.

32यहूदा आणि सीला नि ज्या स्वता भविष्यवक्ता होतात, गैरा गोष्टीस कण विश्वासी भावूस्ले प्रोत्साहित आणि दृढ करणात.

33तेस्ना कईक दिन लोंग तठे रावा नंतर तेस्नी विश्वासी भावूस कण शांती कण परत ग्यात, कि आपला धाळनारस कळे परत जावोत.

34पण सीला नि अंत्युखिया शहर मा राहाणा निर्णय लीधा एनासाठे यहूदा एखटाच यरूशलेम शहर ले परत चालना ग्या.

35पौल आणि बर्णबा नि कईक टाईम लोंग अंत्युखिया शहर मा राई ग्यात आणि दुसरा गैरा लोकस संगे प्रभु येशु ना वचन ना उपदेश करत आणि सुवार्ता आयकाळत ऱ्हायनात.

36काही दिन नंतर पौल नि बर्णबा ले सांग, “चाला त्या नगरस्मा जाईसन जठे आमनी प्रभु येशु ना वचन आयकळेल होता, आपला विश्वासी भावूस्ले देखुत कि त्या कसा शेतस.”

37बर्णबा नि ईच्छा होती कि योहान ले जो मार्क बी सांगावस, आपला संगे ले.

38पण पौल ले हय चांगल नई वाटण कि तेले संगे लेवूत कारण कि तो पंफुलिया प्रांत मा काम पुरा होता लोंग नई थाबंना पण काम अर्धा सोळीसन चालना ग्या.

39ह्या गोष्ट ले लिसन पौल आणि बर्णबा मा गैरा वाद-विवाद हुईना आणि त्या एक दुसरा कण आल्लग हुई ग्यात. बर्णबा मार्क ले लिसन जहाज कण कुप्र बेट ले चालना ग्या.

40पण पौल नि सीला ले निवाळी लीध. आणि विश्वासी भावूस्नी तेस्ले परमेश्वर नि कृपा मा सोपीसन अंत्युखिया शहर तून धाळी दिध.

41मंग त्या सर्वा सिरीया प्रांत आणि किलकिया प्रांत मधून मंडळीस्ना विश्वासीस्ले मजबूत करत ग्यात.

← Chapter 14 Jump to: Chapter 16 →