Psalms 18

Chin (Mara Bible RV (BSI))

← Chapter 17 Jump to: Chapter 19 →

1Hy Abeipa, ei thatlôna, Kyh ei cha pachâ kaw dia!

2Abeipa cha ei lôpanô, ei thokhy nata nâ pachhatuhpa châ ta, Ano cha ei Khazohpa, ei chhaipa lôpanô châ ta, Ei vyhphao, ei pachhana ki nata ei diahsua a châ.

3Reithai tlâh Abeipa cha pado na ta, Ei chariahpazy tawhta pachhapa ta ei y.

4Thina chaorizy ta na chazeipa ta, Raona tily ta na phaoh ta,

5Athihkhih chaorizy ta na chahry ta, Thina khoheihzy ta eina chadô.

6Nôpopa ta Abeipa cha pado na ta, Na bao awpa ta ei Khazohpa ei aw. Achhyna o tawhta ei ao thei ta, Ei awna ao a nah liata â ngia.

7Alei he a chathopa ta a chalyu ta, A hie a hâhpa vâta, Tlâhpizy abôna chhao a chachhao ta â sih.

8A hnapasu tawhta meikhuh puapa ta, A pakah tawhta meipaleih pua ta, Ano tawhta meiia a vaw pua.

9Avâzy pahnaipa ta za chô ta, A phei ry liata zoh kaluhna a y.

10Cherubi chô liata kiapa ta a zaw ta, Thlih mathlawzy kiahpa ta a vaw tlô.

11Zohna cha ano chhiehruh awpa ta tao ta, A chheipâh zydua khu awpa ta taopa ta, Vâ meihdo zohpazy a tao.

12A hmiakô liata khaihna tawhta, Pachie nata pareih vaw tla ta, A meihdozy a vaw chhô pahlie.

13Abeipa cha avâzy tawhta a vaw thua ta, Chônôchaipa ta a ao papua ta, Pachie nata pareih thata a tla.

14A châtaizy kapa ta âmo cha papai ta, Dôhlazy chakeihsa ta â chadaipai ha ei.

15Hy Abeipa, na rana vâta, Na hnapasu tawhta hu a puapa ta, Tilaipi chaozy hmô theipa châ ta, Khizaw abônazy â lâ khai.

16Chô lâ tawhta za pazapa ta na patu ta, Tisaih tawhta einâ daophi.

17Ei chariah thatlôpa tawhta na pachha ta, Nâ haotuhpazy tawhta eina pachha, Ei châta ama tha a tlô tupa vâta.

18Vâchhiena ei tyh noh ta na tei lao ei ta, Châhrasala Abeipa cha nâ baotuhpa a châ.

19Ei chô liata â lypa vâta, Na pachha ta, Su kawhpa lâ einâ chhi haw.

20Ei sianazie hawhta Abeipa ta ei chô liata tao ta, Ei ku pathaihnazie hawhta lymâ eina pie.

21Abeipa lâpizy a chhih na ta, Ei Khazohpa a heihsaipa ta moleina hmo tao beih va na.

22A ryureina zydua ei hmiakô liata y ta, A bieraopazy kei tawhta thy va na.

23A hmiakô liata seina hnei leipa na ta, Thaileichâna tawhta keimasasyh ta ei pabohsa.

24Chavâta Abeipa ta ei sianazie hawhta lymâ na pie ta, A mohmô liata ei ku pathaihnazie hawhta lymâ eina pie.

25Zawngiah theipa hnohta zawngiahna palâsa chi ta, Seina hnei leipa hnohta seina hnei leipa na châna na palâsa.

26Pathaihpa hnohta na pathaihna palâsa chi ta, Piehpiepa cha a piehpiena hawhta na hrie tyh.

27Areisipa pachha chi ta, Akhotlâhpa na panawh tyh.

28Nâ ta ei meiôh pakhaih chi ta, Abeipa ei Khazohpa ta ei zohna a pakhaihsa tyh.

29Na baona ta pheisaihzy chanaoh na ta, Ei Khazohpa baona ta thokhy chhao ei zawpakhô.

30He Khazohpa lâpi cha phapaki ta, Abeipa bie cha â dozie pasia hapa châ ta, Ano cha a chhaituhpa zydua châta vyhphao a châ.

31Abeipa dei leipa ta ahy ma Khazohpa a y? Eima Khazohpa dei leipa ta ahy ma lôpanô a y?

32Khazohpa cha thatlôna ta chai nâ saihtuhpa châ ta, Ei lâpi phapakipa ta a taotuhpa a châ.

33Ei pheizy sakhih phei hawhta tao ta, Su sâhpazy liata â bohpa ta eina paysa.

34Ei kuzy he adyuhna châta pachu ta, Ei bâhzy ta dawh libaw â kei thei.

35Na pachhana vyhphao na pie chi ta, Na ku chachâh lâta na cha-ao chi ta, Na nôphana ta eina parônahsa chi.

36Ei phei chakâna su pakawh chi ta, Ei pheizy a chakhao beih vei.

37Ei chariahzy a chadai ei na ta, Ei pha lymâ ei; Pahleipadiapa ama châ khai hlâlei cha, A lie va na.

38Chhawh pathlah ei na ta, Thyu thei khao veih ei, Ei phei ry liata ama pao haw.

39Adyuhna châta thatlôna ta ei chai na saih chi ta, Nâ thyuhnaopazy ei ry liata na pazawh ei.

40Ei chariahpazy kei tawhta parâpaisa chi ta, Nâ haotuhpazy ei pahleipadia ha ei.

41Baona hiapa ta awh ei ta, Châhrasala a pachha awpa y veih ei; Abeipa aw ei ta, Châhrasala âmo a chhy vei.

42Thlih ta a phao pahaipa dohlei hawhta phy padi ei na ta, Khiliah chiatlao hawhta ei thiah ha ei.

43Phopizy nata atuna tawhta na pachhapa ta, Râhzy chhituhpa ta na tao chi ta, Ei pahno beih leipa phopi ta eina chakao.

44Ei bie ama theipa nahta ei rei a ngiah ei ta, Chihropazy ta ei ry amâ vaw daoh.

45Chihropazy ama palôh chhâ ta, Chalyuna chôta ama thokhyzy tawhta ama vaw pua.

46Abeipa cha hroh ta, Ei lôpanô cha reithaipa ta y sala, Ei pachhana Khazohpa cha palyupalihpa ta y mawh sy.

47Ano cha phuh nâ lapatuhpa Khazohpa châ ta, Phopizy ei ry liata a panawhtuhpa a châ.

48Ei chariahzy tawhta nâ pachhatuhpa châ chi ta, A châ na, nâ thyuhnaopazy chô lâta na cheihchalopa ta, Thachahra a hmâhpa chyhsa tawhta eina pachha ha chi.

49Cha vâna chata Hy Abeipa, Phopizy hry liata cha reithai aw na ta, Na moh reithaina hla ei sa aw.

50Abeipa cha ano paduapa bei hnohta pachhana rônahpa pie ta, A sathawthupa Dâvi nata a pathlazy chô liata, Zawngiahna chhâzaw ta a palâsa.

← Chapter 17 Jump to: Chapter 19 →