Psalms 106

Chin (Mara Bible RV (BSI))

← Chapter 105 Jump to: Chapter 107 →

1Abeipa cha reithai u la, Alyna bie hlâ teh u! Ano cha pha ta, A kyhpachâna a tleih beih leipa a châ.

2Ahy ma Abeipa hmotao rônahpazy reih thei ta, A reithaina zydua a phuah thei aw?

3Adona a duakheipazy cha nohlao ei ta, Khatino rai ta a siapa ta hmo a taopazy ama nohlao tyh.

4Hy Abeipa, na phopi na khokhei tita nâ thei la, Na pachha ti ei ta na bao mah y.

5Chatanachata nâ tlyhpazy byhnâ topa to hra aw na ta, Na phopi thaphana liata a lypa ta, Na ryuto rônahna liata ei hlao hra aw.

6Keimo nata miah pathlatuhpazy ta molei ha pi ta, Hmo pha leipa taopa ta hmo eima vaw parao haw.

7Miah pathlatuhpazy Izi râh liata ama y no kha, Na hmotao noâhpazy pachâ veih ei; Na kyhpachâna rônahpa a thei leipa ei ta, Tilaipi liata cha chakhia ei ta, Tilaipi Saihpa liata ama cha chakhia.

8Chatanachôta a moh vâta âmo cha pachha pyly ta, A hmotaotheina rônahpa a pahnosa ei.

9Tilaipi Saihpa rapa ta pakua ta, Râhchawhpa liata siepa hawhta, Ti athupa kuapa liata a siekhei ei.

10Ama khakhaipa ku tawhta âmo cha pachha ta, Ama chariahpazy hmotaotheina tawhta a chatlai ei.

11Tizy ta ama khakhaipazy vao ta, Pakha hmah pahlôhpa châ veih ei.

12Chatawhcha a biezy zo ei ta, Ano reithaina hla ama sa.

13Châhrasala a hmotaopazy cha thlai my ei ta, A ryhraona hâ khao veih ei.

14Râhchawhpa liata ama aoh thata zoh ta, Râh raohpa liata Khazohpa ama pasia.

15Ama hiapa cha pie ta, Châhrasala ama hry liata chaohna hri a chareisa.

16Riehmo liata ama y nota, Mawsi chô liata ama hiatlia ta; Abeipa chyhsa pathaihpa Arawna chô liata chhao, Ama hia a tlia.

17Alei a vaw pahypa ta Dâthâ cha palâ ta, Abirâ pyzy a vao ha ei.

18Ama hry liata mei vaw pua ta, Meipaleih ta hmoparaopazy a kâsao ha ei.

19Hôribâ tlâh liata viahchaotaw nothlahpa tao ei ta, Nothlah leihpa cha amâ chhy.

20Chatanachata ama rônahna cha, Sibie a bâpa viahchao tôhpa nothlahpa nata ama ri haw.

21Âmo pachhatuhpa Khazohpa my ei ta, Izi râh liata hmo rônahpazy a taotuhpa kha ama my haw.

22Hamâ râh liata hmonoâhpazy a taotuhpa my ei ta, Tilaipi Saihpa kiah liata hmo rarôh ypazy taotuhpa kha ama my haw.

23Chavâta âmo cha pahleipadia a chhuah ta, A hiehâhna pakuasa awpa ta, A chyhsa atlyhpa Mawsi ta, Âmo nata Khazohpa likawh liata a duah vei mawh sala, A pahleipadia khai ha aw ei.

24Râh khochhihpa dytha ei ta, A bietai zo khao veih ei.

25Ama poh ozy liata paphôh ei ta, Abeipa ao nathlie khoh veih ei.

26Chavâta a ku chalopa ta âmo cha bie a taih ta, Râhchawhpa liata a papaosa awpa kyh a chho ei.

27Ama chipathlazy cha phopizy hry liata papaosa aw ta, Râh to liata a hiepatla awpa kyh chhao a chho ei.

28Bâlâ-peô a chhy ei ta, Athipa lâta hlâpa atheihna sazy ama nie.

29Ama hmotaopazy ta Abeipa cha a hie pahâh ei ta, Ama hry liata potlana a vaw tlô.

30Phinehâ a duah ta a liah vaw tla ta, Potlana cha papaipa a châ.

31Cha cha chhâzaw nata tlyzaw ta, A siana ta raopa a châ.

32Meribâ tizy liata Abeipa hie pahâh ei ta, Âmo vâta Mawsi chô liata hmo phaleipa vaw tlô ta;

33A thlahpa pachâ ama parôhsapa vâta, A hmao ta palôh charâpa ta bie a rei hapa kha a châ.

34Abeipa ta âmo bie a piepa hawhta, Phopizy pahleipadia leipa ei ta,

35Râh hropazy nata a pahlao ei ta, Ama hmotaozie hâ amâ la.

36Ama khazoh nothlahpazy chakao ei ta, Cha cha âmo châta khoheih lâta â lie haw.

37Ama sawchapawzy nata ama sawchanôzy Ahripazy lâta atheihna ta ama hlâ tyh.

38Paraona a hnei leipa thisaih palo ei ta, Ama sawchapawzy nata sawchanôzy thisaih palopa ta, Kâna khazoh nothlahpazy lâ amâ theih tyh; Chavâta râh cha thisaih ta papuapaleipa ta a y.

39Ama hmotaopazy vâta pathaih leipa châ ei ta, Ama hmotaopazy liata sihryhpa ama vaw châ haw.

40Chavâta Abeipa pathi cha a phopi chô liata thata ia ta, A ryuto a pasi ngaita.

41Âmo cha phopizy ku liata pie ta, Âmo a haotuhpazy ta ama chô liata ryureih awpa ta a pie ha ei.

42Ama chariahpazy ta tlybai ei ta, Ama chariahpazy biehneina ry liata sopa ama châ.

43Ei hluhpi âmo cha pachha ta, Châhrasala Abeipa chakhia awpa tlao a chhuah ha ei ta, Ama paraona vâta panawhpa ta ama y haw.

44Chatahrasala ano ama padona ao a thei nahta, Ama nôpona cha a pachâ heih tyh.

45Ama hnohta a biehrai a thei heih tyh ta, A kyhpachâna tleih beih leipa rônah ngaitapa vâta, A palôh a panano heih tyh.

46Sei ta âmo a chhituhpazy cha, Âmo a pangiachhiesa ei.

47Hy Abeipa eima Khazohpa, Miah pachha la, Râh to tawhta miah pakhy heih mah y; Chatanachata na moh pathaihpa chô liata alyna bie reih aw pi ta, Na moh reithaipa ta eima cha parônahsa aw.

48Abeipa, Izarei Khazohpa cha, Chhâzaw nata tlyzaw ta reithaipa ta y mawh sy! Chyhsa zydua ta, “Amen!” tah mawh ei sy! Abeipa cha reithai teh u!

← Chapter 105 Jump to: Chapter 107 →