Acts 12

Ahirani (आहिराणी नवा करार) - No Year

← Chapter 11 Jump to: Chapter 13 →

1त्या टाईम हेरोद राजा मंडळी ना काही विश्वासी लोकस्ले त्रास देवा साठे बंदी बनाई लीधा.

2तेनी प्रेषित योहान ना भावू याकोब ले तलवार कण माराइ टाक.

3जव तेनी देख, कि यहुदी लोक एना कण खुश होतस, त तेनी पेत्र ले बी धराना निश्चय कर. हय बिगर खमीर ना भाकर ना सन ना दिन हुईन.

4हेरोद राजा नि पेत्र ले धरीसन बंदीगृह मा टाक आणि राखोई साठे, चार-चार शिपाईस्ना चार तुकळी ले पहारा देवाले ठेव. ह्या विचार कण कि वल्हांडण ना सन नंतर तेले सर्वा लोकस्ना समोर तेनी परीक्षा लेवूत.

5बंदीगृह मा पेत्र नि गैरा दिनस पासून राखोयी होत होती. पण मंडळी ना विश्वासी लोक तेना साठे एक मन हुईसन परमेश्वर ले प्रार्थना करी ऱ्हायंतात.

6जव हेरोद राजा पेत्र वर दोष लावा साठे तेले लोकस समोर लयावर होता, तेना तून एक रात पयले पेत्र दोन साकयस कण बांधायेल होता, दोन शिपाईस्ना मधमा जपी ऱ्हायंता आणि पहारेकरी दरवाजा वर बंदीगृह नि राखोई करी ऱ्हायंतात.

7अचानक परमेश्वर ना एक दूत पेत्र ना समोर ईसन उभा ऱ्हायना आणि ती खोली (कोठरी) उजाया कण भरी गयी. परमेश्वर ना दूत नि पेत्र नि पासोई वर हात लाईसन तेले जागाळ आणि सांग, “लवकर उठ.” तव पेत्र ना हात कण साकय उघळीसन पळीग्यात.

8तव परमेश्वर ना दूत नि तेले सांग, “कमर बांध, आणि आपला जोळा घालीले.” पेत्र नि तसच कर, नंतर परमेश्वर ना दूत नि तेले सांग. “आपला वरला कपळा घालीसन मना मांगे चालू लाग.”

9तो निघीसन तेना मांगे चालू लागणा. पण हय नई माहित होत कि जे काही परमेश्वर ना दूत करी ऱ्हायना ते खर शे, पण हय समजना कि मी दर्शन देखी ऱ्हायनु.

10तव त्या पहिला आणि दुसरा पहारे पासून निघीसन त्या लोखंड ना दरवाजा वर पोहोचनात, जो शहर कळे लीजास. तो दरवाजा तेस्ना साठे आपो-आप उघळी ग्या, आणि त्या निघीसन एक गली मधून ग्यात. इतला मा परमेश्वर ना दूत तेले सोळीसन चालना ग्या.

11तव पेत्र नि शुद्धी मा ईसन सांग, “आते मी खर समजी जायेल शे कि प्रभु नि आपला परमेश्वर ना दूत धाळीसन मले हेरोद राजा ना अधिकार मधून सोळाई लीध. आणि यहुदी पुढारीस्नी आशा तोळी टाकी.”

12हय समजीसन कि परमेश्वर नि तेले वाचाळी लीयेल होत, पेत्र त्या योहान नि माय मरियम ना घर उना, जो मार्क म्हणावस. तठे गैरा विश्वासी लोक एकत्र हुईसन प्रार्थना करी ऱ्हायंतात.

13जव पेत्र नि दरवाजा नि कळी वाजाळी त रुदा नाव नि एक दासी दरवाजा वर उणी.

14तिनी पेत्र ना शब्द वयखीसन खुशी ना मारे दरवाजा नई उघाळा, पण पयीसन मधमा जाईसन सांग कि पेत्र दरवाजा वर उभा शे.

15मधमा उपस्थित विश्वासीस्नी तिले सांग, “तू पागल शे.” पण ती आपली गोष्ट वर आळेल ऱ्हायनी कि हवू पेत्रच शे. तव तेस्नी सांग, “तेना परमेश्वर ना दूत हुईन.”

16पण पेत्र दरवाजा वर वाजाळतच ऱ्हायना, नंतर तेस्नी दरवाजा उघाळा, आणि तेले देखीसन चकित ऱ्हाईग्यात.

17तव तेनी तेस्ले हात कण इशारा कर कि चूप राहा. पेत्र नि तेस्ले सांग कि प्रभु कोणत्या प्रकारे मले बंदीगृह मधून काळी लय. मंग तेनी सांग, “याकोब आणि विश्वासी भावूस्ले हय गोष्ट सांगी देयज्यात.” तव तो निघीसन दुसरा जागा वर चालना ग्या.

18दुसरा दिन सक्कायमा बंदीगृह ना शिपाई गैर हताश हुई ग्यात, कि पेत्र कोठे ग्या.

19जव हेरोद राजा नि तेले झामलाना आदेश दिधा आणि तेले कोठेच नई झामली सकनात, त तेनी राखोयास्ले प्रश्न विचार आणि जव त्या तेले उत्तर नई देवू सकनात त तेनी त्या राखोयास्ले मारी टाकानी आज्ञा दिधी, आणि स्वता यहूदीया प्रांत ले सोळीसन कैसरीया शहर मा जाईसन राहाले लागणा.

20हेरोद राजा सूर आणि सैदा ना लोकस्वर गैरा रागे भरेल होता. एनासाठे त्या शहरस ना लोक हेरोद राजा ले भेटाले एक मन हुईसन उनात. सर्वास्तून पयले ब्लस्त पासून मदत मांगनात जो कि राजा ना एक कर्मचारी होता. तव तेस्नी हेरोद राजा ले शांती स्थापना ना साठे सांग, कारण कि त्या आपला जेवण ना पुरती साठे राजा ना देश वर आधारित होतात.

21ज्या दिन हेरोद राजा नि त्या शहरस्ना लोकस्ले भेटानी योजना करी त्या दिन हेरोद राजा राजवस्त्र घालीसन न्याय सिंहासन वर बठना, आणि तेस्ले भाषण देवाले लागणा.

22तव लोक वरळी उनात, “हवू त माणुस ना नई परमेश्वर ना शब्द शे.”

23त्याच क्षण परमेश्वर ना एक परमेश्वर ना दूत नि लगेच हेरोद राजा वर वार कर, कारण कि तेनी परमेश्वर ले महिमा नई दिधी. आणि तेना शरीर मा किळा पळीग्यात आणि तो मरी ग्या.

24परमेश्वर ना वचन पसरत ग्या आणि विश्वासीस्नी गणती वाळत गयी.

25यहुदी क्षेत्र मा यहुदी विश्वासीस्नी मदत करासाठे पैसा देवा नंतर बर्णबा आणि शौल यरूशलेम शहर मधून अंत्युखिया शहर ले परती ग्यात. योहान जो मार्क म्हणावस, तो बी तेस्ना संगे होता.

← Chapter 11 Jump to: Chapter 13 →