Psalms 107

Chin (Mara Bible RV (BSI))

← Chapter 106 Jump to: Chapter 108 →

1Abeipa cha pha ta, A kyhpachâna tlyzaw ta a tleih beih leipa a châpa vâta, Alyna bie hlâ teh u!

2Cha kyh cha Abeipa chatlaipazy ta reih ei sala, Khakhaipa tawhta a chatlaipazy ta reih mawh ei sy!

3Nochhi, notla, maw nata chho, Râh to tawhta a awpakhypazy ta, Abeipa phana kyh cha reih mawh ei sy.

4Thokha râhchawhpa nata râh raohpa liata viavi ei ta, Pahrâ nawpa khihpi lâpi hmô thei veih ei.

5Nodi dâhphipa ta y ei ta, Ama hro a panao khai haw.

6Chatawhcha nôpopa ta Abeipa pado ei ta, Abeipa ta pachârôhna tawhta a pachha ei.

7Lâdy lâta âmo cha a chhi ta, Pahrâ nawpa khihpi ama tlô hlâlei â chhi ei.

8A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

9Ano cha hro dâhphina papaituhpa châ ta, Hmo phapazy ta hro nodipa rih a pabie tyh.

10Thokha cha zohna nata thina nohpahli liata a tyuh ei ta, Pasataopa nata thua ta chahrypa ta patâhpazy ama châ.

11Khazohpa bie chakhia ei ta, Chônôchaipa ryhraona khâpasaw ta ama rei leipa vâta a châ.

12Ama palôhzy cha Abeipa ta hriapasana ta panawhsa ta, Pao ei ta, âmo a bao awpa y veih ei.

13Chatawhcha nôpopa ta Abeipa pado ei ta, Abeipa ta ama pachârôhna tawhta a pachha ei.

14Zohna nata thina nohpahli tawhta âmo cha a chhi papua ta, Ama chahrynazy a chhiepa ei.

15A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

16Abeipa ta dawh ochhizy parao ta, Thua ochhi lâhreizy a thlie pachhô.

17Thokha cha hru kawpa ta moleina lâpizy a chhih ei ta, Ama paraonazy vâta pasataopa ta ama y.

18Ama hro ta niedopa to pasi ta, Thina chhikao amâ hnia via lymâ.

19Nôpopa ta Abeipa pado ei ta, Abeipa ta ama pachârôhna tawhta a pachha ei.

20A bie tuapa ta âmo patlâh ta, Ama leidia awpa tawhta a pachha ei.

21A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy.

22Alyna biereina atheihnazy hlâ ei sala, Alyna hlazy ta a hmotaopazy chho mawh ei sy!

23Thokha cha tilaipi lâ balyh ta zu ei ta, Ti lai ngaitapa chô liata rai ama hria tyh.

24Abeipa hmotaopazy hmô ei ta, Ti athupa liata a hmotao noâhpazy ama hmô.

25Abeipa ta biepie ta thlihpipa pathlisa ta, Tichatlaopazy a pasâhsa tyh.

26Avâ lâ kiah ei ta, Âthupa lâ chô heih ei ta; Nôpona vâta ama riahphana a lei khai ha tyh.

27Sahma paripa hawhta paochheichhâ ei ta, Yzia nawpa rai pahno veih ei.

28Nôpopa ta Abeipa pado ei ta, Abeipa ta ama pachârôhna tawhta a pachha ei.

29Thlihpipa cha chalihsa ta, Tichatlaopazy sidiapa ta ama y.

30Tizy sidiapa ta ama y hapa vâta a ly ei ta, Ama khopa balyh apahâna su a tlôkhei ei.

31A kyhpachâna tleih beih leipa vâta, Abeipa cha reithai ei sala; Chyhsa sawzy châta a hmotao noâhpazy vâta, Abeipa cha reithai mawh ei sy!

32Phopi pakhypi liata ano cha reithai ei sala, Machâzy pakhypi liata ano cha reithai mawh ei sy.

33Chavahzy râhchawhpa pachâsa ta, Tihnawhzy chhaohlei chawhkaraipa pachâsapa ta,

34Râh phapa chhao râh chhiepa a pachâsa haw, A chhôh liata a pahrâpazy paraona vâta.

35Râhchawhpa tipo lâta pachâsa ta, Chhaohlei hipa tihnawhzy lâta a pachâsa tyh.

36Cha liata nodipazy pahrâsa ta. Pahrâ nawpa khihpi ama padua.

37Lyuzy liata chizy cheipa ta kre zôhzy loh ei ta, Kôvei phapazy ama hmô tyh.

38Abeipa byhnâ vâta thata pôh ei ta, Ama sahrohzy a chokua awpa pasaih vei.

39Tlybaina, moleina nata pachârôhnazy vâta, Pasysa viapa nata panawhpa ta ama y tita,

40Ama chhituhpazy chô liata mohnaona lei thlu ta, Lâpi y leina râhchawhpa liata a paviavisa ei.

41Dyhchhiepazy deikua cha ama pasataona tawhta pachha ta, Sahroh hri hawhta ama chhôhkhazy a papôhsa.

42Chyhsa dopazy ta cha cha hmô ei ta, Amâ ly ngaita; Hmoparaozy deikua cha, Ama pakah amâ chahu.

43Chyhsa sopa maihta cha hmozy cha ngia ei sala, Abeipa kyhpachâna tleih beih leipa kyh pachâ tyh mawh ei sy.

← Chapter 106 Jump to: Chapter 108 →