Psalms 102

Chin (Mara Bible RV (BSI))

← Chapter 101 Jump to: Chapter 103 →

1Hy Abeipa, ei thlahchhâna he thei la, Ei awna ao nâ lâ vaw tlô mawh sy!

2Ei nôpona noh liata na hmia na nyusai leipa la, Kei lâ na nah vaw pachôh la; Ei cha pado noh liata thlai nâ chhy mah y!

3Ei hro chhôh nohzy he meikhuh hawhta lei ta, Ei rupazy meihô hawhta a kâ.

4Ei palôh he sibiepa hawhta uah ta, Pati nie khohna chhao hnei khao va na.

5Thata ta a hrô na ta, Ei rupazy ei vo liata â lâ khai haw.

6Râhchawhpa riasi lyu na ta, Khi rypa vaku ei lyu.

7A zia hmah ta a hra na ta, Vâphuh liata boby yrupa ei lyu.

8Ei chariahpazy ta noh y ta na pasipasawh ei ta, Nâ mohnaopazy ta chhiesana châta Ei moh ama hmâh tyh.

9Viahchhâ hawhta buchâh nie na ta, Ei dopa liata mothlih ei pahlao tyh.

10Na ruchhôna nata hiehâhna vâta, Na chalo chi ta eina thy pathla ha chi.

11Ei hro chhôh nohzy he zâlâ nohawh hawh dei châ ta, Sibiepa hawhta ei uah.

12Nâ deikua cha, Hy Abeipa, Na beidyuchhai liata tlyzaw ta a tyuh chi ta; Chhâ zydua ta ama châ thei lymâ.

13Thyu aw chi ta, Zaio cha zawh nâ ngiah aw; He he Zaio khokheina daihti châ ta, Daihti raopa a vaw tlô haw.

14Châ chakaotuhpazy ta Zaio lôzy pasô ei ta, A dohlei chhao ama ngiachhie ngaita.

15Phopizy ta Abeipa moh cha chi aw ei ta, Lei bei zydua ta na rônahna ama chi aw.

16Abeipa ta Zaio cha sa pathi aw ta, A rônahna chhaota â vaw luah heih aw.

17Ato vâiapa thlahchhâna thei ta, Ama thlahchhâna dytha vei.

18He he chhâ a vaw y awpa châta ropa châ aw ta, Phopi a y mâh leipazy chhao ta Abeipa cha ama reithai aw:

19Abeipa ta a su sâhpa pathaihpa tawhta za moh ta, Vâ tawhta lei lâ a za sai,

20Atâhpazy ahrôna theipa ta, Thi awpa ta raopazy pathlie awpa ta.

21Chatanachata Zaio liata Abeipa moh phuah aw ei ta, Zerusale liata ano reithaina ama phuah aw.

22Abeipa a chhy awpa ta, Phopizy nata abeinarâhzy amâ hmaohpakhy tita, Cha hawhta ama tao aw.

23Ei locho nota ei tha na pachhâ ta, Ei hro chhôh nohzy a pachyusa.

24“Hy ei Khazohpa, ei locho nota na la khah y, Nâma kôzy cha chhâ zydua a daihpa a châ,” tah na ta.

25Leilô abôna he hlâno ta na vaw bô hapa châ ta, Avâzy khi na kuzô a châ.

26Chazy cha leidia aw ei ta, Chysia hawhta ama chy khai aw; Poh hawhta ri aw chi ta, Thypa ama châ aw; Nâ deikua cha na y thlâh ha aw.

27Nâ cha na ualua ta khâ y chi ta, Na kôzy ta chhâna noh hnei vei.

28Châ chakaotuhpazy cha, Ama pathlazy â bohpa ta y ei sala, Ama chipathlazy cha, Na hmiakô liata pa-ipa ta y mawh ei sy.

← Chapter 101 Jump to: Chapter 103 →