Psalms 118

Chin (Mara Bible RV (BSI))

← Chapter 117 Jump to: Chapter 119 →

1Abeipa lâ alyna bie hlâ teh u, Ano cha pha ta, A kyhpachâna chhâzaw ta a tleih beih leipa a châ.

2Izarei ta reih sala, “A kyhpachâna chhâzaw ta a tleih beih leipa a châ,” Tah mawh sy.

3Arawna pathlazy ta reih ei sala, “A kyhpachâna chhâzaw ta a tleih beih leipa a châ,” Tah mawh ei sy.

4Abeipa a chituhpazy ta reih ei sala, “A kyhpachâna chhâzaw ta a tleih beih leipa a châ,” Tah mawh ei sy.

5Nôpopa ta ei y nota Abeipa cha pado na ta, Abeipa ta nâ chhy ta, Ei nôpona eina pathlâpa haw.

6Abeipa ta ei chhâh a châ ta, Chavâta chi aw va na. Chyhsa ta kheihta eina tah thei aw?

7Abeipa ta ei chhâh a châpa ta na bao ta, Chavâta nâ haotuhpazy ama paopa ei hmô aw.

8Chyhsapa ngâpa hlâta, Abeipa a chhaipa a pha via.

9Beimachâzy ngâpa hlâta, Abeipa a chhaipa a pha via.

10Phopi zydua ta na dôh ei ta, Abeipa moh ta ei chhawh pathlah khai ha ei.

11Na dôh ei ta, Su to tawhta na dôh ei ta, Abeipa moh ta ei chhawh pathlah khai ha ei.

12Kheihzy hawhta na palô ei ta, Châhrasala ahloh thih liata mei hawhta pachhaipa châ ei ta, Abeipa moh ta ei chhawh pathlah khai ha ei.

13Chariahpa ta na vaw tôh ta, Ei pao daihmâ; Châhrasala Abeipa ta eina bao.

14Abeipa cha ei thatlôna nata ei hla châ ta, Ei pachhana a vaw châ haw.

15Mosiapazy poh o liata la, Pachhana thaphana hlazy ta bie ta, Hetana heta ama sa tyh: “ Abeipa ku chachâh lâta riahpha ngaitapa ta tao ta,

16Abeipa ku chachâh lâta cheihchalo ta, Abeipa ku chachâh lâta riahpha ngaitapa ta a tao.”

17Thi leipa aw na ta, Hroh aw na ta, Abeipa hmotaopazy ei phuah aw.

18Abeipa ta thata na chhorei ta, Thina lâ deikua na hlâ vei.

19Siana chhikaozy na pahypa teh u, Cha lâ tawhta a ngia aw na ta, Abeipa lâ alyna bie ei reih aw.

20Cha cha Abeipa chhikao châ ta, Mosiapazy cha, cha lâ tawhta amâ ngia aw.

21Hy Abeipa, na chyhei chi ta, Ei pachhana na châpa vâta, Alyna bie ei cha hlâ.

22O satuhpazy alô kho leipa kha, Abôna lô a vaw châ haw.

23Cha cha Abeipa taopa châ ta, Eima mo liata â ngia ngaita.

24He he Abeipa taopa noh châ ta, He noh he a ly sih la, Thaphapa ta y ei suh u.

25Hy Abeipa, miah pachha la, Hy Abeipa, hlao miah patloh mah y!

26Abeipa moh ta a vypa cha reithaipa ta y mawh sy! Abeipa o tawhta byhnâ eima cha awpa ei.

27Abeipa cha Khazohpa châ ta, Eima chô liata a khaihna a pakhaihsa haw. Atheihna sahroh cha chaori ta hraih u la, Maisâh kizy liata hraih teh u!

28Hy Abeipa, nâ cha ei Khazohpa châ chi ta, Alyna bie ei cha hlâ aw; Ei Khazohpa châ chi ta, Ei cha palyupalih aw.

29Abeipa lâ alyna bie hlâ teh u; Ano cha pha ta, A kyhpachâna chhâzaw ta a tleih beih leipa a châ.

← Chapter 117 Jump to: Chapter 119 →