Psalms 89

Chin (Mara Bible RV (BSI))

← Chapter 88 Jump to: Chapter 90 →

1Abeipa kyhpachâna tleih beih leipa cha, Chhâzaw ta hla ta sa aw na ta; Na ngâchhihna cha, Chhâ zydua liata ei pakah ta ei pahnosa aw.

2“Na kyhpachâna tleih beih leipa cha, Chhâzaw ta a duah aw ta, Avâzy liata na ngâchhihna na pa-i aw,” tah na ta.

3“Ei tlyhpa chyhsa hnohta biehrai tao na ta, Nâ chakaotuhpa Dâvi hnohta bie ei taih haw:

4‘Na chipathla cha tlyzaw châta pa-i aw na ta, Na beidyuchhai chhao chhâ zydua châta ei padua aw,’” na tah.

5Hy Abeipa, avâzy ta na hmonoâhpazy reithai ei sala, Mopathaihpazy pakhypi liata na ngâchhihna reithai mawh ei sy!

6Avâzy liana khita Abeipa pakhopâ thei awpa ahy ma y ta, Abeipa hawhpa he vâmozy hry liata ahy ma a y?

7Ano cha mopathaihpazy pakhypi liata ama chi ngaitapa châ ta, A kiapâh liata a ypa zydua hlâta ama chiza chaipa Khazohpa a châ.

8Hy Zehôvâh Khazohpa Atotaotheipa, Hy Abeipa, nâ hawhta thatlôpa he ahy ma y ta, Nâ hawhta ngâchhihna ta a chadôpa he ahy ma a y?

9Tilaipi a lai lymâpa chô liata ryureih chi ta, Tichatlaopa a pathluah ngâpazy na chalihsa tyh.

10Rahâbi cha chyhsa thiepa hawhta taichheih chi ta, Na chariahpazy na bâh thatlôna ta na papai ha ei.

11Vârâhzy khi nâma eih châ ta, Alei chhao he nâ eih a châ; Khizaw nata a chhôh liata a ypa zydua he, Na taopa sai a châ.

12Maw paysa chi ta, Chho na paysa; Tabaw nata Hâmaw ta, A ly ngaitapa ta na moh ama reithai.

13Bâh hmotaotheipa hnei chi ta, Ku thatlôpa na hnei; Na ku chachâh lâ cheihchalopa ta a y.

14Siana nata adona cha na beidyuchhai abôna châ ta, Kyhpachâna nata ngâchhihna na hmia lâta ama sie.

15Thaphana pyu a theipa phopi cha a nohlao na, Hy Abeipa, âmo cha, Na hmia khaihna liata a chareipazy ama châ.

16Na moh vâta noh y ta thaphapa ta y ei ta, Na siana vâta cheihchalopa ta ama y.

17Nâ cha ama thatlôna rônahna châ chi ta, Na khokheina vâta eima ki cheihchalopa ta a y.

18Eima vyhphao cha Abeipa eih châ ta, Eima bei cha Izarei Mo Pathaihpa eih a châ.

19Hlâno ta na chyhsa ngâchhihpa hnohta, Aluahna ta hetana heta na tah: “Pasaipha hnohta thatlôna pie na ta, Phopi vyuhpa ta atlypa cha ei cheihchalo.

20Nâ chakaotuhpa Dâvi hmô na ta, Ei sathaw pathaihpa ta ano cha sathaw ei thu.

21Ei ku ta ano cha padua aw ta, Ei bâh ta tha a patlô aw.

22Chariahpa ta ano cha tiah leipa aw ta, Moleipa ta panawh aw vei.

23A khakhaipazy a hmiakô liata taichheih aw ei na ta, Ano a haotuhpazy ei tusao aw ei.

24Ei ngâchhihna nata ei kyhpachâna a hnohta y aw ta, Ei moh vâta a ki cheihchalopa ta a y aw.

