Psalms 81

Chin (Mara Bible RV (BSI))

← Chapter 80 Jump to: Chapter 82 →

1Eima thatlôna Khazohpa lâ ao paropa ta hla sa u la, Zakaw Khazohpa lâ a lypa ta awh teh u!

2Reithaina hla sapa ta khoh tô u la, Totâ nata tlaipih pyu ngiapazy tô teh u.

3Thla thiehpa liata chiahmie tô u la, Thlâpâ pôlô no nata eima kyhchhi noh liata chhao tô teh u.

4Cha cha Izarei châta bieraopa châ ta, Zakaw Khazohpa biepiepa a châ.

5Zawsi châta bieraopa ta tao ta, Izi râh lâ a sie nota a bieraopa châ ta, Reih thei leipazy hry liata a y nota a bieraopa a châ.

6Abeipa ta hetana heta a tah: “Na ngiatlâh tawhta phaohri cha pachhôpa na ta, Na kuzy hrâbyh tawhta ei pahua.

7Nôpopa ta na aw chi ta, Ei cha pachha; Tôkalôhpa su nyupa liata châ chhy na ta, Meribâ tizy liata ei cha pasia.

8Hy ei phopi, nathlie teh, Biesakâ ei cha vaw hih! Hy Izarei, ei bie vaw nathlie ha mawh la cha,

9Nâma liata khazoh hropa y leipa aw ta, Chihropa khazoh hmia liata nâ bôh lei awpa tlai!

10Kei he Abeipa na Khazohpa châ na ta, Izi râh tawhta châ kaw chhi papuatuhpa kha ei châ. Na pakah a kawhpa ta â la, Ei pabie aw.

11“Châhrasala ei phopi ta ei ao nathlie leipa ta, Izarei ta nâ ngiarih khoh vei.

12Chavâta ama palôh kuhchha awpa ta pasaih na ta, Âmo ryhraona liata sie awpa ei pasai ha ei.

13Aw, ei phopi ta ei bie nathliepa ta, Izarei ta ei lâpizy a vaw chhih ha mawh sala cha,

14Ama chariahpazy thlai panawh aw ei na ta, Ama khakhaipazy chô liata ei ku ei hy ha awpa tlai!

15Abeipa a haotuhpazy ta ano ry a vaw daoh aw ei ta, Châhrasala ama tovyuh awpa cha chhâzaw hriena a châ aw.

16Nâ deikua cha sâh pahâh chaipa ta cha pasa aw na ta, Lôpanô tawhta kheihti ta lôhrâ ei cha patlô aw.”

← Chapter 80 Jump to: Chapter 82 →