25Tilaipi chô liata a ku pahniehsa aw na ta, Chavahzy chô liata a ku chachâh lâ ei pahniehsa aw.

26Na aw aw ta, ‘Ei Paw châ chi ta, Ei Khazohpa nata ei pachhana lôpanô na châ,’ Eina tah aw.

27Ei sawchapaw uhtheipa ta tao aw na ta, Lei beizy hry liata chônôchaipa ta ei tao aw.

28Ei kyhpachâna tleih beih leipa cha, Ano châta chhâzaw ta soh aw na ta; Ei biehrai ano châta â i lymâ aw.

29A chipathla tlyzaw ta padua aw na ta, Avâ y chhôh zydua a beidyuchhai â duah lymâ aw.

30A sawzy ta ei ryhpa siesai ei sala, Ei bie pachiapazy a chhih leipa ta,

31Ei bieraopazy parao ei sala, Ei biepiepazy ama zyh vei khiah deikua cha,

32Ama paraona vâta sômasi ta hrie aw ei na ta, Ama moleina vâta chheipa ta ei hrie aw ei.

33Châhrasala ei kyhpachâna tleih beih leipa cha, Ano tawhta la leipa aw na ta; Ei ngâchhihna ama chô liata tleih beih aw vei.

34Ei biehrai parao leipa aw na ta, Ei pakah tawhta bie a pua hapa panano aw va na.

35Ei pathaihna moh reipa ta, Chhâzaw châta ei kha bie a taih ha na ta; Dâvi hnohta haipa bie reih aw va na.

36A chipathla tlyzaw ta a duah aw ta, Ei hmiakô liata noh a y chhôh zydua cha, A beidyuchhai â duah lymâ aw.

37Thlâpâ hawhta tlyzaw ta a duah aw ta, Avâ liata pahnokheituhpa ngâchhihpa ta a y aw.”

38Tahmâ deikua cha dythapa ta thy ha chi ta, Na sathawthupa chô liata na pathi thata a ia haw.

39Châ chakaotuhpa chô liata na biehrai parao chi ta, A lakho dohlei liata na papuapalei haw.

40A diahsuazy papyu chi ta, A thokhyzy na pacho khai haw.

41A chapiapa maihta hrao ei ta, A chheipâh râhzy ta ama pahneisao.

42A khakhaipazy ku chachâh lâ cheihchalo chi ta, A chariahpa zydua thaphapa ta na paysa ei.

43A zaozi hâh pakosa chi ta, Adyuhna liata a duah thei awpa ta tao khao va chi.

44A rônahna pachhâsa chi ta, A beidyuchhai alei lâ na thy haw.

45A thyutliana nohzy pachhohsa chi ta, Nozana ta na khu haw.

46Hy Abeipa, khati taih ma a châ aw? Chhâzaw ta ma nâ nyu aw? Khati taih ma na pathiiana mei hawhta a kâ aw?

47Ei daihti chyuzie he a thei mah y! Khazia ma chyhsa saw zydua he, Hraoleipa ta na vaw paysa ei tly?

48Kheihawhpa chyhsa ma thina hmô leipa ta A hroh thlâh ha aw tly? Ahy ma Athihkhih hmotaotheina tawhta A hro a pachha thei aw tly?

49Hy Abeipa, na kyhpachâna tleih beih leipa kha, Khataih liata a y haw? Hmeiseihpa ta Dâvi hnohta bie nâ taihpa kha, Khataih liata a y haw?

50Hy Abeipa, châ chakaotuhpazy pahneisaopa ta eima ypa he a thei la, Râh zydua pasipasawhna ei palôh liata ei taopazy he a thei mah y.

51Hy Abeipa, na chariahpazy ta miah ama pasipasawhna biezy a thei la, Na sathawthupa pheihnie ama reipachhienazy he a thei mah y.

52Abeipa cha tlyzaw ta reithaipa ta y mawh sy! Amen, Amen.

← Chapter 88 Jump to: Chapter 90 →